Umo labaih 70 thun, sap daoh cải lương di Nghệ sĩ Minh Vương jeng daok biak bingi pang. Rilo menuac oh thau lac, 12 thun dahlau, Minh Vương sahneng lac drei diuk oh hu hadom tuk dalam rup njauk ruak suy thận ngak ka takai brah praong saong bruk nao jaman aih me-ik jeng biak kan kandah. Dom harei nan ong brei nduac thận, prein yava biak lamin lamuac saong mboh lac meng ini drei oh daok prein daoh pamere ka dom urang takre pang, takre maong drei daoh.

Hadei di sa tukvak tut angan tame cang pagam thận di sang iek ruak Chợ Rẫy TPHCM, patuah ong hu sa urang ikei umo 34 thun njauk matai glo akaok alin brei thận. Hadei di tuk blac raih alin thận, tal urak ini hu labaih 10 thun, prein yava Minh Vương jeng daok hu siam. Yaom lac umo thun glaong min jeng daok diuk saong daok abih drei ka cải lương, lac sa bruk dahlau daih oh khin sahneng tal di nghệ sĩ Minh Vương, meng tạng alin hadiah di urang matai glo akaok:

 “Dahlak hu yau ini, lac bruk oh sahneng mboh hu. Urak ini dahlak jeng daok daoh hu, daok dang hu anak urang maong iek. Oh thau anak tal yau habar, min daok prein daok sap ye dahlak jeng daok daoh. Biak thau dhar phor dom urang alin hadiah tạng daong menuac”.

Daok sa-ai T.Đ.Đạt, (umo 34 thun, daok di tỉnh Đắk Nông), hu pagam baoh hatai meng sa urang alin matai glo akok camreip abih di Sang iek ruak Chợ Rẫy di thun 2017 – tal harei ini, hu taduan tạng saong diuk mbiah tal harei ini yau sa bruk ginreih!

Dahlau nan, Đạt bac tamat tabiak ngak bruk hu oh ka tal 3 thun ye thau lac njauk ruak suy tim tukvak 1. Kayua huac nan ye dalam 3 bilan, Đạt laik tapa suy tim trak. Tukvak mboh lac ruak dui atah 4 thun, jien ndih iek ruak biak glaong (kayua rilo meng hồi sức tích cực), gam haong jien nao mai abih biak rilo, sang njauk pablei taneh saong rilo drap ar piah khik Đạt hu prein diuk.

Patuah Đạt lac urang ruak duy nhất dalam 40 urang ruak daok cang pagam baoh hatai – lagaih haong menuac alin tạng metai glo akaok, lac sa anai kumei umo 18 thun, njauk bala angaok jalan radaih di Đồng Nai. Sang biak kan kandah, Đạt daok hu sang iek ruak daong jien pagam tạng. Meng nan, hadei ini, Đạt jak ba urang ngak mbang haong drei, kaoh tabiak 30% jien laba piah daong tame dom bruk pagam tạng saong tim mạch di sang iek ruak Chợ Rẫy:

“Dahlau daih dahlak sahneng lac drei daok cang harei metai, oh eng drei iek glang rup thait drei hu, jien ndo jeng daok pagam pambak tame sang, tame gauk gar saong rahra. Urak ini drei hu siam lagaih, drei kuhria hu ka raidiuk di drei saong daong hu hasit ka menuac sia, ko bol bhap rahra”.

Gam haong bruk pagam baoh hatai ka Đạt ye 2 baoh thận saong 1 lá gan di anai kumei umo 18 thun ini jeng hu pagam brei ka 3 urang ruak suy thận, xơ gan karei. Daok hu biak rilo menuac yau nghệ sĩ Minh Vương, yau sa-ai Đạt hu diuk veik meng bruk klah rabha di dom urang alin hadaih tạng.

Labaih 3 thun tapa, amuk Tô Thị Ánh Hồng, daok di tỉnh Bà Rịa - Vũng Tàu jeng daok mboh hadah mbaok mata ka urang anek matai blaoh lac sa-ai T.H.P, kayua yaom lac anek di drei oh daok di dunya min nyu hu ba mai raidiuk bahrau ka 4 urang ruak karei tuk alin hadiah tạng.

Anek likei amuk Hồng hu tut angan alin hadiah tạng dahlau di nan. Oh patuah lac, tuk umo bahrau 25 thun, urang likei anek di amuk Hồng njauk bala radaih biak khang, njauk matai glo akaok, oh daok prein diuk veik hu. Sang brei alin hadiah tạng anek drei njauk yau hatai caong di anek:

“Anek likei di drei lahik nao lac bruk biak pandik harao. Anek tabiak nao brei veik bruk diukrai ka urang karei. Urang halei metai nao jeng nao veik haong cuah haong haluk, bo anek drei daong hu ka rilo menuac hu diuk veik. Dahlak jeng uan tabuan, jeng mboh biak hadah mbaok mata”.

TS.BS Dư Thị Ngọc Thu, Akaok kapul rami ramik pagam dom bộ phận rup menuac, sang iek ruak Chợ Rẫy brei thau, bruk nhân văn saong nhân đạo dalam  alin hadiah saong pagam tạng lac hu makna biak praong. Kayua yau nan ye, dom urang y tế ngak bruk gah alin hadaih saong pagam tạng tuk halei jeng ba y đức tagok dang akaok./.