Bal raya Hồ Chí Minh urak ini hu labaih 500 ribau urang bangsa takik, meblah jaik 10% manuac urang di bal raya. Bruk peih ngak sarak daong patagok bruk ngak mbang, daong bruk ngak di bal raya hu daong ka bhap bani bangsa takik patruh eik patrun kathaot tui jalan khang kajap.

 Meng hu sarak daong phun jien saong ba brei bruk ngak ka bhap bani urang bangsa takik di bal raya Hồ Chí Minh, nan ye sang sa-ai  Thị Sa Tiêng, bangsa Khmer, daok di phường 3, quận 8 meng baoh sang kan kathaot hu jeng baoh sang ginup, meda. Jien mek tame di sang sa-ai meng bruk ngak chả ikan saong uốn mbuk. Meng jien patak pataom hu, puac thun 2012, sa-ai padang ngak bahrau baoh sang abih jaik 500 triệu đồng. Sa-ai Thị SaTiêng khan lac: Dahlak hu rajaei, kapul nyaom di palei daong mesre jien, ba nao bac bruk ngak oh abih jien. Dua urang anek di dahlak nao bac oh abih jien, daok hu brei jien bac…Meng hu bruk daong brei di ralo gah dalam sa tukvak nan ye dahlak samar tabiak truh kan kathaot.

 Sang sa-ai Say Nap, bangsa Cam daok di 315/30C jalan Lê Văn Sỹ, phường 3, quận 3 jeng tabiak truh kathaot meng phun jien mesre daong bruk ngak. Mong mboh sa-ai tuk halei jeng khim klao, bui sambai, takik thei thau lac urang kamei ini dahlau deih biak glah glar sa drei nao ngak duah jien raong 3 urang dalam sang. 15 thun dahlau, pasang sa-ai klaak nao, sa-ai Say Nap njauk sup mbaok sup meta, cagar dalur ngak abih bruk ini tapa bruk daih piah duah jien brei dua urang anek mbang bac. Meng pablei ndiuk tal ngak công nhân, mbang pah daong bruk sang…sa-ai jeng hu ngak abih. Min kayua kurang phun jien, oh hu ilamu nan ye oh ka hu bruk halei sa-ai ngak hu suai lavik. Mbiah tal tuk hu mesre phun jien meng danak dak “Patrun kathaot, patagok baoh sang ginup meda” di bal raya piah ngak mbang, rai duik sang sa-ai meng hu siam jang.

Thun 2013, Uỷ ban bhap bani bal raya Hồ Chí Minh hu caik ralo  pren yava, jien padai ka bruk patrun kathaot, patagok baoh sang ginup meda, paglaong rai diuk bhap bani urang bangsa takik. Labaih 30 danak dak pakat bal raya daong ka bhap bani urang bangsa takik kan kathaot hu peih ngak yau: miễn taong abih jien bac ka anek saih bangsa Cam saong Khmer meng mẫu giáo tal abih pakat phổ thông trung học. mBan Bangsa bal raya hu pok brei ralo pok pandap saong pok jien bac yaom labaih 1,2 tỷ đồng ka bhap bani urang kan kathaot saong anek saih urang bangsa takik. Ta-eng 24 quận, huyện jeng hu caik tabiak labaih 3 tỷ đồng iek glang rai diuk ka jaik 7.700 baoh sang urang bangsa takik daok dalam sarak karja, urang taha daok sa drei...Ong Ngô Văn Triển, Akaok mBan Bangsa bal raya Hồ Chí Minh brei thau: Peih ngak danak dak iek glang ka bhap bani urang bangsa takik, meng bal raya, tal quận tal  phường jeng hu dom danak dak, bruk ngak biak siam, biak lagaih, piah paglaong rai diuk mbang ngui, daok dang ka bhap bani urang bangsa takik, piah ba gauk tame dak padang Bal raya  dak harei dak patagok khang kajap.

Meng dom bruk ngak siam lagaih yau nan, thun 2013, hu labaih  2.440 baoh sang tabiak truh kan kathaot. Baoh sang urang bangsa takik kan kathaot dalam bal raya jeng patrun daok 300 baoh sang. Rai diuk di mikva urang bangsa takik di bal raya Hồ Chí Minh harei ini yau brei mboh ka bruk peih ngak hu siam sarak bangsa di dom pakat, dom ngành di bal raya./.