Daok yam takai nao angaok jalan haluk dalam labik Bein Negar Yok Đôn, dalam xã Krông Na, huyện Buôn Đôn, tỉnh Đắk Lắk, lamen binai H’Blú mboh pandap mbang ye samar brei sap ka drei lamen karei thau. Tui taok lamen H’Blú, lamen binai Khăm Phanh jeng samar yam mai gah anak piah mbang dom phun patei hu kaoh blaoh. Hadei di tuk mbang blaoh, kol nyu nao gah takai kraong menyum ia, menei ia piah ka tuai maong iek.

Yaok bruk ngak di 2 drei lamen jeng tui hatai nyu eng, oh lac kayua menuac ieu nyu ngak atau ngak tui panuac di urang khik iek lamen. Tuai ravang iek dang di labik atah, khik kajap salamat, tui iek lamen saong pang urang hướng dẫn khan brei thau ka lamen, bruk pato pahat saong sangka khik iek yaok drei lamen. Sa-ai Phan Ngọc Quế Lâm, tuai daok di Quận 11, TP. Hồ Chí Minh khan lac:

 “Mboh lamen hu daok yau nan dahlak jeng biak uan tabuan. Lamen lac janih athur glai nan ye hu daok dalam glai nyu siam jang. Hu urang hướng dẫn khan brei thau rilo bruk di lamen mboh biak chreih chrai saong caong thau rilo jang ka lamen”.

Tui panuac di sa-ai Phạm Xuân Quỳnh, urang jakar danak dak di Kapul athur châu Á, dom drei lamen hu mbaok dalam danak dak hu nao mai dalam labik jaik dreih yau glai, oh daok njauk kak sring di anek menuac. Salih ka bruk daok angaok ka-ing lamen, tuai hu maong iek lamen meng atah, iek nyu mbang menyum, menei ia, kabak me-in dalam glai... bo oh gaok tapak tal raidiuk di nyu.

“Menuac khik lamen oh daok pan tui gai pasei, kapắc kayau, tok brei pandap mbang ka lamen nyu ngak. Drei ngak yau nan, lavik lavik nao hu daong ka lamen mai veik njauk haong bruk di nyu, thau labik duah pandap mbang, thau pasiam ruak saong thau iek glang gauk yau habar. Lavik harei lamen mboh chreih chrai jang ye prein yava jeng hu siam tagok. Pandap mbang pandap menyum ye njauk yau hatai nyu takre. Siam lagaih di lamen hu glaong tagok”.

 6 thun tapa, Bein Negar Yok Đôn taduan raok yaok rabau tuai mai ravang me-in, nao tui tour du lịch sinh thái siam mekre haong lamen. Thun 2023, tour ini hu Gah Kỷ lục Việt Nam brei angan lac 1 dalam 20 tour gheih abih di Việt Nam. Sa-ai Y Siêm Hđơk, hướng dẫn viên Bein Negar Yok Đôn mboh lac: Bruk brei angan ini, brei mboh lac siam lagaih ka lamen saong ka langik tasik, bo daok hu tuai damuai biak takre, biak pachreih tui.

“Tour ravang iek lamen urak ini lac tour dui pachreih tuai dalam saong langiu taneh ia rilo di abih, ba mai siam mekre ka lamen. Dalam tuk ravang iek lamen ye drei ngak ka tuai mboh anit ranam lamen jang”.

Ong Vũ Đức Giỏi, Phaok Yam ndok Pasak pato pakai môi trường & dịch vụ, Bein Negar Yok Đôn brei thau, Pasak daok kham merat padang rilo janih ravang iek jang piah dui pachreih tuai damuai.

“Bein jeng hu parabha tabiak dom tour ravang iek lamen meteh harei atau abih harei atau dom tour du lịch katut panak jang piah lagaih haong tukvak saong hatai caong di tuai damuai. Anak tal tuk “Đề án du lịch” hu ngak salah blaoh, Bein Negar Yok Đôn meda ieu urang buh jien tame pambuak gauk ngak, atau brei pah labik glai piah urang buh jien tame ngak patagok du lịch sinh thái di bein".

Rilo janih sinh học, rilo janih athur, phun kayau quý hiếm, Bein Negar Yok Đôn lac labik hu pandap mbang, ia manyum saong dom bruk lagaih ka tapon lamen sang di Đắk Lắk mai veik haong bruk diukrai di labik jaik dreih yau glai. Tapa nan, daong ka nyu hu khik iek suai lavik, khang kadang saong hu tự do jang, gam haong nan jeng ngak tabiak sa janih ravang me-in biak gheih, tok hu di Đắk Lắk./.