Saai Hà Vy, xã Phú Bình, huyện Phú Tân, tỉnh An Giang urak ini daok ngak bruk di dom labik ngak ia puh di saai Đào Trung Hiếu daok di xã Phú Bình brei thau lac: “Dahlau deih adei ngak ka Kadai mbang huak di tỉnh Bình Dương, meng di tuk tamuh jit ruak Covid-19 adei njauk daok di sang, hadei di nan ngak di palei. Adei ngak ia puh di ini jeng hu labaih sa thun paje; ngak di ini jeng mboh karo tani tanat”

Saai Đào Trung Hiếu – Po labik ngak ia puh di xã Phú Bình brei thau lac, dahlau deih saai hu ngak kong di Bình Dương. Atah di ini labaih 4 thun, saai mai palei piah peih mbang ngui meng bruk ngak ia puh meng kan lac kak. Piah peih praong labik papaok ia puh, tuk camriep dalau saai Hieu hu buh jien tame ngan haong paok jien labaih 700 triệu đồng, meng jien patak pataom saong jien nyim masaiy veik. Tal masa tukvak urak ini, gam phun jien buh tame tuk camriep saong phun jien masaiy blei pandap panda piah ngak ia puh bih tih jaik 2 tỷ đồng. Urak ini, yaok harei labik ngak ia puh di saai hu ngak tabiak saong ba pablei tabiak darak pasar labaih 3.000 mbaik ia puh. “Darak pasar blei ia puh hu Campuchia, Indonesia saong Thái Lan. Tui arak lakau blei ia puh, sa adit mada hu meng 4-5 chruh radaih pandap nda. Urak ini, tukvak ini daok patabiak harak lakau blei ia puh, gam haong labaih 46- 47 urang daok ngak ia puh ka adei. Jien pah urang ngak yaok harei bayar labaih 7 triệu đồng. Dom bilan rilo bruk abih di nyu ieu lac dom harei bilan jaik raya di Campuchia, tukvak masa nan njuak hu rilo urang jang, mada hutuk yaok harei tagok labaih 70 urang”.

Palei papaok ia puh ini mada hu meng labaih yaok piluh thun dahlau, pataom hu rilo urang ngak di puk palei Bình Thành. Mayah yau dahlau deih, bilau bingu phun sậy ieu lac janih piah ngak ia puh, bo njauk hu di dalam bilan ia tagok ia ndik. Masa ini, ia puh mada hu ngak meng bilau di phun đót, pandap hu blei tame meng dom tỉnh bhum Kreih negar, oh njauk daok cang tal phun ia puh yau dalau, yau nan ye bruk hu brei ngak luac thun.

Urak ini, bruk papaok ia puh hu dom jamraik daong ba, yau ye jamaraih cuh ốc tame gal ia puh, jamaraih yuak ka catang gal ia puh… brei ka ia puh biak khang, kajap saong gheih jang. Min, rilo meng lac dom bruk ngak dalam papaok ia puh jeng daok ngak meng tangin. Sa mbaik ia puh yaom lac gal meng nhựa atau gal meng kreim jeng tapa dom bruk ngak dak tame, papaok, kak, gianh… jamraik bahrau jeng oh salih hu bruk gheih makre meng tangin di urang ngak.

 Thun 2006, Palei papaok ia puh bilau sậy hu UBND tỉnh pok brei angan palei ngak kong sit - tiểu thủ công nghiệp. Urak ini Palei hu labaih 350 baoh pabung sang, gam haong labaih 700 urang ngak. Tui kuhria, yaok bilan, palei tabiak hu labaih 200.000 mbaik ia puh. Ia puh ngak tabiak oh lac pablei dalam taneh ia bo daok pablei tabiak negar langiu, yau ye Campuchia, Indonesia, Thái Lan... Kayua hu jalan pablei tabiak hu karo tani tanat, yau nan ye urang ngak ia puh hu raidiuk tani tanat. Tui kuhria hu jien mek tame meng 5 - 6 triệu đồng sa urang di sa bilan.

Piah karo tani tanat palei ngak, ba bruk ngak ka urang ngak di ini, UBND xã saong Dhar Gilang paraik sarak kanja huyện Phú Tân An Giang tuk halei jeng ba kein lagaih ka mikva hu pambuak haong phun jien brei masaiy mbang laba bier takik, daong ba ka bruk ngak. Bruk ngak nan oh lac brei duah jien mbang ngui tani tanat karo brei ka rahra di bhum palei, bruk papaok ia buh daok ba jien mek tame tani tanat karo ka rilo urang ngak di dom xã jaik taphia mai tal ngak. Saai Hồ Thành Thật, urang jakar khik ramik palei ngak, xã Phú Bình, huyện Phú Tân brei thau lac.“Palei ngak ini hu mada ba bruk ngak ka urang di palei pala, rik tame bruk tani tanat ka mbang angui an sinh xã hội. Dom urang ngak dalam palei oh daok sang kurang lipa, kan kathaot tra. Urak ini, bhum palei daok caga padang ngak sa HTX piah pambuak haong gauk, ngak jeng pandap panda “ia puh Phú Bình”, piah pablei tabiak tabiak darak pasar ngan haong yaom glaong jang”.

Palei ngak “ia puh sậy” di xã Phú Bình hu saong daok langyah ka bruk ngak biak siam, karo tani tanat jien mek tame ka rahra di ini. Kayua yau nan ye, bruk khik tani tanat saong cak rok patagok palei ngak ini, abih di nyu nan lac palei ngak meng kan di dalam tỉnh An Giang njauk hu sangka, daong ba samar drah, siam lagaih. Meng nan, oh lac rik tame langyah bruk ngak, paglaong jien mek tame ka rahra, salih jalan ngak mbang ngui; bo daok rik tame bruk khik ramik dom yaom glaong ilamo palei ngak meng kan di ini./.