Bahrau ini, bruk du lịch sinh thái di tỉnh Tiền Giang saong Bến Tre tagok khang. Dalam nan, bruk ndik radaih saih di jalan palei hu rilo tuai damuai biak takre. Bruk ini daok peih tabiak janih bahrau dalam bruk du lịch, ba bruk ngak mbang, duah jien ka rilo urang. Nhật Trường, urang vak di rayo sap ndom VN daok di bhum taneran kraong CL hu kadha vak angan lac “Tuk saih mai palei”, da-a mikva saong taong abih gauk tui pang.

Ong Lê Văn Hoài, daok di palei 8, xã Tân Thạch, huyện Châu Thành, tỉnh Bến Tre urak ini hu raidiuk tani tanat meng sa drei saih. Ong brei thau: dahlau deih, sang kan kandah lô, nduac nyim mesreaiy jien meng blei hu sa drei saih ngak du lịch. Dalam 8 thun tapa, tuk peih radaih saih ka labik du lịch Hương Dừa,  ong duah hu yaok harei meng 200 tal 300 ribau đồng. Dom harei lễ tết, tuai rilo nan ye jien duah hu jeng rilo jang. Ong biak takre bruk ini kayua nyu gam duah hu jien gam ba bui sambai ka tuai damuai. Ong Hoài khan lac:

Bruk ini jeng kan di labik duah hareik ka saih mbang saong pato ka saih nyu pang tui. Saih bahrau blei mai brei pasram nyu meng dui radaih pajeng tuai hu. Drei biak takre bruk ini kayua hu duh ka tuai damuai saong daok duah hu jien. Tuai Yuan jeng takre radaih saih min tuai Prang urang takre jang.

Dahlau deih, di Tiền Giang saong Bến Tre, saih hu raong piah iek me-in atau piah pajeng baoh kayau, pandap panda. Dom thun jaik di ini, saih hu pandar piah dui radaih pajeng tuai du lịch. Kuhria ta-eng labik du lịch sinh thái Quê Dừa, xã Tân Thạch, huyện Châu Thành, tỉnh Bến Tre hu tal 20 sruh radaih saih pajeng tuai.  Dalam nan, pô labik du lịch ini hu blei 12 drei saih daong ka urang kan ngak radaih pajeng tui du lịch. Yaok drei saih praong meng 3 tal10 thun, yaom labaih 20 triệu đồng.  Bhian di nyu, nao  radaih saih di jalan palei lac bruk camereip dalam yaok tour du lịch sinh thái. Tuai damuai hu ndik radaih saih nao tame palei, hu mboh di anak meta dom kraong ribaong, dom bein kayau bak boh, bruk mbang ngui daok di bhap bini. Sa-ai Trần Thị Nương, urang tuai mai meng ban raya Hồ Chí Minh lac:

Mbang camereip dahlak nao du lịch sinh thái di Bến Tre, hu ndik angaok radaih saih yau ini mboh takre lô. Dahlak sahneng lac, bruk ini njauk peih praong tabiak tal dom labik  du lịch karei”.

Di Tiền Giang saong Bến Tre urak ini hu jaik 60 drei saih duh ka bruk du lịch. Xã Tân Thạch, huyện Châu Thành, Bến Tre hu tapon saih rilo di abih 34 drei, daok veik 12 drei di xã Quới Sơn jeng lac dalam huyện Châu Thành. Di Tiền Giang hu xã Thới Sơn, ban sit Mỹ Tho hu 12 drei saih ngak du lịch. Nan lac tapon saih di ong  Đặng Văn Lộc daok di palei Thới Thạnh. Ong Lộc brei thau, tapon saih ini blei thun bloh. Blei meng Campuachia mai pasram meng dui hu radaih pajeng tuai du lịch.   

Bhian di nyu takik hu saih dui radaih, rilo meng hu saih pacah. Tame ini drei pasram ka nyu. Drei hu kakei adei sa-ai brei khik njauk hukum nao mai angaok jalan, jalan halei hu adat meng peih tame. Bhian klauk jru bổ ka nyu, tuk nyu ruak kik ye drei da-a gah thú y mai klauk jru brei.

Dom sruh radaih saih bhian pajeng tuai di jalan atah meng 2 tal 3 km. Yaom lac lingik hajan atau pandfiak, tuk tuai caong ye drei peih. Kayua lac duh ka tuai damuai nan ye yaom biak lap, yaok mbang nao yaom 25.000 đồng min. Kayua yau nan ye, tuai mai tal dom labik du lịch sinh thái di Tiền Giang saong Bến Tre jeng oh klaak bruk nao radaih saih di jalan palei.

Ong Trần Tuấn Kha, Phó chủ tịch UB bhap bini xã Tân Thạch, huyện Châu Thành, tỉnh Bến Tre brei thau, xã peih hu 18 labik du lịch sinh thái. Dalam nan du lịch nao radaih saih jeng sa bruk biak pachreih tuai damuai:

Tuai du lịch ndik radaih saih di dom jlan palei, dalam nan hu tuai Việt saong tuai negar lingiu, ba bruk ngak ka bhap bini dalam palei, pambuak bruk haong kapul radaih saih pajeng tuai nao dom labik du lịch dalam xã. Bruk pacang caga ruak jeng hu ngak bruk bloh haong dom pô radaih saih. Saong brei khik caga siam mekre salamat angaok jalan nao, pachreih dom pô radaih saih klauk jru pacang cag aruak ka dom drei saih.

Tui panuac khan di mikva, pilih ruah saih piah ngak du lịch biak kan, brei pilih ruah drei saih slut mbut saong hu saik sok biak mekre. Tuk blei saih mai brei pato pasram abih rilo pren yava, brei iek glang, caga ruak ka nyu. Abih di nyu nan lac, urang peih radaih saih brei samar thau langyah tuk hu bruk rah tabiak piah khik siam mekre salamat ka tuai damuai. Ong Từ Duy Sơn, daok di  phường 6, ban sit Mỹ Tho, sa urang pô radaih saih du lịch lac:

Saih tano nyu panak jang saih binai, Saih nyu thau pang. Tuk khin brei nyu pajeng tuai suai jang yaok harei, drei ndom puac bingi pang haong nyu, nyu takre pang panuac yamen li-an. Dahlak taha ye, takre ngak bruk ini, kayua takik glaih, duah hu jien saong hu daong ka urang ini, urang deih”

Hadei di tuk glaih glar haong rai diuk jar var di đô thị, tuai damuai hu daok angaok dom sruh radaih saih, mbleing mblang angaok dom jalan palei, ala halui dom phun li-u hijao... Tuk nan, urang meng mboh hu dom gheih mekre di palei pala, mboh hatai jai chreih chrai, var lahik abih dom glaih glar dalam rai diuk, piah yam tame harei bahrau./.