Mai tal akaok palei Canh Tiến, xa Canh Vinh, tinh Gia Lai, sap adaoh uranaih mboh sameng sambai mai meng sang bac mam non hu danei tagok kreh labik ceik glai. Dalam tal bac sit hu 32 anek saih, dom adei chreih takre tamia tui ragam ragu papar tabiak meng tivi bahrau hu ramik. Sap ragam ragu, sap klao di uranaih pablah hlai tame saong gauk, ngak jeng sa ragam chreih chrai bui sambai. Adei Đinh Thị An, umo 8 thun, chreih chrai khan lac:

“Dahlau diah anek nao bac ye oh ka hu gom manyek ndien, jaik di ini nao bac ye hu gom ndien, hu tadik jamraik mac saong hu tivi, anek mboh nai gru pato biak mbuan thau, hu tdik mac nan langik pandiak mboh biak mat la-an.”

Hu 2 thun gam saong labik sang bac bhum atah bayah di Canh Tiến, nai gru Nguyễn Thị Mỹ Trinh, umur 28 thun, urak ini daok mboh katuak drei, drut druai ka dom salih bahrau. Kayua oh atah ralo di ini oh suai, labik ini daok kurang tal tuk, maong adaoh phling di angaok tivi hadah krah bahrau lac bruk biak kan si hu. Daok nai gru Trinh, luac 2 thun, yaok harei mai tal tal bac jeng lac yaok sa kan kandah. Luac jalan 20 km meng sang nao tal tal bac jeng kandah kandaiy, janal tachak, bilan hajan ye ndik gaiy gilai, nao jalan yeng lahik rilo tukvak. Min urak ini, yaok harei mai tal sang bac haong anai gru jeng lac harei bui sambai kayua jalan mbak hu lagaih.

“Tuk hu jalan bahrau nai gru nao mai mbuan jang, ndap nda kaya saong sang bac hu bah cur bahrau, tuk hu ndien hu daong anai gru saong anek saih hu iek tivi, hu adaoh tamia saong maong dom danak dak lagaih jang, daong gru pato pato siam jang”

Anek saih bui sambai, gru pato jeng chreih chrai jang brei ka dom salih bahrau di bhum palei Canh Tiến, xa Canh Vinh, tinh Gia Lai. Min bui sambai jang lac amaik ame di anek saih, kayua kein lagaih bruk me-in bac megru di anek kamuan hu ginup bak, dom urang nan meda sahnang hatai ngak mbang. Sa-ai Đinh Thị Yến, hu anek bac di sang bac tieu hoc Canh Tiến, brei thau:

“Dut haong dahlau diah ye urak ini ndap nda kaya mboh jeng siam jang, bambang di jalan hu paga gilac saong hu tivi, gruk pato peih ka anek saih iek dom danak dak jeng hu rilo. Mboh anek dahlak dut haong dahlau diah ye siam jang, anek di dahlak mai sang jeng thau adaoh tamia, puac ariya dut saong dahlau ye anek hu siam lagaih jang”.

Tui ong Dương Hiệp Hòa, Akaok UB Bhap bini xa Canh Vinh, tinh Gia Lai bhum palei hu buh jien tame 300 trieu dong ka dua labik sang bac uranaih mam non saong tieu hoc hu taong abih 5 aduk bilik bac, daong pasiam rilo ka kein lagaih pato bac:

“Tui hatai duh ka rahra dom gru pato jeng daok di ini saong hu danak dak pato bac khik kajap tui njauk adat. Anek saih di Canh Tiến biak chreih chrai, abih di nyu nan lac thun bac bahrau blaoh dom adei mbang akaok meti mboh hu pakak thun bac, dahlau diah dom urang nan biak kan kandah, gru pato brei mboh drei buh abih tung tian kayua dom urang nan mboh hu anek saih kurang nan brei hu pabak. Jaik tal xa pandar peih praong veik piah pasiam co so vat chat khik kajap ka dom adei anek saih piah pabak hu hatai caong pato saong bac megru”.

Kreh ceik glai praong, dom tal bac hadah gom di Canh Tiến harei ini oh lac bruk bui sambai di uranaih, bo daok lac bruk brei mboh dom kham merat oh padeih, di gru pato, di karja palei saong bhap bini. Canh Tiến jeng yau rilo bhum kan kandah karei di tinh Gia Lai jeng daok hu Karja buh jien tame samu gauk, hu ginup kein lagaih halai ragam patagok gam saong jaman bahrau./.