Dalam dom uranaih umo ala 16 thun njauk COVID-19, urak ini daok hu jaik 3 rabau uranaih daok hu taong ruak, dalam nan hu 13 uranaih ruak metai, meblah 0,1%. Tui taong yaom di Gah Y tế Dunya (WHO) saong tui panuac khan di dom taneh ia, ruak COVID-19 di uranaih bhian hanjul, abih di nyu lac uraniah sit. Dalam dom urang ruak COVID-19 trak, uranaih sit saong uranaih umo ala 18 thun tok hu 2 tal 4,8%. Min gah prein yava, uranaih meda gaok dom kan kandah suai lavik meyah njauk ruak. Abih di nyu lac, dom uranaih hu ruak dahlau dalam rup, ruak meda trak jang meyah njuak COVID-19. Rilo amaik ame duh hatai lac, tuk halei dom anek hu klauk vaccine, piah hu nao bac da-a veik. Sa-ai Nguyễn Thúy Ngần, daok di quận Hoàng Mai, Hà Nội caong khin lac:

  “Urak ini, urang praong umo labaih 18 thun hu klauk vaccine bloh.  Bruk bo kol dahlak caong khin lac, Karja samar hu vaccine klauk ka uranaih piah dom anek samar hu nao bac da-a veik. Ini jeng lac caong khin di dom anek, kayua dom anek padeih di sang jeng biak lavik paje”

  Dom duh hatai saong dom caong khin hu klauk vaccine piah khik caga uranaih anak COVID-19 lac bruk njauk, bruk siam. Ong Trần Công Nguyên, Phaok Yam ndok Sở Lao động-Thương binh saong Xã hội Đà Nẵng mboh lac:

 “Vaccine brei ka uranaih lac kadha praong piah kol drei peih pabah mbang sang bac, peih pabah mbang dom bruk ngak mbang karei, jeng hu makna lac hu ngak bruk dalam siam mekre bahrau. Kol dahlak biak caong khin Mintri Lao động-Thương binh saong Xã hội, Mintri Y tế, Kadung jien uraniah Liên hợp quốc biak caik hatai sangka tal bruk vaccine ka uranaih. Kol dahlak mboh lac Việt Nam njauk sangka jalan ngak ini dahlau, meng hu jalan peih ngak dom bruk, dom jalan patui di nan”

       Bruk klauk pabak vaccine ka bol bhap rahra, dalam nan hu uranaih lac bruk njauk ngak. Min kayua vaccine caga COVID-19 jeng hu roh duah saong brei adat dalam tuk samar drah nan ye urak ini di dom taneh ia bruk klauk ka uranaih ala 18 thun oh ka peih praong hu. Thạc sĩ Nguyễn Thanh Ngọc, Cục Pasang iek, taong ruak, Mintri Y tế brei thau: urak ini, dalam dom janih vaccine COVID-19 daok hu klauk, tok hu vaccine Pfizer hu klauk iek angaok menuac meng 12 tal 18 thun saong kapul uraniah ala 12 thun. Meng kreh bilan 7 thun ini, Mintri Y tế jeng hu ginum biai haong hãng Pfizer saong daok ngak harak gar blei 20 triệu mbang vaccine klauk ka uranaih Việt Nam meng 12 tal 18 thun.

    “Việt Nam jeng daok roh duah saong blei vaccine brei ka uranaih ala 18 thuni. Kol dahlak kham merat brei ka dom urang umo thun ini, kayua di dom tỉnh gah meraong, dom menuac njauk COVID biak rilo".

   Tui pato tacei di Thủ tướng Rajaei, Mintri Pato Megru haong Mintri Y tế padang jalan cambaih laih ka bruk klauk vaccine caga COVID-19 ka anek saih. Kadha ini piah yam tal bruk brei ka anek saih hu klauk vaccine samar hu nao bac veik yau jalan ngak di dom taneh ia. Mintri Y tế kuhria pabak hu 150 triệu mbang vaccine caga COVID-19 tal abih bilan 4/2022 piah ngak hu bruk daok pamaong tal. Min kayua bruk pabak, bruk blei vaccine kan kandah nan ye bruk klauk vaccine ka uranaih meda suai jang duk haong bruk ba tabiak./.

 Urang lang: Ai Nghiem - 28/9/2021