Taha Đến angan ginup lac Hồ Văn Đến, ndik tapui thun 1956. Lac anek di bhap bini Cor, ong Hồ Văn Đến samar thau tal cách mạng song nao tui panuac ieu di palei negar. Umo 14 thun, likau tame Quân khu V, thun 1978, Đến mai veik palei Trà Giang ngak bruk di xã. Meng sa urang kiểm lâm, kayua naih gheih, ong hu pok ngak Bí thư đoàn xã, phó akaok UB bhap bini xã, bloh ngak Akaok UBMT negar VN xã

Thun 2014, ong Đến padeih bruk bloh hu pok ngak Bí thư Chi bộ palei 2. Harei camereip mai palei, bruk ngak ka taha Đến mboh duh hatai di abih nan lac rai duik di mik va kan kandah lo. Palei hu 15 boh sang song 56 urang, dok di kreik glai klo, điện oh hu, jalan oh hu, bhap bini oh thau hagait tal gah lingiu. Anit ka mik va, taha Đến nao mai gam gam, ba dom khau tin meng xã mai khan ka mikva dalam palei, bloh ba dom ilamu thau hu meng dom tal pasram megru piah pato veik ka dam dara dalam palei patagok bruk ngak mbang KT. Taha Đến khan lac:Tuk camereip ngak bruk pathau khan glaih glar lo, mik va oh thau drei biai hagait. Rilo urang dok ndom bui lac, taha nao taha thau, khol dahlak hulin hu nao halei. Min thau hu bruk di drei lac talei pambuak bruk, taha Đến kham merat ba sarak di Đảng, hukum di Karja khan veik ka mikva puk palei, lavik livik harei nyu jeng bhian randap oh kurang hu ngan saong mikva.       

Jak jeng jang lac bruk taha Đến hu dong ka mikva bhian randap song rai duik bahrau. Ro pabui, val limo hu padang atah di sang, puh ramik haci hacih. Amuk Hồ Thị Út Sơn chreih chrai khan lac “ Taha Đến ranam bhap bini lo. Meng hu taha Đến bo drei hu mbang trei, daok hacih. Khik hacih pren yava meng siam, meng daok hu sa rituh thun taha.

   Taha Đến dok pato ka mik va thau jum pataom, thau ngak tui adat hukum, nan ye an ninh trật tự dalam palei hu siam. Dom pluh thun tapa, palei oh hu bruk halei ngak suan adat hukum. Dom anek naih dalam palei hu taha pato thau akaok thau iku, thau angaok thau ala. Piah ka anek kamuan hu nao tal sang bac, harei akaok adit, taha Đến nao takai yaok tuk ba dom anek naih trun ceik gam dok sang mik va. Bruk ruak kik di anek saih jeng hu taha Đến tui iek, khan brei amaik ame thau chip piah piah mai raok anek nao iek glang. Taphia di nan, taha dok hu kakei mik va jhui jak tah glai, jak ba mik va brei thau khik glai piah duik. Biak uan tabuan lac dalam palei hu biak rilo urang bac megru tui taha Đến bo jeng menuac jeng urang, hu ba tame Đảng. Urak ni dalam palei hu 9 urang Đảng.

Phó Bí thư xã Trà Giang Hồ Văn Trường ndom lac, meyah oh hu taha Đến, bruk khik ramik dom boh sang di labik ni gaok biak rilo kan kandah dalam rilo janih, abih di nyu nan lac jalan mbak nao mai. Hu taha Đến bo mik va thau jum patom yam tagok dalam rai duik./.