Rilo uranaih hu ndih tapui dalam tuk jit kan kandah 

Ndom tal COVID-19, meda lac urang halei jeng tateik drei mboh huac kayua nyu njaom mbak samar saong hu biak rilo menuac metai. Ngan saong dom urang khang kadang, COVID lac bruk biak huac ye ngan saong dom urang kumei metian, bruk huac nan daok khang jang tuk dalam tian daok hu anek kamar. Yau nan min, dahlak kham merat yam tapa huac kanda piah khau tin ka COVID-19 samar drah hu nao tal urang pang rayo, urang iek báo.

Dom harei akaok bilan 5/2021, tuk Bình Dương tamuh jit ruak COVID-19 jeng lac tuk dahlak thau lac drei metian. Mehit lac anek kumei di drei metian, amaik ame di palei biak uan tabuan min jeng biak duh hatai kayua labik anek daok lac labik pandiak di COVID-19. Kayua yau nan ye, dua klau harei ye di palei ieu phone mai tangi sua, kakei anek caik hatai sangka saong oh nao ngak bruk di dom labik hu rilo menuac ruak. Lac 1 phóng viên, dahlak mboh lac oh njauk,  tuk daok di sang likau tin, bài meng ayut sahabat atau tangi sua tapa phone, nan ye yaom lac mbuan gaok bala, dahlak jeng kham merat nao tal dom labik njauk nao piah duah khau tin. Mehit lac anek, taco nao tame labik hu F0, amaik ame ieu phone mai ndom lac: “anek likau padeih bruk mai palei plaih jit nao anek”. Dalam tuk ini, thei jeng nduac tame piah ba tin samar abih tal urang pang rayo, urang iek báo ye drei likau padeih bruk habar iek jeng? Piah ka sang jhui duh hatai, yaok harei drei jeng ieu phone ka ong muk, amaik ame brei thau lac drei oh njauk hagait, prein yava khang kadang min.

Tabung glaong lac di bilan 7/2021, Bình Dương lac labik hu menuac njom ruak glaong abih dalam taneh ia kuhria tui akaok menuac dalam tỉnh. Dom menuac metai kayua COVID-19 yaok harei dom pluh urang nan ye adei sa-ai tuk nao ngak bruk jeng biak huac, biak duh hatai. Hu dom ayut di dahlak ba diuk anek nao palei plaih jit kayua sang hu anek sit, amaik ame taha. Mehit bruk nan, sang gam gam ieu phone mai lac: “mai palei nao anek”. Jang tuk halei karei, dahlak mboh drei njauk daok veik, njauk nduac tame nan ye dahlak oh klaak nao.

Ngak bruk di kreh jit praong saong daok metian anek jeng lac kan var hu ngan saong dahlak. Dahlak daok kanal, piah vak kadha “Liều thuốc tinh thần di dom urang ruak njauk COVID-19 di Bình Dương”, dahlak hu nao tal Pasak Y tế Thuận An – labik daok taong ruak F0. Yaom lac hu adat di mBan tacei jalan pacang caga COVID-19 min dom bác sĩ oh brei kumei metian taom gaok urang ruak. Oh ngak karei hu, dahlak nyim bác sĩ mek phone tangin phỏng vấn urang ruak piah hu sap biai, daok drei dang gah langiu pambang camin tui iek, thaot mek. Hadei di nan, dahlak likau laik phone di menuac nan piah tangi sua dom bruk drei daok sangka. Tuk likau drei tabiak nao, dom bác sĩ oh var kakei drei lac nao sang hadar klung pabah meng ia sara, pametai anek ruak”.

Sa bruk karei kan var hu lac, dalam tuk ban sit Tân Uyên, ban sit Dĩ An, Thuận An ngak catang oh brei nao mai piah duah F0 ba tabiak truh bhap bini, min drei oh huac glaih glar, cuk khan ao bảo hộ yam tame gah dalam piah thau, piah mboh saong tangi sua bruk padam jit di dom puk palei. Tuk maong tame dahlak, dom bác sĩ bilai y tế lưu động kandang drei bloh ndom lac, anai metain bo pathui rup yau nan”. Dahlak klao lac: “bruk ngak yau nan ye”. Dahlak tame phòng trọ, sang rahra piah tangi sua F0 daok taong ruak di sang, dom bác sĩ bilai y tế lưu động daok hu kakei lac:  “sa-ai hadar pruh jru pametai anek ruak  saong takik gaok tame mbaok dom pandap nye”.

Atau hu sa mbang nao phỏng vấn blaoh mai sang, dahlak taduan hu phone di urang drei bahrau phỏng vấn nan khan lac: “adei bahrau hu test COVID-19, jeng F0 ye sa-ai lơi”. Tuk ini, dahlak mboh duh hatai kayua kol dahlak dang biak jaik gauk piah tangi sua, min kham merat pachreih ba rup drei lac, oh hu bruk hagait. Blaoh hadei di nan, dahlak brei daok pa-atah sang dalam phòng trọ di ayut 3 harei saong nao blei que test COVID ka nyu sahanag hatai blaoh meng mai sang.

Jeng meng bruk nao tal labik hu urang ruak, taom gaok jaik rahra, dahlak mboh        lac taphia dom bruk ngak hu dalam pacang caga jit di Bình Dương, jeng daok hu rilo bruk oh ka lagaih. Pagap yau bruk ban sit Tân Uyên ba rilo menuac medil lac njaom ruak tame daok dalam labik nhà xưởng oh khik hu salamat ngak ka rahra pandik hatai, brah carah pandap mbang oh nao tal tangin urang daok di dom labik sang pah dalam dom hẻm sit, rilo urang jakar  y tế oh caik hatai tal panuac rahra ieu daong…. Thau hu dom bruk nan, dahlak langiu di ndom tapak haong dom urang pan akaok tỉnh, daok brei thau tapa tin, tapa kadha vak. Meng nan, dom urang pan akaok tỉnh Bình Dương thau hu saong brei ramik ngak pasiam veik piah ka rahra sahanang hatai ba tangin tame pacang jit. 

Urak ini, tuk Bình Dương pasang iek hu jit ruak, min meda lac dom harei bilan rup metian nao grauk labik piah duah thau, piah ba khau tin dalam pasak jit jeng daok miat dalam hatung hatian dahlak. Saong bruk bui sambai, haniem phul jang ngan saong dahlak lac hu rik daong hasit prein yava piah ngak siam bruk pathau khan, ba jalan siam ka bol bhap rahra anak rilo khau tin suan ngak duh hatai rahra dalam tuk taneh ia daok khang drei pacang jit. Saneng tal nan, dahlak mboh hadah mbaok meta jang tuk drei lac phóng viên di sa jabat báo chí lambaok ka sap ndom di bhap bini./.

Urang lang: Mousaphuong- 30/1