Jar var haong bruk ramik ngak veik paga pacang nền sang bahrau, diuk pasang ong Trương Thanh Long daok di labik 549/12 Nguyễn Đình Chiểu brei thau, dahlau daih jalan hẻm khut, mbaih, nao mai kan kandah, oh lagaih ka bruk pacang khuah padam khuah. Nan ye tuk mehit karja ieu alin hadaih taneh piah peih praong hẻm, sang ong samar pachreih tui. Baoh sang praong 5m di ong kadun tame jaik 1m haong abih tih mbaok taneh lac 5m2. Meng yaom taneh urak ini jaik 200 triệu đồng sa m2, binah taneh ong Long alin hadiah hu yaom tal labaih sa tỷ đồng: “Rilo menuac jeng mboh damen tuk lahik taneh sang. Min tuk rilo menuac jan nền, yah paga mboh jalan praong tabiak ye chreih chrai jak gauk ngak. Anak mata nyu kein ka drei, nền sang drei jan tabiak dahlau di abih lac drei pandar, hadei di nan meng tal urang karei, oh lahik nao halei. Dahlak mboh ini lac jalan ngak njauk, mikva dom hẻm karei njauk ngak tui”.

Jaik nan, rilo sang karei jeng daok sơn veik, ramik ngak veik sang danaok hadei di tuk jan klaak binah taneh anak sang. Thei jeng khan lac, sahneng kuhria rilo, oh khin brei, min hadei di tuk hu karja pathau khan, langyah  brei thau, urang meng njauk hatai alin brei taneh piah hu jalan praong laneing yau harei ini. Amuk Võ Thu Loan, sang daok di labik 549/67 Nguyễn Đình Chiểu brei thau, sang amuk brei labaih 3m2 taneh, meyah kuhria tui yaom darak pasar lac labaih 600 triệu đồng. “Tuk camereip jeng oh khin brei, mboh yau drei lahik hagait nan. Dahlau daih caik hu 3 sruh radaih, urak ini oh daok caik hu, min bui sambai alin brei. Peih jalan praong yau nan nyu hacih, mekre, mbaok meta jalan hẻm jeng hu hadah hadai”.

Amuk Nguyễn Thị Thu Dung, akaok UBND Phường 2 khan lac, jalan hẻm 549 Nguyễn Đình Chiểu atah 220m. Dahlau daih praong 3 tal 3 mét meteh min, khut, mbaih, radaih nao mai kan kandah. Nan ye meng thun 2019, Phường 2 peih bruk mek panuac bhap bini ka bruk peih praong jalan hẻm, tui jalan ngak lac "Karja haong bhap bini ba gauk ngak”. Phường hu brei phiếu mek panuac tal yaok sang piah thau hatai sahneng, hatai caong di bhap bini. Hadei di nan, brei padang 5 kapul jak ba, parabha tui yaok labik hẻm, taom gaok yaok baoh sang piah duah thau dom tavak tavaiy. Meng tari taring jak ba, dom sang pachreih tui dak harei dak rilo jang, meng 50% tagok tal 97% yau urak ini.

Meng sa jalan hẻm tok praong 3m, tuk ngak salah nyu praong jeng 5m, haong yaom jien ngak abih tih labaih 3,7 tỷ đồng. Urak ini daok 3 sang oh ka ndom biai hagait. Min amuk Nguyễn Thị Thu Dung, akaok UBND Phường 2 brei thau, dom sang ini njauk hatai pachreih tui paje, min oh ka jan hu kayua sang ngak biak khang, biak kajap: “Phường saong dom baoh sang jeng yau jabat chuyên môn njauk gauk jalan ngak lac anak tal tuk urang padang ngak sang bahrau meng kadun tame. Yau nan, drei ngak suai jang hasit duk haong dom sang dalam tukvak ini”.

Meng thun 2000 tal kreh thun 2022, dalam TP hu labaih 168.000 sang alin hadiah brei jaik 5,4 triệu m2 taneh, kuhria tabiak yaom jien lac labaih 10.050 tỷ đồng. Dom mbaok taneh ini piah ngak 5.230 danak dak. Langiu di brei taneh, mikva daok rik daong jien piah peih praong jalan, peih praong hẻm saong dom danak dak duh ka rahra haong yaom jien labaih 458 tỷ đồng.

Di nyaom biai pataom iek veik bruk alin hadiah taneh peih praong hẻm di thun 2022, akaok UBND TP.HCM Phan Văn Mãi brei thau, ini lac dom bruk ngak biak hu makna, pabak prein bahrau ka bruk cakrok: “Taneh di TP.HCM lac tấc taneh, tấc ameh, min tuk kol drei kayua kein laba di rahra, kayua bruk patagok di TP, dalam nan hu kol drei ye kol drei oh sahneng hagait tal bruk tấc taneh tấc ameh. Dahlak sahneng lac dom yaom glaong kol dei ngak hu, dak brei mboh bruk siam mekre, brei mboh ilamu di urang Sài Gòn, TP.HCM. Saong ilamu siam mekre ini, lac prein khang pabak ka bruk cakrok di TP”.

Urak ini, bruk alin hadiah taneh peih praong hẻm jeng daok hu peih tabiak ngak di dom quận, huyện dalam TP.HCM. Bruk ini oh lac daong ngak ka mbaok mata di TP.HCM salih bahrau, gheih mekre jang, raidiuk bhap bini hu siam jang, bruk pacang khuah padam khuah di labik daok di bhap bini jeng hu mbuan lagaih jang. Tapa nan brei mboh lac, tuk hatai sahneng di Đảng njauk haong hatai sahneng di bol bhap rahra, ye bruk hagait jeng ngak hu./.