Pathau mikva saong taong abih gauk! Trà Vinh lac tỉnh hu bhap bani urang bangsa takik meblah labaih 30% manuac urang dalam tỉnh, ralo di abih nan lac urang bangsa Khmer saong lac tỉnh kathaot di abih dalam Bhum taneran kraong Cửu Long. Yau nan min dom bruk taong abih bhap bani dak padang rai diuk ilamo di labik daok, padang ngak palei pala bahrau di puk palei, abih di nyu nan lac labik hu ralo bhap bani urang bangsa takik jeng mek hu ralo siam mekre. Hu yau nan meng hu bruk rik daong di kapul nyaom urang hu angan je dalam puk palei. Kadha vak di Sa Oanh, urang vak di rayo sap ndom Việt Nam daok di bhum taneran kraong Cửu Long hu ndom tal bruk nan, da-a mikva saong taong abih gauk tui pang:

Yaom lac umo labaih 60 thun min ong Thạch Nụm - thương binh hạng 2/4 daok di Đồng Khoen, xã Phong Phú, huyện Cầu Kè harei halei jeng nao jak ba mikva pasiam veik jalan mbak, padang ngak sang bac, iew mikva gul pataom dak padang rai diuk ilamo… Kayua ong mboh lac makna ba tal kathaot di mikva Khmer dalam palei mai meng kurang bac daa, nao mai kan kandah. Meng nan yaom lac jalan nao mai biak kan kandah min 18 thun ini mai ong nao jak ba hu taneh padang ngak hu 07 duk bac; jak ba mikva rik daong jien padai pren yava padang ngak hu jaik 14km jalan nao mai dalam palei. Hu jalan bê-tông ong salih tapa ngak palahik tatua meng kreim saong tapa nan mikva dalam palei rik daong hu labaih 200 triệu đồng, yaok ribau harei ngak piah ngak bahrau 23 baoh tatua bê tông sit.

Băng: “Urak ini umo taha paje min jeng bhian nao pasang iek jang yau nao rivang mikva dalam puk palei. Wa Ho pato brei ka bhap bani, brei ka palei negar, khik hu bruk gul pataom, hu bhap bani jia tui nan ye drei meng ngak hu bruk nan, blaoh drei ngak dahlau ka manuac urang mong mboh, mboh blaoh ngak tui, ngak yau nan miat blaoh hu ilamu, mbang ngak hadei siam jang mbang ngak dahlau”.

Daok di palei Đại Trường xã Phú Cần, huyện Tiểu Cần jeng hu bhap bani Khmer meblah jaik 98%. Meng angan je dalam bhap bani Khmer, sư cả Thạch Thưa urang dang akaok baha Đại Trường tuk halei jeng abih hatai pachreih tui karja, dom kapul nyaom pathau khan sarak di Đảng, hukum di Karja tal bhap bani; nao dahlau dalam bruk khik ramik saong patagok ilamo meng kan di bangsa; peih ngak siam bruk “Taong abih bhap bani gul pataom dak padang rai diuk ilamu di labik daok”. Dalam 03 thun mai ini, sư cả Thạch Thưa hu pathau khan, pato tacei jalan siam, jalan njauk ka 34 urang mboh yau ngak suan adat hukum, diukrai siam mekre haong puk palei. Langiu di nan sư cả daok pambuak haong kapul nyaom nao langyah hu 3 bruk meriak gauk livik thun dalam gauk gar; ba pasiam hu 5 urang bhian ngak srau dhau puk palei, co klaik mai veik jalan siam tui jalan pachreih ba di ralo gah, pato tacei ka dom urang nan thau jang ka adat hukum. Dom bruk ngak ini oh lac daong ka urang hu rai diuk siam mekre bo daok rik daong langyah bruk oh siam gah An ninh, trật tự xã hội, daong ka xã Phú Cần ngak hu samar jang. Sư cả Thạch Thưa brei thau ka ilamu dalam bruk jak ba mikva bangsa yau ini:

Băng tiếng Khmer: “Mikva Khmer takik thau adat hukum min ndom ka agama ye mikva biak thau cambaih. Kayua yau nan ye dahlau di tuk pathau khan adat hukum ka mikva ye sư ba dom hukum agama tame ndom dahlau tuk halei thau cambaih meng pagam adat hukum dunya tame. Tuk hu mbaok ralo phật tử, sư langyah ka mikva thau cambaih yau habar iew lac palei ilamo, baoh sang ilamo pambuak hukum dunya haong hukum agama, tuk halei mikva thau cambaih sư meng jak ba, langyah, pachreih ieu dom urang, dom baoh sang daok hu bruk meriak gauk”

Tal urak ini tỉnh Trà Vinh pataom hu labaih 400 urang hu angan je dalam bhap bani, dalam nan hu ginup abih gah, meng urang dalam agama, urang nong, tal urang taha umo... Taphia di nan brei thau cambaih labik dang, bruk ngak di yaok urang piah brei bruk, pambuak gauk peih ngak siam dom sarak. Jaik abih urang hu angan je dalam bhap bani urang bangsa takik hu jalan ngak mbang gheih piah patagok bruk ngak mbang kinh tế, paglaong jien mek tame ka baoh sang saong yam tagok dalam rai diuk, hadei di tuk hu palih ruah saong tapa bruk jak ba, urang hu angan dalam tỉnh abih hatai hu mbaok dalam bruk ngak di puk palei; pato pakai anek kamuan dalam palei jia tame bruk pan akaok di Đảng, jalan tacei ba di Karja; dom bruk pakacah gauk anit ranam taneh aia… Meda lac, dom urang nan yau talei pambuak siam dom pakat ủy, raja-ei, Mặt trận negar, dom kapul nyaom chính trị - xã hội  haong bhap bani urang bangsa takik. Amuk Sơn Thị Ánh Hồng, Phaok bí thư Tỉnh ủy Trà Vinh brei thau lac:

Băng: “Urang hu angan je dalam bhap bani urang bangsa takik di tỉnh Trà Vinh hu meng jaman mesruh metak. Ini lac dom urang yau kreih camin, jia tame bruk pan akaok di Đảng, nao dahlau ngak siam bruk ngak mbang patagok kinh tế baoh sang. Anak tal piah patagok siam jang, tỉnh meda pato pathram pabak dom ilamu piah ka urang hu angan je patui veik patagok, jak ba bhap bani piah ngak habar grap tanat rai diuk, khik hu siam bruk an ninh chính trị trật tự angaok dalam tỉnh, bo dalam tukvak tapa urang hu angan je ngak hu biak siam”.

Tapa bruk ngak mboh lac, dom labik halei, puk palei halei ngak siam bruk pambuak gauk di dom pakat pal akaok Đảng, karja haong urang hu angan je ye labik nan tuk halei jeng hu hatai bhap bini pachreih tui biak rilo saong samar mek hu jayak, yau Wa bhian ndom lac: Mbuan rituh mbang oh hu bol jeng oh ngak hu, kan ribau mbang hu bol ngak ye salah”. Kayau nan ye, bruk ngak, labik dang di urang hu angan je dalam bhum urang bangsa takik dalam bruk mesruh pacang kaol khamang, yasa taneh aia saong harei ini dalam bruk dak padang chủ nghĩa xã hội jeng daok tamo yaom glaong saong daok hu patagok khang kajap, rik daong tame bruk dak padang puk palei dak harei dak trei sil, haniem phul./.