Hu harei oh hu urang halei mai tal piah blei harak

Tui padang ngak, Mblang radaih miền Đông bahrau tui kuhria hu 22 jalan radaih pajeng tuai meng TPHCM nao Quảng Trị saong dom tỉnh gah brak. Min dalam dom harei tapa, tuai mai tal mblang radaih biak takik, hu dom urang min, ha harei oh hu urang halei mai blei harak vé.

Tui maong mboh di urang vak di rayo sap ndom Việt Nam, mblang radaih bahrau ini, tok hu bảo vệ saong menuac ngak di mblang radaih. Labik radaih pataok cang tuai, hu tuk oh hu sa sruh radaih halei, oh hu binguk di sa urang halei. Dom radaih buýt pambuak haong Mblang radaih miền Đông bahrau, yau: radaih ka 55, 76, 93 jeng joa menuac, mboh yau radaih saoh.

Amuk Nguyễn Thị Kiều Sương, Phó Giám đốc Hợp tác xã radaih pajeng tuai Trung Nam brei thau, meng 2 adit ini mai, dom radaih di  hợp tác xã tabiak bến min oh raok hu tuai halei atau pok pandap halei meng Mblang radaih miền Đông bahrau. Urak ini dom gah pajeng tuai daok hu adat brei pataok radaih piah brei tuai trun tagok di Mblang radaih miền Đông klak, meyah hadei di ini pacap brei tapa mblang radaih bahrau bo bruk ini daok rah tabiak ye dom gah pajeng tuai mada laik tame kan kandah kayua oh hu tuai piah pajeng: “Mblang radaih klak daok di pasak ban raya nan ye mbuan lagaih ka manuac nao mai. Mblang radaih miền Đông bahrau daok atah lo, atah di pasak ban raya di ban raya jaik 20km. Mayah nao taxi atau Grab piah tal Mblang radaih miền Đông bahrau ye abih rilo jien. Tui nan, tuai mada salih tapa nao jalan kapar haoh, yaom lac abih rilo jien jang min tukvak nao mai katut panak jang”.

Tui bruk ba tabiak di tuk cammariep, dom gah pajeng tuai meng ban raya HCM tal Quảng Trị saong dom tỉnh gah barak anak mata brei pataok saong pajeng tuai trun tagok di mblang radiah di miền Đông klak dalam 3 bilan camriep, hadei di nan meng salih abih tapa Mblang radaih miền Đông bahrau. Ong Lê Thanh Quang, urang điều hành Công ty Mai Linh brei thau: Bruk daok hu saong daok brei ngak dua mblang radaih haong gauk lac: mblang radaih miền Đông klak haong mblang radaih miền Đông bahrau yau urak ni, jeng ngak ka doanh nghiệp pajeng tuai gaok kan kandah tuk brei hu rilo manuac jang piah pablei harak vé, ngak bruk di dua labik: “yau doanh nghiệp kol dalak, dom jalan peih brei parabha jeng 2: jalan katut ye daok di mblang radiah klak, daok jalan atah nao di dom tỉnh nao gah barak ye tabiak mblang radiah bahrau. Yau nan ye nyu abih jien ndo jang saong manuac ngak jeng rilo jang. Oh hu tuai, oh hu pandap piah pajeng, bo daok rilo abih jien jang ye biak kan ngak”.

Ông Trần Thanh Việt, Phó phòng Kế hoạch Vận tải, Công ty TNHH MTV mblang radiah Miền Đông brei thau, dalam dom harei camriep ngak bruk Mblang radaih miền Đông bahrau yaok harei tok hu 16 radiah tabiak bến gam haong dom tuai angaok radaih. Ông Việt langyah ka bruk joa manuac ni: “Kayua jalan nao mai meng mblang radaih miền Đông bahrau haong jalan roya 1A gam haong jalan metro oh ka ngak salah nan ye kan kandah ka bruk nao mai di tuai damaui. Daok radaih buýt, tal urak ni, bahrau hu 3 jalan radaih lac 55, 76, 93 nan ye tuai tabiak mai mblang radaih bahrau biak takik”.

Urang dang akaok rilo gah pajeng tuai jeng ndem lac: Bruk ba mblang radaih miền Đông bahrau tame pandar oh hu siam makre, kein laba yau hatai caong mayah dom gah chức năng di ban raya HCM oh langyah tal labik tal dhua bruk yau yuan lac “xe dù bến cóc” jeng daok hu mboh di anak mata meng lavik mai di rilo quận pasak saong quận langiu di ban raya./.

Urang lang: M. Phương – 23/10