Pathau mikva saong grauk ayut! Lac urang anek di bhum palei Trà Vinh, sa tỉnh hu 3 bangsa nan lac: Kinh, Hoa, Khmer daok, nan ye dalam luac 60 thun tapa, yaom lac ngak bruk hagiat, ong Thạch Minh Mẫn tuk halei jeng abih hatung hatain ka bruk jum pataom dom bangsa. Lingiu di nan, ong daok lac urang đảng ngak njauk tui jalan tacei ba di Đảng, lac labik pambak tame khang kajap ka labaih 300 ribau bhap bini Khmer di Tra Vinh. Kadha vak di Sa Oanh, urang vak di Rayo sap ndem Viet Nam hu khan ka ong Thạch Minh Mẫn nan:

Dom thun gah Meraong negar daok dalam kateik greik dikol khamang,  yau dom dom likei dam bangsa Khmer karei, 14 thun Thạch Minh Mẫn hu maik ame ba payua tame baha ngak bhik saong bac akhar huroh di baha Đom Bong Pét xã Đôn Châu, huyện Trà Cú. Min karei jang dom ayut sahabat, Thạch Minh Mẫn tuk halei jeng caong khin dom bangsa adei sa-ai thau jum pataom gauk saong thei thei jeng hu bac da-a, hu ngak tui agama di drei. Yau nan ye, yaom lac daok dalam baha min Thạch Min Mẫn halan hatian tame ngak bruk ka cách mạng, taduan bruk lang tapa sap Khmer, in harak tài liệu pathau khan, điều lệ đoàn bloh loa payua ka taong abih dom baoh baha Khmer dalam tỉnh. Thun 1960, dalam sa mabng đấu tranh chính trị ong njauk kol khang mang chap, brei luai ngak bhik saong meng nan ong tame ngak cách mạng, ngak bruk kandauk dalam bhum urang bangsa takik tuk nan umo birau 18 thun. Ong Thạch Minh Mẫn brei thau:

"Hadei di tuk tame tổ chức, dahlak hu brei bruk nao jak ba, langyah, khan ka mikva phật tử, acar Khmer thau ka bruk kateik greik di rajaei Ngô Đình Diệm, parabha dom bangsa, oh brei ka dam dara Khmer tui agama, oh hu bac akhar huroh Khmer. Yau nan, bhap bini Khmer, Kinh, Hoa njauk dang tagok mesruh veik”

Dalam tukvak ini, kol khamang kateik greik khang bruk dang tagok di bhap bini saong duah mek dom urang lin cách mạng, taong tayak dom labik cơ sở min hu bruk pacang padauk di bhap bini gam saong bruk tacei ba di tổ chức, nan ye Thạch Minh Mẫn daok pataom hu phật tử saong sư sãi Khmer tagok tỉnh trun jalan, ndok kol khamang peih palao ka dom acar; dom urang anit taneh ia njauk kol nyu mek caik guk saong brei hu tự do ngak bruk agama, hu bac akahr huroh Khmer tui hatai…Oh lac dang tagok mesruh gah chính trị, ong daok pambuak bruk saong kapul du kich palei pan phao nao taong tayah rilo đồn, bót di kol khamang. Ong Trầm Hoàng Chương, sa urang taha dahlau diah ngak cách mạng brei thau:

“ Tuk mesruh metak ong Mẫn nan lac urang jakar Khmer  nao dahlau  dalam bruk jak ba bhap bini dang tagok taong My; jak ba padang ngak cơ sở cách mạng dalam bhap bini, jak ba bhap bini  pambuak bruk saong bol lin.

Hadei di harei gah meraong negar hu peih paha, ong Thạch Minh Mẫn hu ngak rilo bruk praong karei di gauk, yau Phaok akaok UB bhap bini ban sit, Akok Mat tran negar Viet Nam tỉnh Trà Vinh…mbiah tal tuk padeih hưu. Yaom lac daok di labik halei, ngak bruk hagait, ong Thạch Minh Mẫn tuk halei jeng ba abih hatung hatian ngak bruk ka bhap bini, gam saong dom pakat karja dak padang bhum palei Trà Vinh cak rok patagok. Abih di nyu nan lac, ong hu buh rilo prein yawa dak padang talei jum pataom dom bangsa dalam tỉnh saong cak rok patagok bruk pato pakai ka anek bhik bangsa  Khmer Trà Vinh. Thượng tọa Thạch Oai – Phó akok Kapul jum pataom dom sư sãi anit ranam taneh ia tỉnh Trà Vinh lac:

"Meng tuk tỉnh hu peih paha, ong Thạch Minh Mẫn biak sangka tal bruk bac da-a di anek bik urang bangsa Khmer, abih di nyu nan lac dom ong bhik. Ong kakei dom gah chức năng saong baha, ba mbuan lagaih ka dom sư sãi hu bac akhar huroh Khmer, bac hukum agama saong bac phổ thông."

Luac rai ba abih prfen yava hatung ka bruk cách mạng, bruk jum pataom dom bangsa, ong Thạch Minh Mẫn hu Ndang, Karja pok brei rilo huân, huy chương yau ye Huân chương Giải phóng hạng ba, Huân chương Kháng chiến hạng nhất, Huân chương Lao động hạng nhì, Huân chương Jum pataom bangsa, Huy hiệu 40, 50 thun Ndang…Yau nan min, bruk bo ong caik hatai saong mboh hadah mbaok meta di abih, nan lac raidiuk di mikva urang bangsa Khmer dalam tỉnh dak harei dak salih birau saong sa hatung hatai nao tui Ndang:

"Anak meta mboh lac, di Trà Vinh urak ini, bhap bini Khmer khik ramik hu ilamu bangsa drei, hu ngak bruk agama, bruk ngak mbang ngak huak jeng ye bruk bac da-a hu paglaon. Bruk nan yau brei mboh lac, tok hu Ndang cộng sản Viet Nam meng daong ka mikva tabiak truh kan kathaot, saong hu raidiuk yau harei ini."

Thun ini, yaom lac umo 73 thun min ilamu bac megru hu, meng angan je dalam bhap bini, dalam Ndang, ong Thạch Minh Mẫn jeng daok rik daong ka bruk jum pataom dom bangsa, saong hatai caong khin rik tame dak padang Trà Vinh dak harei dak patagok. Ong yau kareih camin urang Ndang bangsa Khmer tuk halei jeng ba abih hatai ngak bruk kayua bhap bini, kayua taneh ia./.