Palei nduac thận Hà Nội dom harei njauk kan kandah kayua jit Covid-19, bhap bani daok pak ini jaik abih lac urang kathaot kayua ruak kik, saong gaok kan kandah jang meng dom mbang brei daok atah gauk. Min meng dom harei kan kandah nan, 600 pok lisei ndung bak hatai anit ranam meng danak dak “Triệu van huak” hu ba brei tal tangin urang ruak. Yaok ribau bhap bani kan kathaot di Hà Nội, TPHCM, Hải Phòng, Đà Nẵng saong Cần Thơ jeng taduan hu dom pok lisei bak hatai anit ranam. Amuk Nguyễn Thị Sinh, palei daok di Ba Vì, sa urang daok dalam nyaom nduac thận Hà Nội drut droi khan lac:“Dom kamuan, dom urang ngak pahla hu daong ka palei thận khaol dahlak biak rilo, dalam tukvak rah tabiak jit ruak, khaol dahlak taduan mek hu biak rilo hatung hatai klah rabha. Meyah oh hu urang ngak pah hala, oh hu karja, ye mbang jit meng blaoh nan khaol dahlak oh thau diuk rai yau habar. Jia tame bruk pal akaok di Đảng, bhap bani Việt Nam iek prong bruk pacang caga jit, oh huac kanda hagait”.

Di Đà Nẵng, Cần Thơ, danak dak “Triệu van huak” hu peih ngak samu gauk, ba bui sambai brei ka oh takik urang kathaot, urang oh hu sang danaok, urang ngak lahik bruk ngak, sinh viên hu rai diuk kan kandah, urang jaoh jo. Sa-ai Phạm Thị Tý, daok di phường Hòa Khánh Nam, quận Liên Chiểu – sa dalam dom baoh sang taduak hu bruk daong meng danak dak “Triệu van huak”, lac: “Dom pandap alin ini anek amaik dahlak jeng mbang hu sa bilan meyah mbang patak pataom. Ndua dhal phol manuac urang hu daong ka anek amaik dahlak yam tapa mbang jit ini.”

Meng 5 tỉnh, bal akaok mereip, tal urak ini, dandak “Triệu van huak” hu samar drah pambak tal 15 tỉnh, bal, dui pachreih hu rilo dam dara dalam negar, urang ranaih umo di dom puk palei jak ba hu bruk ril daong di rilo kapul nyaom, manuac urang piah hu rilo jang van mbang ka urang kathaot. Oh lac tok ba dom van huak tal mikva tuk gaok kan kandah kayua jit prong Covid-19, bo rilo nyaom, klup kapul dam dara daok rik pataom jien padai, radaih pajeng ba pandap panda kaya mbang tal bhap bani saong dom labik pacang caga jit. Sa-ai Bùi Anh Phương, urang daok dalam Klup kapul radaih bán tải Hà Nội saong Nguyễn Thu Trang, sinh viên Sang bac Đại học Y, Hà Nội brei thau, bruk ngak di dom urang ini tui jalan di dam dara, urang ranaih umo, lac “labik halei khin ye dam dara hu mbaok, labik halei kan kandah ye hu  mbaok dam dara”: “Tuk jit Covid-19 rah tabiak, urang pal akaok klup kapul hu ieu pataom adei sa-ai ngan haong labaih 100 sruh radaih bán tải caga nao tal dom labik mikva caong khin, ba dom pok lisei brei ka bhap bani, urang lin, bác sỹ di labik pacang caga jit”.

Khaol dahlak oh huac kan kandah, oh huac glaih glar, meda nao pathau khan saong ngak yaok bruk piah rik daong jhul kadhul likuk jit ruak Covid-19.

Meng prein pambak prong, danak dak “Triệu vam huak” taduan hu bruk pachreih tui di rilo manuac urang dalam bol bhap rah ra. Kapul dam dara Việt Nam di dom tỉnh, bal saong dom klup kapul halar hatian daok pachreih tui, jak ba saong ba mai yaok triệu van huak ka bhap bani. Sa-ai Nguyễn Kim Quy, Phaok akaok Hội Liên hiệp dam dara Việt Nam ndom lac, danak dak “Triệu van huak” meda daok pambak prong jang, oh lac tok daong ka bhap bani dalam tuk jit ruak bo hatai saneng ini daok hu patui veik dalam rilo danak dak ngak pahla karei: “Gam haong danak dak triệu van huak hu peih tabiak ngak, dom urang đoàn dam dara abih hatai jak ba dom kapul nyaom, manuac urang rik daong; pajeng ba pandap panda alin hadaih ka bhap bani, hu mbaok tame bruk pacang caga jit di puk palei. Danak dak “Triệu van lisei” meda daok hu pambak prong tal dom manuac urang gaok kan kandah”

“Triệu van huak”, triệu baoh hatai hu bui sambai chreih chrai, min mbluak jang di abih nan lac, danak dak hu pambak prong hatai saneng di dam dara lac: halar hatian klah tabha saong abih drei brei ka bol bhap rah ra piah “oh caik ka thei njauk klaak veik gah likuk”./.

Urang lang: Jasi – 26/03