Di rilo labik hu sangka iek glang ka uranaih dalam harei tet trung thu 

Sa-ai Nguyễn Thị Phương Thanh, daok di phường 3, bal Tây Ninh brei thau: tết trung thu daok iew lac tết gun pataom, hu mbang har trung thu tuk hu mbaok taong abih dom urang dalam sang ngak ka sa-ai mboh biak haniem phuan. Kayua yau nan ye, thun halei jeng yau nan, tal tết trung thu sa-ai jeng blei har mai payak abih manuac dalam sang. 

Sa-ai Cao Thị Kim Ngân, daok di phường Hiệp Ninh, bal Tây Ninh brei thau, dom thun dahlau diah, sa-ai nao tal dom labik pablei har piah palih ruah har trung thu, thun ini, kayua jit ruak, sa-ai blei har angaok mạng xã hội. Rai diuk di baoh sang jeng gaok kan kandah meng jit ruak, min sa-ai Ngân brei thau, jeng mboh drei daok hu patuah kayua manuac urang dalam sang thei jeng salamat, khang kajap prein yava. 

Daok di angaok jalan Cách Mạng Tháng Tám, dalam phường 2, ban Tây Ninh (ban Gia Long klak), labik pablei har trung thu saong gom menyek di sang sa-ai Trương Mỹ Thanh (umo 33 thun) mboh biak jua lange tuk dom baoh sang jaik taphia  jeng kareik pabah mbang piah pacang caga jit.

Sang sa-ai Thanh lac 1 dalam takik baoh sang daok khik bruk ngak gom menyek meng kan. Yaok thun, piah caga ka bruk ngak gom menyek Trung thu, sa-ai Thanh nao blei pandap piah ngak dahlau dom bilan. Thun ini, jit ruak tamuh khang, bruk pablei salih di sa-ai oh laghaih kayua thei jeng daok dalam sang, oh tabiak jalan hu piah blei pandap yau dahlau diah.  

Sa-ai Thanh khan lac: “Tết Trung thu thun blaoh, dahlak pablei hu jaik 500 baoh gom menyek, daok thun ini bahrau pablei hu dom baoh min. Thun halei jeng pablei nan ye randap paje, urak ini jaik tal trung thu, dahlak ngak dom baoh gom menyek ba tabiak tuan  piah tu har di sang hu hadah tagok hasit. Dahlak caong khin jit ruak samar hu pacang cakak piah ka manuac sia hu uan raok tết trung thu”.

Piah ka uranaih hu uan raok Tết Trung thu dalam tukvak jit ruak, dom urang ngak amaik hu blei pandap alin saong pandap ma-in, khik piah pandap ngak har dalam tu la-ar caik tal harei mek tabiak ngak har ka anek bhik nyu mbang. Salih ka bruk ba anek tabiak jalan piah blei baoh gom menyek, pandap ma-in...  yau dom thun dahlau, dom urang ame buh prein ngak dom baoh gom menyek brei ka anek me-in... Yaom lac dom baoh gom nan oh hadah tanjak yau dom baoh gom hu parang pablei yau dom thun dahlau min nyu hu ba bui sambai mai ka dom adei uranaih./.

Urang lang: Jasi -21/9