Thanh Pháp takre daoh meng tuk daok sit, abih di nyu lac dom ragu daoh bhap bani Cam

Thanh Pháp takre daoh meng tuk daok sit, abih di nyu lac dom ragu daoh bhap bani Cam yau njaom tame dalam sa-ai meng rai diuk yaok harei di palei Châu Hanh, xã Phan Thanh, huyện Bắc Bình. Labik nan lac palei di sa-ai kak kajap haong umo ranaih jangaih hijao, ilamo bhap bani Cam hu raong ba hatung hatai sa-ai meng sit tal tuk prong jeng dam. Tapa sap daoh Thanh Pháp, rilo kadha daoh hu nao tame hatung hatai manuac urang yau: Thánh địa Mỹ Sơn, Mai rivang bimon kalan, Mek jan, Payua anai bingu Chăm Pa… Langiu di daoh takơ, Thanh Pháp daok nao tal dom urang thau taong ghi-năng piah bac taong ginang saong cih vak gilac dom ragu ragam bhian randap bhian pandar di urang Cam dalam dom harei rija roya.

Hadei di tuk hu daong palaghaih piah bac salah tal thanh nhạc 1 thun di Nhạc viện bal raya Hồ Chí Minh, Thanh Pháp patui veik bac đại học gah sư phạm âm nhạc jeng di nhạc viện ini. Meng hu sap daoh po brei biak karei, Thanh Pháp tuk halei jeng hu daa nao hu mbaok dalam dom danak dak daoh tamia prong di Sang daoh Ca múa nhạc Việt Nam, Kapul Nghệ thuật Quân khu 7. Abih di nyu lac, Thanh Pháp hadah mbaok meta hu Sang daoh Ca múa nhạc Việt Nam daa nao daoh dalam dua mbang Nyaom roya Đảng pakat negar mbang ka 11 saong mbang ka 12. Tapa yaok danak dak parang me-in, sa-ai caik veik rilo siam gheih dalam hatai urang maong iek. Dalam mbang ndom biai nao mai haong nhạc sĩ Đinh Trung Hà, Phaok Kapul Nghệ thuật bhap bani Cam Bình Thuận, daok dalam Sang daoh Ca múa nhạc Biển Xanh, tuk sua tangi tal ca sĩ Thanh Pháp, sa-ai tuk halei jeng taong yaom glaong ka sap daoh saong hatung hatai, jalan diuk rai siam mekre di urang daoh ini: “Thanh Pháp nan lac sa sap daoh biak karei, ndung bak ilamu bangsa Cam biak gheih,  tuk halei jeng abih drei ka nghệ thuật. Langiu di ragu ragam Cam, ye nhạc bolero, trữ tình jeng lac pren khang di urang daoh ini, sap daoh di Thanh Pháp biak karei yau dom urang daoh daneiy angan  Chế Linh, Giang Tử… sa vaktu, biak dui pachreih urang pang”.

Oh lac jak jeng gah daoh takơ angaok sân khấu, Thanh Pháp daok gheih paneh kadha daoh. Meng thun 2008 tal ini, sa-ai paneh hulabaih 22 kadha daoh ndung bak ragu daoh bhap bini Cam yau: Bắc Bình khúc hát tình quê, Mai rivang bimon kalan, Xương rồng đất tháp, Ký ức Ka-tê... Langiu di dom kadha daoh ndung bak ilamo Cam, kadha daoh di sa-ai paneh daok hu hatai anit ka palei negar: thaik binguk kraong Cà Ty, tasik Cà Ná, Sang bac Dục Thanh... ngan haong ragu daoh njuan njac, lai la-an hu gah chuyên môn taong yaom glaong. Saong bahrau ini, kadha daoh Giấc mơ Shiva, kayua Thanh Pháp paneh hu Hội đồng nghệ thuật Giải thưởng Dục Thanh mbang ka V-2017 pok brei giải B. Kadha daoh ini daok hu brei giải B di Liên hiệp pakat negar dom Hội Văn học Nghệ thuật Việt Nam.

Dom harei ini, Thanh Pháp haong dom adei sa-ai dalam Kapul daoh tamia bhap bani  Cam Bình Thuận daok kham merat padang ngak dom danak dak bahrau piah nao parang me-in duh ka bhap bani bhum atah bayah, bhum urang bangsa takik. Sap daoh di urang likei Cam ini daok par atah jang di gruak dom puk,palei.

Meng hatai takre gam haong abih drei ka bruk ngak, urang daoh Thanh Pháp mek hu rilo jak jeng siam mekre angaok jalan nghệ thuật./.

Urang lang: Jasi – 04/04