Thun ni, boh sang ranaih umo di saai Hồ Anh Đoan urang bangsa Cơtu mbang tết dalam bui sambai dalam boh sang khang kajap di palei dam dara padang mbang ngui dok dang, xã Hương Phong, huyện A Lưới. Saai Đoan brei thau drei dok di xã A Ngo, huyện A Lưới, min kayua kurang taneh pala drak, yau nan ye tuk hu danak dak palei dam dara padang mbang ngui ye drei hu mbaok chip. Sang saai Đoan hu brei 2000m ² taneh dok song taneh bein, 20 triệu đồng dong di dân tái định cư, 2ha taneh glai song phun pala, anek pajaih piah rong glang ngak mbang pala drak.

Băng: Tuk camereip tagok labik ni jeng kan kandah min hadei di 2 thun nan lac tani tanat ye, ngak sang danok ginup abih. Dut song langiu xã A Ngo ye drei oh hu taneh piah pala drak ye tame ni drei hu taneh piah ngak mbang pala drak. Taneh pala drak jeng hu siam jang, lagaih jang. Ndua darphol Mban khik ramik hu dong ka adei saai palei dam dara padang mbang ngui mai ni ngak mbang piah tani tanat suai lavik ka rai duik harei hadei ni.  

Dom urang di palei dam dara padang mbang ngui dok dang huyện A Lưới, langiu dom anai kamei, urang likei bangsa Tà Ôi, Cơ Tu, Pa Cô, dok hu dom dam dara meng dom huyện di bhum taneran gam ngak mbang duik rai. Urang biak tari tarieng, kham merat peih prong taneh padang mbang ngui di bhum taneh bahrau. Saai Đào Đình Hiếu, oh padauk hu bruk bui sambai khan lac. Boh sang adei dok di xã Sơn Thủy, huyện A Lưới. Tuk tok duik, dua haduik pasang khang hatai palih ruah palei dam dara padang mbang ngui A Lưới ngak labik padang rai duik mbang ngui suai lavik. Tui jalan mek katut rong atah, urak ni sang saai Hiếu hu labik dok siam mekre song sa boh sang padang ngak khang kajap, 2 ha cao su dok tamuh siam gam song tapon menuk ada athur rong. Urak ni dalam boh sang trei sil di dua haduik pasang hu ginup dom janih pandap panda yau: radeih mac, tivi blei hu meng pren ngak di dua haduik pasang ngak tabiak.

Palei dam dara padang mbang ngui huyện A Lưới, hu hu padang tagok di 3 xã Hương Phong, Hồng Phượng song Phú Vinh, song taneh prong abih tih labaih 4.200ha, rilo meng lac taneh dok song taneh glai. Hadei di 2 thun padang palei, tal urak ni hu 46 boh sang ranaih umo hu dong padang mbang ngui. Dom danak dak padang cơ sở hạ tầng song jalan mbak nao mai, ia pandar, bilai iek ruak, sang sinh hoạt bhap bini, pabak dom hatai cong khin di dam dara. Ong Phạm Duy Cường, akaok danak dak palei dam dara padang mbang ngui huyện A Lưới brei thau:        

Băng: Meng di tuk padang danak dak bhum taneh di labik ni lac taneh bilau oh ka  hu urang halei peih taneh pamong tal jalan patagok kinh tế glai gam song bruk dong palagaih di mban khik ramik danak dak jang yau patagok bruk ba akaok nao dahlau di urang ranaih umo padang rai duik. Urak ni peih prong taneh hu 80ha rilo meng lac pala glai, taneh dok song taneh bein. Hu siam mekre yau harei ni meng bruk kham merat  di dom boh sang.

Meng sa bhum taneh bilau tok hu dom phun tang, urak ni meng palak tangin song pren ranaih, thaik thaot sa palei dam dara ginup meda di huyện A Lưới, tỉnh Thừa Thiên Huế hu padang tabiak. Sa rai duik bahrau hu tamuh tabiak di tapen jalan Hồ Chí Minh./.  

Biên dịch -Hanipha