Kreh kapul 8. Phuong Ayun Pa, labik bein sit di sa-ai Kpă Sa daok jeng labik mai tal bo rahra khan ka gauk yaok tuk duah sa labik sron mbon, tui ilamo di urang Jrai. Meng thun 2018, Sa ba tangin tame pasiam labik taneh piah pala drak, raong glang, ngak yaok mblang taneh, yaok talei phun hu tapak gauk, gheih ghang. Oh lac dang di bruk ngak gheih labik bein 200m², Sa daok brei thau ka dom kaya mbang bhap bini yau hala habei plom baoh traong phik, sara adam kanyik, dom kaya di urang bangsa Jrai di angaok mang xa hoi. Dom video, thaik thaot nan hu nao tame dalam hatai tian di bhap bini, piah ka rilo urang duah mai rivang me-in ilamo bangsa di taneh ini.

“Meng akaok meti jeng suh sah hatai, kayua bein di drei oh ka gheih, nan hu pasiam taneh pala njam, ramik veik bein habar piah maong iek brei ka gheih jang, hacih sa-at jang. Drei ngak bein ini meng 2018 2018, tal urak ini. Yaok harei drei jeng ramik ngak, ngak bein sahaneng labik ini ngak yau habar, labik diah ngak yau habar piah gheih meta jang, piah grauk urang chreih mekre jang.”

Tabiak truh di Ayun Pa, mai tal xa Ia Ly, bruk “Palei ilamo jirah rivang bangsa Jrai” di sa-ai H’Uyên Niê daok daong pamedeih dom palei ngak bruk bhap bini nda lac jaik kurang lahik. Mai meng bruk suh sah tuk mboh khan bai jih dalah, pak yaot atau thaok brah dak harei dak takik jang hu rah tabiak di raidiuk yaok harei, sa-ai gam haong sa kapul urang kamei dalam palei peih dom danak dak ba rivang me-in ka tuai damuai. Taong abih hu yaih khan siam lagaih meng fanpage di palei. Meng nan, urang kamei dalam palei gam hu jien mek tame, gam khik ramik bruk ngak bhap bini meng bruk ngak yaok harei di drei. Sa-ai H’ Uyên Niê brei thau:

“Dom danak dak hu angan makna di palei yau ye khan bai jih dalah, ndap nda pak gak, lasung thaok brah, ndap nda mbang huak yau ye tram brah, kaoh nding phun lo o piah tuai damuai tapak bruk brah tame nding lo o, am lisei lam piah mbang di bilan halei ye tuai hu mbang tui bilan nan. Pagap yau tukvak tabung glaong di puac thun nan lac bilan kophi tathak ye tuai damuai meda hu paik saong check in, thaot binguk.

Meyah Kpă Sa saong H’Uyên Niê pambak ilamo tabiak tapa labik saong ndap nda bhap bini, ye Rcom Bus – urang dam bangsa Jrai umo 23 thun daok di Pleiku ruah ragu ragam saong thaot binguk piah khan kadha Tay Nguyen biak gheih bangi. Fanpage “Tarzan Tay Nguyen” di sa-ai hu labaih 160.000 mbang pasang iek. Dom clip yuk tuwa tapgia jrai ia atau kajal ndik ceik dalam blah kadaop bhap bini ndung bak suan yava di ceik glai. Bus khan, meng sa urang lakei oh khang hatai, kanda pan phone di labik hu rilo menuac, sa-ai dak randap haong bruk ngak vlog saong khang hatai jang tapa yaok video. Oh bac phling ragam tani tanat, Bus jeng ngak jeng sa bruk karei. Rup pabhap khang kadang, mbuk atah, kalik tam bar saong hatai chreih chrai ngak ka sa-ai hu ieu lac “Tarzan Tay Nguyen”, Bus jeng sa “urang pambuak jirah rivang” di ini.

“Dahlak hulin yaih khan ilamo saong adat cambat di angaok mang xa hoi piah grauk urang thau tal ilamo Tay Nguyen hu dom kadha gheih biak rilo. Tay Nguyen lac sa hagait biak ginreih, taneh langik hlai haong gauk, biak gheih.”

Sa-ai Đỗ Đức Thanh, Phaok Bi thu bhian hu mbaok di Tinh doan, Akaok Kapul Urang kamei tinh Gia Lai mboh lac, ini lac bruk brei mboh cambaih laih ka bruk di salih lek taka so ngan haong dam dara. Bruk hadah krah di yaok urang oh lac daong dom urang nan patagok blaoh nyu daok pambak tabiak thaik thaot Gia Lai – sa bhum taneh ndung bak ilamo, siam mekre, rilo kein lagaih piah ngak jirah rivang.

“Dom ayut meda hu ndom ka abih urang thau hatai hadah mbaok meta jeng yau bruk drei daok ngak piah caong khin patagok rup drei. Tapa di nan dom ayut yaih khan thaik thaot palei pala, bhum palei gam song dom bruk karei piah thaik thaot binguk gheih bhum palei nao tal bhap bini, dui pachreih rilo jang tuai damuai mai tal bhum palei.”

Meng labik bein sit di Ayun Pa, tal dom daneing menyim jih dalah di Ia Ly atau sap tuwa sameng kreh ceik glai Pleiku…, dom dam dara bangsa takik di Gia Lai daok khan kadha ilamo di palei pala drei tui jalan ngak biak bahrau: hadah krah, bahrau saong hadah mbaok meta. Dom urang nan pambuak ilamo bhum cek glaong Tay Nguyen, daong ba thaik thaot Gia Lai mai tal jaik jang haong tuai damuai dalam saong langiu negar./.