Danak dak sang daok di jalan Liên Phường, Ban Thủ Đức

Meng di tuk bal Thủ Đức hu padang tagok, yaom sang danaok taneh riya pak ini hu jhul tagok glaong, abih di nyu lac dalam labik jaik pasak ngak bruk di bal ini. Tui dom cò taneh ye yaom taneh di labik phường Thạnh Mỹ Lợi (quận 2 klak) hu pablei salih yaom 140 triệu đồng tal labaih 350 triệu đồng tui labik, tagok meng 40-60 triệu đồng sa m2 dut haong dahlau diah.

Urang ngak mbang gah sang danaok taneh riya brei thau, yaom taneh daok tagok glaong kayua di bal Thủ Đức taneh riya oh daok rilo saong abih di nyu lac anak tal bal Thủ Đức lac pasak pambuak jalan mbak nao mai, pasak ilamu công nghệ saong lac pasak jien padai di gah Meraong. Pambak tame hatai saneng yau nan, cò taneh gam gam jhul yaom taneh tagok glaong jang 2 tal 3 mbang dut haong dahlau diah. Tui nan: taneh daok atah di jalan Đỗ Xuân Hợp (quận 9 klak) dahlau diah yaom 20-30 triệu đồng sa m2, urak ini tagok 40-50 triệu đồng sa m2. Danak dak Labik daok ka bhap bini Sở Ilamo Brei thau di jalan Liên Phường, Quận 9 klak jeng hu jhul tagok 70 triệu đồng sa m2, dalam tuk 2-3 bilan dahlau, yaom tok jaik 40 triệu đồng sa m2. Amuk Lê Thị Phúc, ngak bruk pablei salih sang daok taneh riya brei thau:“Danak dak ini ngak brei yaom nyu tagok blaoh 1 mbang, daok urak ini yaom daok tagok jang meng 60-70 triệu đồng sa m2, lac hu bruk jhul yaom tagok. Urang blei “ndik riyak” nao blei, pablei veik duah laba, oh thau urang halei blei puac di abih, min yaom tagok glaong dut haong yaom darak pasar. Urak ini, danak dak ini cơ sở hạ tầng oh ka hu hagait, sang padang ngak bahrau oh ka rilo, yaom ini nyu tagok oh njauk.

Bruk yaom tagok oh njauk daok ngak brei oh takik rahra khang hatai khik taneh cang yaom tagok glaong meng pablei. Sa-ai Hồ Thị Thư hu mblang taneh labaih 200m ² di Danak Khu 10 mẫu, jalan Nguyễn Duy Trinh daok ba tabiak yaom 80 triệu đồng sa m2, dalam tuk dahlau di nan dom bilan yaom lac 50-60 triệu đồng sa m2. Mblang taneh ini sa-ai Thư blei meng thun 2010 yaom jaik 30 triệu đồng sa m ² meyah urak ini sa-ai pablei ye laba hu jaik 10 tỷ đồng, min sa-ai kham merat khik veik kayua saneng lac yaom taneh daok tagok glaong.

“Anak meta dahlak oh pablei, kayua mboh yaom taneh pak ini daok tagok, tuk halei biak caong khin hu jien ye dahlak meng pablei, kayua jalan mbak pak ini jeng siam. Meyah dahlak hu jien ye blei veik taneh di bal Thủ Đức, kayua dahlak saneng lac anak tal bal Thủ Đức biak cak rok patagok, tuk karja padang ngak jalan mbak siam mekre ye yaom taneh meda tagok biak glaong”.

Tui rilo urang ilamu kinh tế, yaom taneh di labik ini urak ini tagok dut haong tabung glaong di thun 2007 labaih 360%. Bruk pablei salih tapa tangin daok ngak ka yaom taneh di bal Thủ Đức hu jhul tagok glaong dut haong yaom biak di nyu, mbuan ngak jeng “baoh blung” sang danaok taneh riya di labik ini. Urang ilamu kinh tế Lê Bá Chí Nhân kakei bhap bani duah thau cambaih laih gah adat hukum, labik daok di mblang taneh, dự án saong dom kadha siam laghaih karei jaik taphia nan: “Dom urang blei oh thau hu yaom darak pasar. Kayua yau nan ye mbuan ngak jeng “baoh blung”, ngak jeng yaom oh biak. Urang blei njauk mong iek ka nyu cambaih laih tui rilo kadha karei di gauk, kayua hu dom mblang taneh, hu dom dự án hạ tầng oh ka ngak salah blaoh, oh ka ginup min yaom jeng hu jhul tagok glaong. Thun 2021, yaom taneh di labik ini jeng tagok glaong min oh tagok rilo mbang yau menuac môi giới daok ndom nan ye urang blei njauk mong iek ka nyu cambaih, plaih khat lahik jien padai”.

Sa bruk daok mboh di anak meta nan lac yaom taneh bhian tagok tui quy hoạch đô thị, tagok tui sarak patagok kinh tế di yaok labik bo bal Thủ Đức lac sa bruk brei mboh yau nan, tuk jaik di ini dom bruk pablei salih taneh riya hu yaom glaong jang rilo mbang dut haong dahlau diah. Kayua yau nan ye, bruk ramik veik ka nyu lagaih saong brei thau cambaih laih yaom taneh riya di yaok labik nan lac jalan ngak siam piah pacang cakak bruk yaom taneh tagok glaong oh njauk haong yaom biak di nyu di  bal Thủ Đức, plaih khat lahik jien ndo di bhap bani tuk blei taneh di labik ini./.

Urang lang: Thụy Sĩ  9/3/2021