1/ Ủy ban bhap bini ban sit Đà Nẵng bahrau peih bruk duah thau hatai sahneng di urang jakar, bhap bini dalam ban sit ka bruk caik angan, salih angan jalan piah pok tagok Hội đồng bhap bini ban sit ĐN dalam nyaom biai di bilan 12 anak tal. Tui nan, ban ĐN mek angan dom palao dalam palao kaoh Hoàng Sa piah caik angan ka dom jalan.

2/ Liên đoàn Lao động tỉnh Khánh Hòa barau alin hadiah 12 baoh sang “mái ấm công đoàn” ka urang ngak kan kathaot dalam tỉnh. Tui nan, di ban sit Nha Trang hu 5 urang ngak hu daong brei sang daok, huyện Diên Khánh 4 urang ngak; huyện Khánh Vĩnh 2 urang ngak saong huyện Cam Lâm 1 urang ngak. Yaok baoh sang mái ấm công đoàn hu daong 30 triệu đồng saong meng akaok thun tal ini, liên đoàn lao động tỉnh khánh hòa hu daong padang ngak 30 baoh sang mái ấm công đoàn ka urang ngak kan kathaot ngan saong yaom jien  900 triệu đồng.

3/ # Sở Y tế tỉnh Kon Tum brei thau, Sở bahrau jao harak brei bruk ka 15 bác sỹ bac tamat BS  đa khoa tui jalan cử tuyển di Học viện Quân y (mintri Quốc phòng). Dalam dom urang nan, hu 1 BS mai ngak bruk di sang iek ruak Đa khoa tỉnh, sa BS mai sang iek ruak Y học cổ truyền, 3 BS mai sang iek ruak Đa khoa khu vực Ngọc Hồi;  2 BS mai pasak y tế huyện Đak Hà, 6 BS mai pasak y tế di bhum atah bayah di dom huyện Tu Mơ Rông, Sa Thầy song Đăk Glei.

4/ Ban tacei jalan peih ngak danak dak gilang limo huyện Tân Châu, tỉnh Tây Ninh barau peih bruk alin hadiah limo menek ka baoh sang kan kathaot xã Tân Hưng. Kuhria tal urak ini, dalam huyện Tân Châu hu jak ba kadung jien gilang limo hu labaih 95 triệu đồng saong alin taong abih 13 drei limo menek ka urang kan kathaot ngan saong yaom jien abih tih labaih 300 triệu đồng, dalam nan phun jien TƯ daong 80 triệu đồng saong phun jien puk palei đối ứng 78 triệu đồng.

5/ Tỉnh Bạc Liêu hu jiak 200 ô đê bao thủy lợi pacang sre saong yaom jien ngak yaok ô meng 1 tỷ meteh tal 2 tỷ đồng. Bruk padang ô đê bao oh lac piah pacang mbak bo dok peih tabiak jalan siam piah ka BL padang mblang hamu mẫu prong dalam tukvak anak tal. Labik nao dahlau dalam bruk padang ngak ini di tỉnh, lac huyện Phước Long hu jiak 100 ô đê bao thủy lợi, yaok ô praong meng 40 tal 100 ha. Piah peih tabiak bruk ngak ini, huyện hu ba 145 jamriak njuk ia ka dom bilai đê bao saong padang dom kapul tathuak ia pacang cag ia ndik, mek ia pabak ka bruk pala drak. 

6/ Ban Thường trực Ủy ban Mặt trận negar Việt Nam ban sit  Cần Thơ barau peih bruk alin hadiah sang jum pataom ka 20 baoh sang kan kathaot xã Giai Xuân, huyện Phong Điền.  Jaik 5 thun tapa, ban sit Cần Thơ hu padang ngak labaih 10.000 baoh sang ka dom urang kan kathaot, sangka iek glang rai diuk, peih pato bruk ngak saong ba bruk ngak ka bhap bini; palahik baoh sang taik tahak, paglaong rai diuk di urang kan kathaot, mek hu dom tanut ka bruk padang ngak palei pala barau, ngak tui sarak patrun kathaot khang kajap di Đảng saong karja.

7/ Mban agama tỉnh Đồng Nai bahrau peih tal pasram paglaong ilamu agama ka labaih 200 urang jakar dalam gah công an, quân sự dom pakat di tỉnh. Hu mbaok dalam tal pasram, dom học viên hu duah thau ka bruk agama urak ni, talei pambuak bruk di agama song chính trị, ilamu, đạo đức, akaok sahaneng, sarak di Đảng song hukum di karja ngan song agama, bruk pacang pagam pambak tame agama.

Patui di ni dom khau tin dunya:

8/ Mintri ngoại giao TQ brei thau, thủ tướng TQ Lý Khắc Cường hu brei thau dom jalan ngak barau saong dom đề xuất pambuak bruk Đông Á dalam dom mbang họp jaik tal saong dom urang ngak praong pan akaok khu vực ini. Ong Lý Khắc Cường hu mbaok tame nyaom meyai pakat glaong di abih mbang ka 17 di TQ saong ASEAN pagam 3 (nan lac Trung Quốc, Hàn Quốc saong Nhật Bản) saong nyaom meyai pakat glaong di abih Đông Á mbang ka 9 di Nây-pi-đô ( Mi-an-ma) peih tabiak meng harei 12 tal harei 14/11. 

9/ Bahrau ni, sa urang nong Hà Lan ngak hu bruk pandar ia tasik lai mbrang piah pala phun. Ni hu mong lac sa jalan ngak bahrau dalam bruk ngak nong, meda ngak brei patrun patakik tác động di bruk patagok ia njom mbak kayua biến đổi khí hậu, ba mai jalan ngak ka yaok ribau trang trại dok tapen tasik di angaok dunya. Salih ka bruk pandar ia taba, ong njuk yaok ribau lít ia tasik lai mbrang tame dom mblang hamu. Jalan ngak ni piah duah tabiak janih phun pala diuk hu dalam ia mbak./.

      10/ Anak dom kadha mboh siam tagok dalam bruk dunya ba gauk mesruh pacang jit Ebola, barau ini, dank dak lương thực dunya di LHQ sa mbang tra hu panuac ieu bhap bini dunya patui jalan pambuak bruk piah jhul kadul likuk jit praong ini. Danak dak lương thực dunya brei thau daong pabak lương thực ka labaih 1,3 triệu urang di dom taneh ia bhum hu jit yau Ghi-nê, Li-bê-ria saong Xi-e-ra Lê-ôn. Bruk daong pandap mbang nan piah pacang cakak bruk nao mai oh cần thiết di dom urang ruak daok hu iek ruak Ebola atau hu tabiak truh sang iek ruak bloh./.