Huyện Chợ Gạo-tỉnh Tiền Giang hu laba glaong, rai diuk grap tanat meng thanh long pala njauk, pablei hu yaom

Huyện Chợ Gạo-tỉnh Tiền Giang urak ini hu peih prong mblang taneh phun mbang baoh jaik 9.400 ha, tagok labaih 1% dut haong tukvak ini thun 2020; dalam nan, phun thanh long meblah tal 7.414 ha, daok veik lac kruac bhung kalik hijao, phun mbang baoh karei…

Thanh long Chợ Gạo hu jaik 20 tấn baoh/ha. Meyah paik baoh di tukvak ini, yaok ha urang nong mek tame hu 500 triệu đồng, kaoh abih phun jien buh tame ngak, daok laba hu jaik 300 triệu đồng. Dom baoh sang ngak naih jioy meda mek hu labaih 30 tấn/ha, jien mek tame hu labaih 750 triệu đồng/ha, kaoh abih phun jien buh tame ngak, daok laba hu jaik 500 triệu đồng.

Sa-ai Nguyễn Thị Nhỏ daok di xã Tân Thuận Bình, huyện Chợ Gạo daok pala jaik 1,5 ha thanh long brei thau, yaom thanh long hatai bhong urak ini hu urang pablei salih mai blei di bein yaom jaik 25.000 đồng sa kg tui yaok labik. Tui yaom ini, urang nong laba hu labaih 15.000 đồng/kg. Yau nan, baoh sang sa-ai bahrau paik hu jaik 3 tấn baoh, mek tame hu 75 triệu đồng.

Tui ong Lê Văn Hai daok di xã Tân Bình Thạnh, Chợ Gạo, meng bilan 11 thun dahlau tal bilan 4 thun hadei, thanh long Chợ Gạo daok tame bilan karei. Dalam bilan ini, urang nong pandar ilamu kỹ thuật truac menyek gom saong mong iek piah ka phun tabiak baoh tui hatai caong khin, bhian pablei hu yaom jang klau mbang bilan di thanh long. Tukvak daok veik dalam thun lac bilan di thanh long, bhian laik yaom kayua njauk haong tukvak paik baoh di dom janih phun mbang baoh karei di Bhum taneran kraong Cửu Long.

Tuk ini, jaik abih urang nong bhum pala thanh long Chợ Gạo pandar ilamu kỹ thuật truac gom menyek, ngak ka baoh tabiak karei bilan piah paglaong yaom kaya nong di puk palei, doang ka mikva hu jien mek tame glaong, grap tanat rai diuk.

Tui urang pal akaok huyện Chợ Gạo, dom thun tapa, huyện Chợ Gạo sangka tal bruk salih janih phun pala, peih prong taneh phun mbang baoh ba mai kein laba glaong, padang dom bhum pala brei sản lượng prong piah pablei tabiak negar langiu. Langiu di nan, pandar samu gauk ilamu công nghệ dalam bruk pala drak piah hu rilo baoh, saong paglaon chất lượng pandap panda, khik siam mekre ka pren yava saong alam môi trường.

Urak ini thanh long Chợ Gạo hu Cục Sở hữu trí tuệ pabak brei bảo hộ angan je kapul nyaom. Di bhum pala, hu padang dom hợp tác xã saong tổ pambuak bruk pataom hu urang nong, pato pathram, ba brei ilamu kỹ thuật pala drak tui jalan GAP brei tabiak pandap hacih sa-at saong brei thau hu asal di nyu, patagok bruk meyaih khan pandap panda saong duah labik pablei tabiak ka pandap panda kaya nong…

Thun 2021, piah cak rok patagok kein laba bhum pala, huyện Chợ Gạo daok peih ngak Danak dak Patagok phun thanh long tal thun 2025 jeng yau ba tabiak jalan ka urang nong ngak tabiak saong chứng nhận VietGAP, GlobalGAP ka phun thanh long Chợ Gạo piah paglaong pren meriak gauk di phun pala angaok darak pasar dalam saong langiu taneh aia./.

Urang lang: Jasi – 26/04