Huyện bhum ceik Bac Aí, tỉnh Ninh Thuận hu labaih 90% urang bangsa Raglai, ini lac labik duy nhất di tỉnh hu peih ngak Sarak 30a di Rajaei ka brukpa trun kan kathaot samar saong khang kajap. Tapa 5 thun peih ngak Sarak 30a, bruk patruh eik patrun kathaot di huyen Bac Ai hu rilo siam mekre. Min, bruk patrun kan kathaot biak samar di huyen Bac Ai ba tal bruk kurang khang kajap saong mbuan ngak brei kan kathaot veik. 

Phước Thắng lac xã tái định cư jaik 10 thun ini mai, min raidiuk bhap bini daok rilo kan kandah. Abih tih taneh ngak ngak nong hu 4.730 ha, min yaok thun bhap bini xa Phuoc Thang pala drak tok hu meteh taneh nan, taneh daok veik klak saoh kayua taneh jhak oh pala drak hu. Langiu di nan, xã ini hu 96 baoh sang oh ka hu brei ginup taneh pala drak saong 181 gu diuk pasang birau tok gauk oh hu taneh pala drak. Piah ngak mbang duah jien, ralo urang mai veik palei klak, daok veik nao ngak mbang apah di dom palei karei. Thun 2012, xã Phước Thắng hu 445 baoh sang kan kathaot, tal thun 2013 sang kathaot daok 397 baoh. Xã Phước Tiến lac labik hu bruk ngak nong cakrok, lac labik ngak padai rilo abih di huyện Bác Aí, min baoh sang kan kathaot thun 2013 bahrau trun hu 5,25% Dalam tuk nan, xã tái định cư Phước Thắng daok rilo kan kandah bo trun hu tal 7,1%. Amuk Tà Yên Thị Lâm Hội, Phó akok UB bhap bini xã Phước Thắng, huyện Bác Aí, tỉnh Ninh Thuận brei thau:"Urak ini, baoh sang kan kathaot di xã daok labaih 46%, nan ye xã Phước Thắng jeng daok biak rilo baoh sang kan kathaot. Min, yaok thun khol dahlak hu nao pasang iek baoh sang kan kathaot saong jak ba mikva kham merat ngak mbang tabiak truh kan kathaot, nan ye baoh sang kan kathaot dak harei dak siam tagok  min jeng daok hu rilo".

Tui kuhria, thun 2013 huyện Bác Aí hu 651 baoh sang tabiak truh kan kathaot min jeng hu tal 185 baoh sang kan kathaot birau, dalam nan hu 66 baoh sang kan kathaot veik saong 1.140 baoh sang jiak si kan kathaot, rilo jang 222 baoh sang dut saong thun 2012. Baoh sang kan kathaot birau saong baoh sang jiak si kan kathaot rilo jang dua mbang dut saong baoh sang tabiak truh kan kathaot. Tapa nan yau brei mboh, bruk patruh eik patrun kathaot di huyện Bác Aí daok kurang khang kajap. Yau ye xã Phước Trung thun 2013, baoh sang kan kathaot di xã meng jaik 42% trun daok 33%, yaok thun trun jaik 9%. Min, kayua bilan padai Đông Xuân pandiak bhang tua riya dui atah, xã ini hu 212 baoh sang njauk daong brah mbang. Sa-ai Katơ Thương, xã Phước Trung, huyện Bác Ái, tỉnh Ninh Thuận, lac: “Dahlau diah, dahlak lac sang kan kathaot, bo dahlak tabiak truh kan kathaot hu 3 thun ini ye meng hu karja daong biak rilo yau limo, pabe, pabo ka drei ngak mbang, brei pajaih yaok thun, hadei di nan karja daong padang sang daok dahlak ngak mbang tabiak truh kan kathaot hu 3 thun paje".

Ngak nong lac bruk ngak mbang duah jien di rilo baoh sang kan kathaot pak huyen Bac Ai. Min, kayua ilamu pala drak daok biar, kurang jien buh tame nga, jien duah hu meng bruk pala drak tok ginup mbang, oh hu labaih, yau nan ye tuk gaok bala meng langik tasik ye urang ngak nong gilac veik kan kathaot. Amuk Pi Lao Thị Huynh, Phó akok Uy ban bhap bini xã Phước Đại, huyen Bac Aí, tỉnh Ninh Thuan brei thau:“Diukrai meng bruk ngak nong, min ilamu pala drak daok biar, yau nan ye yaok thun oh patak pataom hu phun jien piah buh tame ngak mbang veik, baoh sang ini mbuan laik tame jalan kan kathaot veik”.

Bruk patruh eik patrun kathaot di huyen Bac Aí, tinh Ninh Thuan urak ini daok gaok rilo kan kandah, min baoh sang tabiak truh kan kathaot tuk halei jeng khan lac hu biak rilo. Dahlau di tuk peih ngak sarak 30a ka bruk patrun kan kathaot samar saong khang kajap, ye baoh sang kan kathaot di huyen bhum ceik Bac Ai hu labaih 60%, min hadei di 5 thun baoh sang kan kathaot trun daok 38%, kuhria rah tapa, yaok thun baoh sang kan kathaot trun 8%, rilo jang 4% dut saong tanut di Quốc hội ba tabiak ka dom huyen kan kathaot. Ong Nguyễn Quốc Việt, Akok jabat LĐTB saong XH huyen Bac Ai, tinh Ninh Thuan brei thau:"Rilo danak dak tỉnh daong, min khol drei mboh daok rilo tavak tavaiy yau ye daong sa thun min, sa vụ hadei di tuk urang tabiak truh kan kathaot blaoh oh hu daong veik, oh hu dom sarak daong patui di nan, urang mbuan gilac veik kan kathaot. Daok urak ini meyah sarak di Karja brei daong dom baoh sang jiak si kan kathaot yau daong dom baoh sang kan kathaot dui atah meng 3 tal 5 thun ye baoh sang kan kathaot hu tabiak truh kan kathaot khang kajap".

Tukvak tapa, huyen Bac Ai, tinh Ninh Thuan kham merat rilo dalam bruk patrun kan kathaot. Min, bruk pasang iek, taong yaom baoh sang kan kathaot brei njauk bruk di nyu. Meyah taong yaom oh njauk meda ngak brei suan jalan di sarak patrun kathaot samar saong khang kajap dalam huyen./.