Tết tal Xuân mai lac tuk amaik ame, adei sa-ai, gauk gar pataom mbaok tapen gauk piah taduan raok melam giao thừa. Min di labik biên cương di taneh ia, dom urang lin biên phòng jeng daok pan kajap tangin phao khik caga taneh ia, khik caga sron mbon ka bhap bini bui sambai mbang Tết. Lingiu di nan, dom sa-ai daok kham merat hu mbaok tame dom bruk ngak piah daong ka bhap bini kan kathaot di labik biên giới hu mbang tết dalam bui sambai, chreih chrai, kak kajap jang talei rohim di bol bala saong bol bhap rahra. Kadha vak di Đoàn Sĩ, urang vak di rayo sap ndom VN daok di ban raya HCM hu ndom tal bruk nan, da-a mikva saong taong abih gauk tui pang.

Đồn Biên phòng Đắc Quýt dok atah di pasak huyện Bù Đốp, tỉnh Bình Phước yaok pluh ki-lô-mét. Kayua jalan nao mai kan kandah, khin tagok Đắc Quýt abih yaok tuk. Dom harei ni, phun mai dalam bein bingu cảnh di đơn vị daok rak bingu takam kanyik, ngak chreih chrai jang bruk uan raok thun bahrau di dom urang lin biên phòng. Đại úy Nguyễn Văn Anh – Trinh sát viên Đồn Biên phòng Đắc Quýt brei thau: Thun ni lac thun cemeraip hulin taduan raok tết di tỉnh Bình Phước, Tết ni oh mai sang hu, min hu bruk sangka di mban chỉ huy đồn, adei saai urang lin dalam đồn hu dong ka di urang jakar urang lin dom bruk me-in sambai, doh tamia, me-in thể thao piah daong ka adei saai hu mbang tết bui sambai. Meng nan ngak siam bruk khik caga chủ quyền an ninh tapen negar.

Hu brei bruk khik iek jalan tapen negar haong CPC, dom urang jakar, urang lin Đồn Biên phòng Đắc Quýt tuk halei jeng paglong hatai sangka, bhian nao pasang iek, duah thau, caga pacang kol tội phạm pagam pambak tame harei tết di bangsa piah loa tapa jalan tapen negar. Trung tá Phạm Văn Quỳnh – Chính trị viên Đồn Biên phòng Đắc Quýt, tỉnh Bình Phước lac: Tết thun 2015, Đảng ủy, Ban Chỉ huy đồn jeng hu padang bruk khik caga chủ quyền jalan tapen negar dalam tuk Tết. Mban Chỉ huy đồn bhian nao pasang iek, khik caga jalan tapen negar an ninh chính trị trật tự an toàn xã hội hu khik kajap. Đơn vị jeng ngak siam bruk patagok sx atau dom mô hình yau jalan pasang iek dam dara, iek glang bein phun mbang boh, abih di nyu nan lac bein bingu. Đơn vị jeng hu tacei pato ka mban chấp hành đoàn padang ngak dom mô hình, daong ka urang jakar, urang lin uan raok tết bui sambai.

Lingiu bruk khik caga chủ quyền an ninh tapen negar, dalam dom harei ni, urang jakar biên phòng tỉnh Bình Phước song dom urang ngak pahla hu ba dom pandap tết mai ka dom boh sang kan kathaot urang bangsa takik, boh sang sarak karja dok di labik tapen negar. Amuk Đỗ Thị Bá dok di palei 3, xã Thanh Hòa, huyện Bù Đốp, tỉnh Bình Phước – sa dalam dom boh sang dalam sarak karja bui sambai khan lac: Hu 4 bilan ye, yaok bilan hu 15 kg, mboh dom kamuan jeng anit lo. Dom kamuan lac yaok harei anek huak sa lon meteh brah, piah veik meteh lon brei ka amaik, dok sa lon anek mbang, mehit lac yau nan jeng biak anit. Tết thun halei jeng hu 4 tal 5 ong mai rivang.

