Di xã Hòa Hội, huyện Xuyên Mộc, tỉnh Bà Rịa vũng Tàu, hu amuk Nguyễn Thị Hiên -  sa urang kumei dahlau diah ngak thanh niên xung phong thau patagok hatai kham merat yam tapa kan kandah ngak kinh tế naih jioi, jeng sa dalam dom kareih camin hadah di huyện Xuyên Mộc. Daa mikva saong taong abih gauk nao taom amuk  Nguyễn Thị Hiên, urang kumei dahlau diah ngak thanh niên xung phong. 

Amuk Nguyễn Thị Hiên tame ngak thanh niên xung phong meng thun 1978, thun 1980, amuk mai veik palei ngak dalam ngành y di tỉnh Hải Dương. Dalam tuk kinh tế kan kandah, jien bilan oh ginup ka baoh sang di drei cai pandar, thun 1990, amuk Hiên likau padeih bruk bloh tui pasang tame gah Meraong padang mbang angui di palei 5, xã Hòa Hội, huyện Xuyên Mộc, tỉnh Bà Rịa Vũng Tàu. Bruk padang mbang angui di sang amuk hu peih tabiak meng sa sào taneh kayua nông trường huyện Xuyên Mộc brei piah pala drak. Meng mblang taneh ini, sang amuk Hiên peih bruk ngak padai. Meng tari taring iek glang nan ye phun padai tamuh siam brei năng suất glaong, yaok vụ yuak hu meng 3 tạ meteh tal 4 tạ padai. Patak pataom hu hasit phun jien meng bruk ngak padai, tuk taneh riya dang yaom, sang amuk blei hu  2 ha taneh di mikva daok jaik taphia piah peih prong mblang taneh ngak padai. Taphia di nan, amuk blei sa sruh mac chai piah chai padai mbang pah ka mikva dalam palei. Tal thun 2008, pachreih tui bruk pasalih janih phun pala, pataom tame patagok phun, anek hu yaom glaong, sang amuk ba abih taneh ngak padai tapa ngak danao raong ikan chép, ikan rô phi rilo piah pablei. Urak ini, thun halei sang amuk jeng pablei hu 2 mbang ikan, yaok mbang jaik 60 tấn, jien mek tame kuhria rah tapa hu 300 triệu đồng. Amuk Nguyễn Thị Hiên  khan lac:  Dahlak menek tabiak saong prong tagok dalam sa baoh sang kan kathaot, nan ye dahlak tuk halei jeng tari tareng, patak pataom, kham merat yam tagok. Ngak luac harei, tuk hành chính drei nao ngak pah ka dom urang hu ralo taneh, langiu di tuk nan drei mai caoh hamu, ngak bruk sang piah hu jien raong anek. Dahlak hu klau urang anek jeng hu nao bac abih. Dua diuk pasang tok pambak tame palak tangin, pren yava di drei piah ngak mbang, patak pataom.”

Oh lac raong ikan saoh, sang amuk Hiên daok hu pala 4ha phun tràm pablei ka bruk padang ngak di palei, saong daok brei pah hồ bơi. . Tapa nan gam daong ka sang hu jien mek tame, gam daong ka anek saih tiểu học dalam huyện thau caluai aia, patrun bruk mblung aia di anek saih dalam palei. Ong Phú Văn Ngợi – pasang amuk Hiên brei thau: Jalan ngak di gah pato megru nan lac pato pacang mblung aia ka anek saih. Mboh yau nan, drei hu hasit phun jien ye drei buh tabiak ngak bruk ini  piah daong ka palei gah ilamo văn hóa xã hội saong piah daong patrun bruk mblung ia ka dom ranaih”.

Oh lac ngak kaya meda ka sang di drei saoh, amuk Hiên daok halar hatian brei 100 m2 taneh di sang drei piah karja palei peih prong jalan nao mai dalam palei, kham merat daong ka mikva kathaot dalam xã phun jien, pajeih anek raong, phun pala piah ngak mbang yam tagok dalam rai diuk, padang ngak palei pala bahrau. Amuk Trần Thị Thiệt – Phaok akaok Kapul urang dahlau diah ngak thanh niên xung phong huyên Xuyên Mộc, tỉnh Bà Rịa Vũng Tàu lac: Meda lac sang biak kham merat, meng palak tangin saoh bo ngak hu yau nan. Meng blaoh, kapul urang nong, huyện hội jeng hu pok panuac tagok Trung ương hội likau pok brei ka sa-ai angan lac urang nong ngak mbang naih jioi pakat Trung ương. Meda lac, dalam huyện drei tok hu sang sa-ai lac thanh niên xung phong ngak mbang naoh jioi, anek bik jeng manuac jeng urang, dom anek di sa-ai  jeng  ngak bruk karja.

Patagok bruk yam tapa kan kandah dalam dom thun bilan mesruh metak di sa urang kumei dahlau deih ngak thanh niên xung phong, urak ini, amuk Nguyễn Thị Hiên jeng daok kham merat ngak bruk, patagok kinh tế baoh sang, hu mbaok tame dom bruk ngak pah hala di palei, njauk lac kareih camin urang kamei hadah krah di xã Hòa Hội, huyện Xuyên Mộc, tỉnh BRVT./.