Bhum taneran krong CL biak lagaih ka bruk du lịch, abih di nyu nan lac du lịch sinh thái pachreih hu rilo tuai damuai mai rivang iek, padeih padei. Akaok thun bahrau, hu rilo janih du lịch saong chất lượng hu pok paglong piah pabak hatai caong di tuai damuai. Nhật Trường urang vak di rayo sap ndom VN dok di bhum taneran krong CL hu kadha vak ndom tal bruk du lịch akaok thun di tỉnh TG song Bến Tre, labik hu bruk du lịch sinh thái patagok.  

Dom harei ni, labik du lịch sinh thái Quê Dừa di ong Trương Văn Hải, xã An Khánh, huyện Châu Thành, tỉnh Bến Tre biak chreih chrai kayua tuai damuai mai rivang, padeih padei rilo jang 3 mbang dut song harei karei. Yaok harei 3 labik du lịch Quê Dừa taduan raok jiak 1000 tuai mai rivang iek, padeih padei song mbang dom janih pandap đặc sản di palei. Langiu di bruk nao ghe, nao đò mac, tuai damuai mai tal labik ni dok hu ndik radaih saih di angaok jalan palei. Ong Trương Văn Hải,  Giám đốc Công ty Du lịch Quê Dừa khan lac:

Tuk tết DN khol hulin hu caga rilo ghe gilai. Urak ni dok ngak dom boh kapan bahrau piah ginup ka tuai tuk tết. Tuk tết tuai biak rilo, labaih 1000 tuai dalam sa harei. Thun ni, tuai hu meng nan tagok, oh takik jang. Bruk du lịch di labik ni ngak tui bilan, drei dok duah dom janih, boh kayau piah pabak ka tuai dalam tuk tết, atau dom janih pandap meng kan yau har, mứt piah tuai mai mbang me-in.

Di dom xã Tân Thạch, An Khánh, huyện Châu Thành, tỉnh Bến Tre dok hu rilo labik du lịch karei hu pok brei angan lac “Labik du lịch hadah krah” di bhum taneran krong CL. Siam di abih nan lac labik du lịch Cồn Phụng dok di sa palao kaoh kreh Krong Tiền, lac sa dalam quần thể tứ linh Long - Lân - Qui - Phụng pambuak pagam haong labaih 30 labik rivang, du lịch tapen krong Tiền di tỉnh Tiền Giang song Bến Tre. Meng harei 2 bingun tal harei 7 bingun tết, di labik ni dok hu danak dak xiếc ảo thuật, nao tàu bay song abih di nyu nan lac hu kapul lân kumei xã Lương Hòa, huyện Giồng Trôm, tỉnh Bến Tre, dalam nan hu dom urang kamei praong thun mai me-in pamơrơ tuai damuai. Amuk Trần Thị Phước, Akaok kapul lân kumei xã Lương Hòa brei thau, rilo thun bloh dom anai ni jeng mbang tết di cồn Phụng, yaom lac atah di sang min hu pamơrơ tuai damuai mai rivang iek mboh biak bui sambai.

Di Cồn Phụng tết ni jeng hu ieu kapul tamnia lân, lac dom anai mai ini jhui klaak. Nan ye khol hulin kham merat padang kapul tamia lân ka siam, adei saai mai ginup piah pamơrơ meng harei 2 bingun tal harei 7 bingun tết. Adei saai biak khin nao, dok ngak bruk bo hu panuac ieu nao nan lac chreih hatai lo.

Langiu di nan, di dom huyện Chợ Lách, Ba Tri, Thạnh Phú song ban sit Bến Tre dok hu yaok pluh labik du lịch sinh thái, bingu kiểng biak mekre piah duh ka tuai damuai. Sa bhum palei krong ribong hu langik tasik siam lagaih song rilo palei ngak meng kan, mai tal labik ni tuai hu mboh di anak meta labaih 20 janih pajaih li-u karei di gauk. Tal Giồng Trôm oh klaak hu bruk nao rivang iek, duah thau palei ngak “Pei racam Mỹ Lồng” “Bánh phồng Sơn Đốc”. Angaok jalan nao Ba Tri,  Mỏ Cày Bắc, Mỏ Cày Nam, Thạnh Phú tuai damuai hu tame rivang iek labik inem krung Nguyễn Đình Chiểu, Đình Phú Lễ; labik pahadar Nữ tướng Nguyễn Thị Định, labik inem krungong Võ Trường Toản, Phan Thanh Giản, du lịch sinh thái Hải Vân,, di labik ni hu Sân chim Vàm Hồ, căn cứ Khu ủy Sài Gòn -Gia Định; sang klak Đại Điền; labik inem krung cách mạng “jalan Hồ Chí Minh angaok tasik”...

Di tỉnh Tiền Giang tuk akaok thun hu rilo labik pachreih hu rilo tuai damuai mai rivang iek, padeih takai yau: labik raong ula Đồng Tâm, huyện Châu Thành, Baha Vĩnh Tràng, labik du lịch sinh thái cồn Thới Sơn, ban sit Mỹ Tho, labik du lịch sinh thái - padeih padei xã Đông Hòa Hiệp, huyện Cái Bè; labik khik ramik sinh thái Đồng Tháp Mười, huyện Tân Phước; tasik Tân Thành song dom inem krung sajarah dak rai - ilamu hu angan je dok dalam tỉnh yau Khu di tích Chiến thằng Ấp Bắc, Chiến thắng Ba Rài, huyện Cai Lậy; khu chiến thắng Rạch Gầm- Xoài Mút, huyện Châu Thành; labik khảo cổ Gò Thành, Chợ Gạo song Lăng Hoàng Gia, dom boh sang klak jiak 200 thun di ban sit Gò Công. Ong Nguyễn Minh Thông, Phó Giám đốc Công ty Du lịch xanh, pulao Thới Sơn, ban sit  Mỹ Tho, tỉnh Tiền Giang brei thau:

Pulao Thới Sơn hu bein phun mbang boh, pang doh tài tử, rivang main, blei pandap. Cồn Phụng langiu di bruk nao rivang di tích Đạo Dừa, meng harei 1 bingun tal harei 7 bingun hu xiếc, ảo thuật, múa lửa, doh takơ piah pamơrơ tuai damuai mai rivang main. Bruk mbang menyum hu dom janih pandap mbang meng kan yau bánh xèo, ikan tai tượng chiên xù, ikan am atau saik mbia chap ikan, cắm trại ka  sinh viên.

Piah ngak ka tuai damuai njauk hatai tuk mai tal jeng ye tuk nao veik, dom gah chức năng tỉnh Tiền Giang song Bến Tre hu peih dom kapul nao tui iek bruk ngak du lịch yau : khik siam mekre salamat tuk nao mai angaok jalan takai jeng ye jalan ia, bruk niêm yết yaom harak, yaom jien di dom dịch vụ du lịch...oh caik rah tabiak bruk “ cò” du lịch, ndom biai oh siam song tuai damuai song khik hu siam mekre ka tuai tuk mai me-in tết. 

Hadei di dom glaih glar, jar var haong bruk ngak mbang duah jien, hu ba drei tame dom bein phun kayau halui liar, hu mong iek dom labik mekre di bhum krong ribong, mbang dom janih pandap mbang meng kan di palei song hu dok dalam không khí hacih saat di dom labik du lịch nan, tuai damuai meda mboh lac palei pala biak siam, biak mekre. Tapa nan, var klaak abih dom glaih glar piah yam tame thun bahrau dalam chreih chrai bui sambai song jia tame dom jak jeng daok cang di gah anak./.