Hadei di tukvak buh jien tame ngak saong ba tame ngak iek, harei 18/1 meng blaoh, bruk du lịch Làng bè canah klau kraong Châu Đốc, di ban sit Đa Phước, huyện An Phú, tỉnh An Giang hu peih tabiak. Palei bè hu labaih 160 bè raong ikan di rahra, hu sơn tagok 6 sambo mau lac bhong maraik, kanjik, katam, lục, lam, tím… ngak jeng thaot binguk biak gheih makre. Meng di tuk hu peih tabiak, palei bè ini taduan rok hu labaih 3.000 mbang tuai yaok bilan. Saai Võ Thị Minh Uyên, sa urang tuai mai meng TP. Hồ Chí Minh brei thau:

 “Dahlau deih tuk adei nao, palei bè ini ka oh hu sơn sambo mau, urak ini mai tal pak ini hu mboh salih bahrau, sơn yaok sang bè yaok sambo mau, maong mboh biak makre saong mboh lanieng lanoi, haci hacih. Adei sahaneng lac meda pambuak haong dom labik du lich ilamo tâm linh di pak ini piah ngak jeng sa tour dui pachreih tuai meng grauk labik di Việt Nam mai rivang iek. Ini jeng lac ilamo gheih mekre di bhum ĐBSCL”.

Di huyện Chợ Mới, jaik 2 thun mai ini, dua labik du lịch sinh thái jeng hu ba tame ngak nan lac Labik du lịch sinh thái Cồn Én saong Labik du lịch sinh thái Mỹ Luông. Dua labik du lich ini hu rilo labik gheih, makre, ndung bak ilamo di gah Pai negar bhum kraong ia, yau ye dom mblang manei pambuak haong labik ma-in mala ia, labik nhà hàng, labik pablei pandap lưu niệm, ghe gilai, dom kathaop piah ka tuai padeih takai check-in… Ong Nguyễn Văn Nghỉ, po Labik Du lịch sinh thái cồn Én brei thau, yaom lac labik du lich ini hu ba tame ngak labaih sa thun saong hu taong yaom lac labik tal pachreih hu tuai damuai saong biak siam makre di bhum ĐBSCL. Min, jalan mai pak ini ka oh hu lagaih, nan ye tuai mai jeng daok takik:

“Di labik du lich ini, yaok tuai mai tal ma-in jeng ndom lac hu bruk karei jang. Labik ini nyu daok atah pasak, jalan nao kan kandah, hu labik sit atah labaih 2km, nan ye tuai mai ka oh hu yau hatai caong di drei. Labik daok veik ka tuai daok hu padang ngak, tui kuhria dalam thun ini lac ngak salah. Caong lac tukvak anak tal jalan mbak praong lagaih jang, meda pambuak hu rilo labik haong gauk, piah ngak jeng chuỗi, piah ka yaok tuai atah jaik mai tal rivang ma-in, duah thau; ye labik di drei meda taduan raok tuai hu rilo jang”.

Tui Sở Ilamo, Thể thao saong Du lịch An Giang, thun ini, gah du lich An Giang ba tabiak bruk lac raok labaih 9 triệu mbang tuai dalam saong langiu taneh ia mai rivang ma-in. Dalam nan, tuai daok veik tui kuhria hu 800 ribau mbang; jien mek tame meng bruk du lich tui kuhria hu labaih 6.200 tỷ đồng. Piah ngak hu bruk ba tabiak ini, gah du lịch An Giang daok peih ngak dom pandap jit vu du lich hu blaoh, oh padeih padang ngak saong ngak bahrau pandap du lich pambuak haong prein khang di palei; piah padang labik tal, pabak hu caong khin, hatai takre di tuai damuai. Ong Phạm Thế Triều, Phó Yam ndok Sở Ilamo, Thể thao saong Du lịch An Giang brei thau:

“Gah du lịch rivang iek, padeih padei: peih ngak, cak rok pataggok dom pandap du lịch pambuak haong bhum Thất Sơn huyền bí. Du lịch sinh thái, kraong ia: pataom tame peih ngak cak rok patagok labik du lịch sinh thái glai tràm Trà Sư; labik rivang iek du lịch 3 xã Cù Lao Giêng; labik rivang iek darak angaok kraong Long Xuyên pambuak haong rivang iek labik lưu niệm Chủ tịch Tôn Đức Thắng; labik rivang Palei bè haong Palei Cam Châu Phong…”.

Taphia di nan, tỉnh An Giang daok buh jien padang ngak cơ sở vật chất ka nyu samu gauk, bahrau saong cak rok patagok dom pandap jit vu du lich hu chất lượng glaong, rilo janih, hu angan je, ndung bak ilamo bangsa, brei mboh labik du lịch An Giang lac labik tal salamat, siam mekre, pachreih tuai damuai./.