An Giang hu langik tasik alin hadiah brei rilo labik gheih, mekre, dui pachreih tuai damuai atah jaik, yau ye: Labik ravang iek pakat negar ceik Suan (núi Sam), núi Cấm, glai glam Trà Sư ... Ini jeng lac labik hu rilo inem krung sajarah – ilamu hu makna praong kak kajap haong bruk cakrok patagok bhum taneh An Giang, Nam Bộ meng kan dahlau gam saong dom anh hùng, menuac hu angan, urang buh prein ka taneh ia, pagap yau: Labik pahadar Chủ tịch Tôn Đức Thắng; inem krung sajarah lăng Thoại Ngọc Hầu, inem krung sajarah Ilamu Óc Eo… Nan ye, An Giang hu taong yaom lac labik nao tal salamat, menuac sia rap ar tuai damuai, yaom jien nao ravang me-in mbiah, lap, hu rilo labik ravang iek.

Hadei di tuk jit Covid-19 cadu trun, gah du lịch An Giang hu rilo jalan ngak samu gauk, jhul khang pathau khan, yaih khan ka ravang me-in An Giang di mangaok dom janih khau tin, salih bharau jalan ngak, jalan yaih khan saong patagok angan du lịch tui jalan chuyên nghiệp saong kein lagaih, patagok bruk pambuak bhum dalam bruk ngak du lịch, buh jien tame ngak jalan mbak haong rilo janih karei karei… meng nan, bruk du lịch – ravang me-in di tỉnh hu tagok veik khang kadang.

Sa labik ravang me-in bahrau  di An Giang lac Labik du lịch sinh thái Cồn Én daok di palei Tấn Long, xã Tấn Mỹ, huyện Chợ Mới. Yaom lac bahrau peih tabiak taduan raok tuai di tuk dahlau Tết Nguyên đán meng blaoh, min daok jeng labik dui pachreih tuai kayua hu rilo labik gheih mekre, ndung bak kraong ia miền Tây. Ong Phan Văn Khánh, Khik ramik labik du lịch sinh thái Cồn Én brei thau: “Kol dahlak ba tame ngak tukvak ka 1, haong dom bruk me-in di ia yau: cano jacky nduac ala ia, labik menei di kraong, langiu di nan daok hu rilo kadha me-in meng kan di bhap bini, kol dahlak jeng hu peih labik mbang menyum haong dom janih pandap mbang di bhum kraong Mê Kông”.

Thạc sỹ Dương Đức Minh, Phaok akaok Viện Roh duah Patagok kinh tế saong du lịch ban raya Hồ Chí Minh mboh lac, An Giang lac labik hu rilo prein khang, siam lagaih piah cakrok du lịch. Min piah khik takai tuai damuai, An Giang brei pambuak gauk ngak siam bruk du lịch tâm linh, haong ravang iek puk palei, bhap bini, du lịch sinh thái.“An Giang lac labik pataom biak rilo dom yaom glaong hadah krah saong langik tasik gheih mekre, jeng yau du lịch ilamu. Dalam tuk peih ngak dom kadha roh duah dom danak dak di An Giang, kol dahlak jeng hu pamaong tal dom bruk nan lac: du lịch cộng đồng pambuak pagam haong dom labik inem mek ilamu tâm linh ceik Suan. Ini lac sa dalam dom labik meda daong ngak jeng dom yaom glaong dalam raidiuk, ilamu, hatai sahneng tui jalan văn minh, rik daong paglaong siam lagaih du lịch di An Giang anak tal”.

Dalam thun 2022, An Giang taduan raok 7 triệu 500 rabau mbang tuai. Daok meng akaok thun tal ini, An Giang hu taduan raok jaik 4 triệu 500 rabau mbang tuai. Dom tuai mai tal An Giang tagok glaong lac bruk njauk bui sambai, saong lac prein pachreih ba ka An Giang khang hatai pasiam veik, patagok du lịch jeng gah ngak mbang praong. Ong Nguyễn Khánh Hiệp, Yam ndok Sở Ilamu, Thể thao saong Du lịch brei thau:“Piah ka du lịch biak biai lac bruk ngak mbang kinh tế praong, anak tal, njauk pataom tame cakrok dom bruk yau: padang ngak hạ tầng, abih di nyu lac hạ tầng du lịch, pambuak tal dom labik du lịch di tỉnh, saong pambuak pagam haong du lịch di tỉnh karei. Padang dom labik, dom bruk ravang me-in karei ndung bak angan di An Giang. Patui jalan ieu da-a urang buh jien tame ngak mbang, piah ngak jeng dom labik ravang me-in, dom labik me-in sambai, padeih padei, pabak hu hatai caong dak harei dak glaong di tuai damuai”.

Gah du lịch An Giang daok kham merat tal thun 2030, dui pachreih hu 8.300.000 mbang tuai, dalam nan, tuai daok veik lac labaih 1 triệu 700 rabau  urang. Abih tih jien mek tame meng du lịch thun 2030 lac 6.600 tỷ đồng. Meda ndom biai lac, bruk patagok siam dom tuai dalam taneh ia, tuai dunya saong jien mek tame meng bruk ravang me-in, gah du lịch daok brei mboh jalan ngak njauk dalam bruk jhul khang, cakrok patagok du lịch./.