Thua thien Hue diuk meng bruk menyim Zeng di A Luoi

Pathau mikva saong grauk yut !

Meng dom rai ini mai, urang Tà Ôi di huyen bhum ceik A Lưới, tỉnh Thừa Thiên-Huế kak kajap saong bruk menyim zèng. Dalam sa tukvak suai livik, bruk ngak mengkan ini daok lahik nao. Bahrau ini huyen A Lưới kham merat pasiam veik bruk menyim zèng, daong ka bhapbini khik ramik ilimo mengkan, ba bruk ngak tani tanat ka bhapbini. Kadha vak di Lê Hiếu, daok di bhum kreh negar.

Bruk menyim zèng daok ieu lac menyim khan bai hu maong lac bruk ngak praong mengkan di urang  Tà Ôi di huyen bhum glaong A Lưới, tỉnh Thừa Thiên-Huế. Dom thun jaik di ini, bruk menyim zèng di urang Ta Oi daok takik, tok hu takik urang daok khik adat pandar pandap menyim  zèng ka drei saong ka menuac urang dalam sang. Tukvak tapa, urang Ta Oi duah jalan tabiak trun kan kathaot meng bruk padang veik bruk menyim zeng. Urang hu rilo suh sah dalam bruk khik ramik bruk menyim zeng mengkan lac nghe nhan Mai Thị Hợp. Amuk Hop hu padang xuong menyim, jak ba, pato bruk ka dom urang kumei oh thau menyim, meng di nan, bruk menyim zeng di A Luoi dak harei dak hu pasiam veik. Drei ngak yau halei piah duah hu darak pasal ka adei saai, blaoh drei pablei hu pandap. Duah hu labik pablei tabiak lac drei uan tabuan lo, gam ba bruk ngak ka adei saai kan kandah, gam khik hu ilimo di drei.

Dalam dom thun tapa, So ilimo, padhih saong du lich tinh Thua Thien Hue pambuak saong huyen A Luoi peih ngak dom danakdak ramik pasiam bruk menyim zeng ka urang kumei meng danakdak patrun kan kathaot gah kreih negar. Meng di ini, pandap di amuk hu labik dang di darak pasal. Saai Lê Thị Kim Thoại, daok di xã Nhâm, huyện A Lưới brei thau, sa blah pandap pablei hu 300 rabau dong tal 1 trieu meteh, kuhria rah tapa yaok bilan yaok urang mek tame hu meng dua tal 3 trieu dong.

(Drei ngak bruk menyim ini piah khik bruk menyim mengkan di Ta Oi kol drei, oh klak hu. Harei halei jeng menyim, tuk halei drei hu pandap ngak tabiak ye drei pablei.)

Urak ini, di huyen bhum ceik A Lưới, dom kapul menyim zeng hu padang tagok di dom xa Phú Vinh, xã Nhâm saong ban sit A Lưới. Dom adei saai bangsa Co Tu, Pa Kô, Vân Kiều… jeng tui mai bac bruk menyim zèng di bhapbini Tà Ôi. Ong Nguyễn Mạnh Hùng, Phó akaok uy mban bhapbini huyen A Lưới, tỉnh Thừa Thiên-Huế ndom lac : Bruk khik ramik saong patagok yaom glaong ilimo bangsa saong khik ramik dom palei ngak ye biak sangka tal menyim zeng di bhapbini bangsa takik. Kayua menyim zeng di A luoi, abih di nyu nan lac menyim khan bai nan lac sa bruk gheih di ilimo A Luoi tapa bruk ini caong khin cakrok du lich gam cakrok kinh te.

Bruk gheih mekre saong biak karei di menyim zeng lac urang menyim hu ba athar nhuk tame tapak pandap menyim salih ka jhik tagok. Ini lac jalan ngak tabiak bingu la meng athar nhuk, oh ngak bingu la meng talei mrai yau menyim khan bai di dom labik karei. Yau nan ye, pandap ngak tabiak meng zeng hu rilo urang takre. Langiu bruk pablei ka dom puk palei mengkan dalam tinh, khan bai di urang Ta Oi daok hu pablei tapa dom tinh jaik taphia saong pablei tabiak taneh ia langiu. Dom kapul menyim zeng di dom palei kreh Truong Son jeng lac labik bo tuai damuai dalam saong  lingiu taneh ia padheih takai piah pasang iek, duah thau tuk mai tal A Luoi.  Phó Giáo sư, Tiến sĩ Nguyễn Văn Mạnh, urang roh duah gah dân tộc học brei thau, pandap zeng ndung bak rilo yaom glaong ilimo di bangsa Ta Oi, hu thử thách saong daok veik meng rabau rai mai, min njauk sahaneng tal loi ich kinh te, tuk nan pandap zeng meng daok veik hu saong thun bilan: "Dalam tukvak yau urak ini, tuk dom inem krung ilimo vat the saong phi vat the dak harei dak lahik kayua bruk cong nghiep hoa, hien dai hoa, anak bruk ngak mbang kinh te darak pasal njauk ndom lac bruk menyim zeng saong dom pandap zeng hu caik veik sa inem mek gheih mekre di bangsa Ta Oi jeng yau dom bangsa Truong Son.

Bruk brei padang veik bruk menyim zeng mengkan pagam saong cakrok du lich bhapbini di huyen bhum ceik A Luoi, tinh Thua Thien Hue dalam dom thun tapa, gam rik daong khik ramik ilimo mengkan gam daong ka urang kumei Ta Oi patrun kan kathaot meng bruk ngak mengkan di bangsa drei. Urak ini, So ilimo, padhih saong du lich tinh Thua Thien Hue daok padang ngak ho so khik ramik saong patagok yaom galong menyim zeng di urang Ta Oi, piah ba tagok mintri ilimo, padhih saong du lich pasang iek ba tame angan ilimo inem krung phi vat the di taneh ia./.

Thúy Linh