Adei Thành Thập Đoan Trang, daok di xã Xuân Hải, huyện Ninh Hải metui amaik ame, adei daok hu amuk gah amaik umo jaik 70 thun iek glang. Thau hu bruk biak kan kandah di Đoan Trang, Kapul urang kumei xã Xuân Hải hu panuac ieu dom kapul ngak pahla ba tangin tame daong, gam haong nan, jak ba kalup kapul "Klah rabha anit ranam" taduan raong, daong khan ao, tapuk siphau, jien bac brei ka adei mbiah abih tal bac 12. Adei Thành Thập Đoan Trang khan lac: “meng di tuk amaik ame lahik, adei daok haong amuk…”

Diuk kumei di sa-ai Nguyễn Ngọc Thịnh, daok di palei Từ Tâm, xã Phước Hải, huyện Ninh Phước metai dalam mbang jit praong Covid-19 meng bloh. Sang kan kandah urak ini dak kan kandah jang tuk abih bruk kateik trak tagok dua gah bara di sa-ai. Meng bruk phụ hồ harei ngak, harei padeih, oh ginup jien mbang saong raong 3 urang anek nan ye sa-ai brei 2 urang anek praong padeih bac. Piah ka anek likei taluac di sa-ai Thịnh hu nao bac, dhar kapul urang kumei palei Từ Tâm hu taduan ngak amaik đỡ đầu ka anek likei di sa-ai. Meng pok jien jak ba hu, dhar kapul urang kumei palei hu daong ka anek di sa-ai Thịnh meng 200 – 300 rabau đồng yaok bilan. Sa-ai Nguyễn Ngọc Thịnh brei thau, meng bruk daong di kapul urang kumei hu daong ka anek di sa-ai yam tapa kan kandah piah bac da-a, jeng menuac siam ka puk paga, palei negar.“Dahlak jeng thau dhar phor kapul urang kumei xã, palei, hu panuac ieu daong ka anek di dahlak. Raong 3 urang anek jeng kan kandah lo, raong oh truh. Jeng hu kapul urang kumei daong tapa bruk Amaik đỡ đầu, daong ka anek mbang bac tal labik tal dhua”.

Pachreih tui danak dak Amaik đỡ đầu kayua Kapul Urang kumei Việt Nam pakat negar ba tabiak, tal urak ini, Kapul urang kumei dom pakat hu taduan ngak amaik đỡ đầu ka 118 uraniah metui hu raidiuk karei di gauk. Oh padeih di bruk daong pandap, dom pakat kapul urang kumei daok bhian nao ravang, pachreih ba dom adei dalam raidiuk.

Piah ka bruk Amaik đỡ đầu pambak tabiak, ba mai siam lagaih, dom pakat kapul urang kumei dalam tỉnh Ninh Thuận hu jak ba dom urang ngak pahla, dom doanh nghiệp ba tangin tame daong dom adei meng pandap panda tal bruk bac da-a. Sa-ai Nguyễn Bích Kiều - palei Phước Nhơn, xã Xuân Hải, huyện Ninh Hải, tỉnh Ninh Thuận brei thau: “hu mbaok tame bruk ngak amaik đỡ đầu, drei jeng hu hasit prein piah rik tame piah daong ka dom adei gaok kan kandah..”

Amuk Phan Thị Ngân Hạnh – Akaok Kapul urang kumei tỉnh Ninh Thuận taong yaom: Danak dak Amaik đỡ đầu hu peih tabiak meng thun 2021. Tal harei ini, bruk ngak ini hu pambak tabiak dalam dom pakat kapul urang kumei saong hu rilo urang ngak pahla daong brei. Ini lac danak dak hu makna anit ranam biak glaong. “Tapa danak dak, dom pakat kapul urang kumei hu ba tangin tame haong dom gah, dom pakat, karja palei, sangka daong, pachreih ba, yam takai nao gam haong dom adei metui gaok kan kandah. Anak tal, kol dahlak daok brei jhul khang bruk ngak ini, pambuak haong dom urang, menuac ngak pahla piah pabak prein khang, paglaong chất lượng danak dak piah hu rilo jang dom adei hu daong yam tapa kan kandah dalam raidiuk.

Bruk pambak tabiak di bruk Amaik đỡ đầu kayua dom pakat Kapul urang kumei tỉnh Ninh Thuận peih ngak hu ndung bak hatai anit ranam biak glaong. Yaom lac tukvak peih ngak oh ka lavik, min meda mboh lac, Amaik đỡ đầu lac bruk ngak biak siam. Hatai anit di dom urang jakar, urang kumei dalam kapul urang kumei dom pakat, saong bruk ba tangin tame di dom kapul nyaom, dom doanh nghiệp, urang ngak pahla, meda lac jalan peih tabiak ka bruk Amaik  đỡ đầu daok hu pambak praong./.