Oh lac yau nan saoh, dom urang lin dok caik tukvak trun tal puk palei dong ka bhap bini puh ramik, pasiam veik sang danaok uan raok thun bahrau anek sak pabe 2015 dalam boh sang bahrau padang  dok pahe cur, boh sang ong Thiều Đình Lam song saai Phan Thị Niên - bangsa Tày dok di palei Mười Mẫu, xã Phước Thiện, huyện Bù Đốp, tỉnh Bình Phước brei mboh hatai thau dar phol tal dom urang jakar, urang lin biên phòng. Ong Lam brei thau: Langiu karja palei ye urang jakar biên phòng jeng sangka tal raidiuk di mikva. Pagap yau urang jakar dong pren piah padang sang danaok. Đồn biên phòng jeng hu pambuak bruk song karja puk palei brei mesraiy phun jien piah rong pabe. Tết ni urang jakar biên phòng jeng hu nao rivang song pachreih ba boh sang. Talei rohim di bol bala song bhap bini biak siam.

Ni jeng lac kadha prong piah pambuak pakajap talei rohim bol bala song bhap bini, brei mboh “thế trận lòng dân” dak harei dak khang kajap khik caga biên cương di taneh ia. Thiếu tá Ngô Đại Hiếu – Đồn trưởng Đồn Biên phòng Thanh Hòa, tỉnh Bình Phước khan lac: Pauan thun bahrau đơn vị pambuak bruk song karja puk palei iek glang tết ka mik va kan kathaot. Dahlau di abih lac mik va bangsa takik kan kandah, pambuak song karja puk palei ngak siam bruk “menyum ia hadar halau ia” piah pabak pren khang bahrau dalam thun bahrau ka mik va. Nan ye khol hulin hu jak ba dom đơn vị, urang ngak pahla daong brei piah hu jien,hu pandap brei ka mikva dalam tuk tết anek sak pabe ni.

Lac sa tỉnh hu labaih 260 ki-lô-mét jalan tapen negar haong CPC, dalam dom thun tapa, Bộ đội Biên phòng tỉnh Bình Phước tuk halei jeng paglong pren khang di “thế trận an ninh nhân dân”, khik kajap chủ quyền an ninh jalan tapen negar. Đại tá Nguyễn Văn Phương – Phó Chính ủy Bộ Chỉ huy Bộ đội Biên phòng tỉnh Bình Phước lac: Khol hulin patagok bruk duah thau bruk ngak di kol khamang song kol kanyah jak dalam tuk tết nguyên đán. Hu jalan piah langyah chip oh caik brei bị động, bất ngờ dalam yaok bruk rah tabiak. Kol hulin hu pambuak bruk khang kajap song dom gah công an, du kích song dom ban, ngành jhul pakhang bruk pasang iek, duah thau piah khik kajap an ninh di puk palei.Tacei pato dom đồn biên phòng duah thau cambaih bruk di bhap bini, thau dom boh sang kan kathaot, boh sang dalam sarak karja kan kandah kurang anak kurang likuk dalam tuk tết nguyên đán piah khan ka pakat ủy song karja puk palei caik hatai sangka khik ka bhap bini di labik tapen negar oh eik lipa dalam tuk tết.

Thun bahrau ni, yaom lac dom saai oh hu mai palei mbang tết song amaik ame, diuk anek, gauk gar, min di đơn vị, harei tết jeng hu ấm cúng yau daok di sang, jeng hu ginup pandap mbang yau rilaow pabui, dưa hành, bánh chưng, pei nung. Rilo di abih nan lac hatai anit ranam, jia tame di mik va song karja puk palei brei ka đơn vị, ngak ka dom urang lin mboh bui hatian, tangin phao dak khang kajap jang  di angaok dom canah jalan nao pasang iek, khik caga./.