Tal urak ini, jaik abih dom tỉnh, ban jeng daok khik hu dom bruk sản xuất

Maong rah tapa, tui Rajaei, thun 2021 dom bruk praong jeng daok khang kajap, dom khik piah ngoại hối tagok glaong; jien padai tani tanat, lạm phát jeng daok dalam pasang iek hu…Việt Nam lac taneh ia duy nhất angaok dunya hu abih 3 kapul dak angan njauk caik hatai jia, lac Moody’s, Standard & Poor's saong Fitch brei patagok tanut triển vọng meng “tani tanat” tagok "siam mekre" kuhria meng tuk jit praong tamuh tabiak. Dalam gah du lịch, Việt Nam daok hu World Travel Awards pok angan lac “labik nao tal dang akaok châu Á” yau thun 2018, 2019; dom labik hu pok angan lac “Labik nao ravang me-in khang kajap dang akaok châu Á”, “labik ravang iek dang akaok châu Á”, “labik nao tal  ban ilamu dang akaok châu Á” saong Mblang bein negar dang akaok châu Á.

Dom jak jeng nan hu meng bruk tacei pato, ba tangin tame bruk di abih hệ thống chính trị; bruk salih jalan meng gam pan akaok, tacei pato, gam parabha bruk, parabha pakat, parabha quyền, mek rahra ngak pasak lac labik pacang, caga saong jhul kadun likuk jit ruak; peih ngak samu gauk, hu siam lagaih dom jalan ngak gah y tế meng bruk dut iek, taong ruak, trun menuac metai lahik, klauk vaccine, khik kajap bruk hu taom gaok y tế di bhap bini meng aval, meng atah, meng labik daok; khik kajap padai brah pandap mbang menyum ka rahra, oh caik ka urang halei kurang mbang, kurang cuk; khik ka rahra sahanang hatai, khik ka puk palei siam mekre, sron mbon; khik ramik, ieu da-a, pathau khan, jak ba saong ieu pataom rahra tame bruk pacang caga jit ruak.

Tapa nan dak brei mboh makna praong jang tuk kol drei pacang caga jit dalam tuk rilo janih pandap panda, thiết bị y tế, abih di nyu lac jru, vaccine dalam taneh ia ka oh hu atau oh ngak hu, njauk blei meng negar langiu tame dalam tuk nyu daok kurang rilo angaok dunya.

Tui dự thảo Danak dak pasiam saong patagok kinh tế hu padang ngak tui jalan ba tabiak di Sarak ka 16/2021/QH15 ka bruk patagok KT-XH 5 thun 2021-2025, haong "jalan ngak ginup khang", "tukvak ginup atah", "praong ginup praong", Việt Nam brei pataom tame patagok prein khang y tế, an sinh xã hội, daong ka doanh nghiệp, HTX, baoh sang, jhul khang bruk karja buh jien tame ngak saong salih bahrau bruk ngak harak gar, piah diukrai hu lagaih, siam mekre, salamat, sami samar, pasang iek hu siam jit ruak COVID-19, khik hu siam di abih prein yava, plaih metai lahik di bhap bini, gam haong nan, pambak tame siam dom jalan lagaih piah jhul patagok bruk pasiam saong patagok KT-XH khang kajap jang, haong patagok GDP meng 6 - 6,5%, prein tagok CPI kuhria rah tapa hu 4%; pandar cai kadung jien karja rilo jang jien mek tame jaik 4% GDP... dalam thun 2022.

Thau cambaih Sarak ka 105/NQ-CP harei 9/9/2021 di Rajaei ka bruk daong doanh nghiệp, HTX, sang pablei salih dalam tuk jit COVID-19 meda dui atah, dom bruk njauk ngak, dom jalan ngak saong dom sarak daong patagok njauk sangka pambuak tapak haong bruk rah tabiak srau kadau di jit ruak. Pataom tame daong meng harak gar tal bruk brei mesraiy, jien padai, cakak trun jien buh tame ngak, lang talaih kan kandah ka jien padai, pok jien brei ka doanh nghiệp, HTX, sang pablei salih. Patagok bruk pandar công nghệ, jhul patagok bruk số hóa saong tự động hóa; salih bahrau sarak patagok saong pambuak bhum, labik kinh tế saong kinh tế đô thị; parilo janih pandap pablei tabiak negar langiu, pabak ginup saong pambak tame dom siam lagaih bahrau meng dom Hiệp định pablei salih saong dom bruk ngak kinh tế bahrau, khik kajap bruk ngak tabiak pandap panda, pajeng ba mbuan lagaih, tani tanat, kein laba, hu mbaok tame dalam jang bruk buh jien tame ngak mbang, pablei salih saong pabak pandap angaok dunya tui jalan pambak tame siam labik dang đối ngoại khang kajap saong labik nao tal dang akaok dalam Đông - Nam Á ka dui pachreih FDI, jhul khang bruk pablei tabiak negar lingiu nao gam haong pablei dalam taneh ia. Pambuak gauk siam mekre meng bruk cakrok kinh tế haong bruk ilamu, xã hội; patagok yaom glaong ilamu, anek menuac Việt Nam; khik kajap an sinh xã hội; paglaong prein ngak gah y tế, paglaong bruk eng drei ngak po, prein pacang, caga, palagaih piah pasiam veik saong patagok kinh tế dalam tuk siam mekre bahrau.

Bruk ngak hu saong meda ngak hu pasiam veik kinh tế meng praong tal sit, anak meta saong suai lavik daok mai meng bruk samar tacei pato, bruk pambuak gauk siam mekre dom jalan ngak meng taong abih dom pakat, dom gah dalam hệ thống chính trị jeng yau meng bruk kham merat, tui njauk jalan taneh ia pasang iek, palagaih suai lavik haong jit ruak saong meng prein khang eng drei yam tapa dom kan kandah, tavak tavaiy di yaok puk palei, yaok rahra saong doanh nghiệp./.

Urang lang: M. Phương – 01/01