Bilan thu dom thun dahlau, urang nong xã An Hảo, huyện Tịnh Biên, tỉnh An Giang pataom mek abih aia taba piah pala njam patam, min mblang taneh tok hu labaih 100 công. Min bilan padai Đông  Xuân meng blaoh, kayua aia sua oh mai, mblang hamu takik phù sa, nan ye năng suất padai oh hu glaong, jien mek tame meng bruk ngak padai di mikva trun takik. Piah pabak dom khat lahik, bilan thu thun ini, tuk mboh kraong Văn Lanh jeng daok aia taba, mikva dom palei An Lợi, An Đông khang hatai trun pajaih njam patam, yau đậu nành, ratak naih saong tamekai. Kuhria ta-eng  tamekai, mikva pala hu labaih 200 công, rilo jang jaik 3 mbang dut haong bilan thu thun dahlau. Taphia di bruk jak ba urang nong peih prong mblang taneh pala njam patam, kapul urang nong xã daok kham merat pambuak bruk haong Balai pachreih nong tacei pato jalan iek glang, pacang caga halak halin ka phun pala. Ndom ka bruk ini, ong Lin Đa, akaok kapul urang nong xã An Hảo brei thau: Kapul urang nong xã jak ba mikva pala njam patam angaok mblang hamu. Langiu di nan, gam haong urang jakar pachreih nong tacei pato ilamu mong iek njam patam. Urak ini dom mblang hamu pala njam patam daok tamuh siam, mikva daok cang tal harei paik mek.                             

Di palei An Lợi, labik mikva ralo meng ngak ro pala njam patam angaok mblang hamu dalam bilan thu ini, urang pala takik ye sa công, urang pala ralo ye 6, 7 công. Tuk langik oh ka pandiak khang, mikva tabiak hamu mek halak, pruh aia, kayua YAU nan ye, njam patam tamuh siam. Ong Chau Mỹ Phước pala 2 công tamekai brei thau: Thun blaoh, ong pala tamekai suan bilan, paik baoh njauk tuk tame Chol ChơNam ThMây, pablei yaok kg hu 8 ribau đồng, hu laba glaong. Nan ye, thun ini, sang ong daok pala tamekai veik. Ong Chau Mỹ Phước caong lac bilan tamekai ini, daok pala njauk saong pablei hu yaom, hu jien pandar dalam tukvak Tết meng kan di bangsa. Ong Chau Mỹ  Phước lac: “Yaok harei dahlak pruh aia klau mbang. Langiu di nan, dahlak caik hatai tal halak halin, urak ini hamu tamekai di dahlak saong mikva biak siam, mikva palei An Hảo caong khin vụ tamekai thun ini nyu njauk saong pablei hu yaom, hu jien mbang Tết”

Mai veik xã An Hảo, huyện Tịnh Biên, tỉnh An Giang dom harei ini, khaol drei meng mboh bruk jar var di urang nong pak ini. Angaok mblang hamu, labik halei jeng mahit sap ndom klao di urang ngak. Gam haong dom mblang hamu pala tamekai, mblang hamu An Hảo daok bak sambo màu hijao di phun ratak, di baoh paya. Sa-ai Ngô Văn Chung,  Phaok Akaok Kapul urang nong xã An Hảo brei thau: dalam xã urak ini hu 7 kapul pambuak bruk pala njam patam, hu jaik 250 urang nong hu mbaok tame. Tui nan, mikva oh caik taneh saoh, ralo  mô hình 1 vụ njam patam + 2 vụ padai, mek hu năng suất glaong, ba mai ralo kein laba ka mikva. Sa-ai  Chung ndom lac: “Yaok thun mikva oh pala njam patam, thun ini pala suan bilan min tamekai tamuh siam. Mikva pala ralo janih yau ye tamekai, lange. Taneh ini ngak padai, urak ini mboh pandiak bhang ralo, mikva pala tamekai 2 bilan, blaoh ngak padai veik”.

         Likau drei tabiak truh kraong Văn Lanh daok bak aia taba, ginup ka mikva ngak puh, hatung hatian dahlak mboh anait ranam jang mikva daok di bhum pandiak bhang, njaom mbak, dom harei tapa, aia piah ngak mbang ngak huak daok kan, ndom hagait tal aia brei ka bruk pala drak. Daok ngan haong mikva An Hảo, thau pandar, thau pataom mek aia taba piah pala drak, oh lac duah jalan ba jien tame ka sang di drei, bo daok  daong pabak kaya nong that hijao ka urang blei pandar, bruk nan biak njauk pok meyaom. Harei Chol ChơNam ThMây daok mai jaik tal, mong dom bein njam patam hijao mekre di mikva An Hảo, dahlak jeng likau ka nyu njauk, pablei hu yaom piah ka mikva hu jien mek tame, piah ka sang halei jeng hu mbang tết bui sambai chreih chai./.