An Giang, sa labik bhum taneh hu kraong ribaong, ceik can biak gheih, hu rilo damnei cerita dalam bhap bini, hu rilo inem mek sajarah ilamo, sang danaok kalan kien truc nghe thuat… oh lac sa janih daok khik inem krung dom danak dak meng jaman mukkei nao peih taneh meng dahlau, blaoh daok lac sa labik hu rilo sambo bar ilamo bangsa karei di dom bangsa yau ye: bangsa Yuen, Cam, Lo, Khmer daok diuk rai di bhum taneh ini. Langiu di nan, An Giang daok hu kein lagaih brei ka jirah rivang sinh thai karei yau ye: jirah rivang kraong ribaong, jirah rivang ngak nong… Ong Đặng Quốc Hưng, rahra di tinh Ca Mau brei thau, thun halei ong jeng mai jirah rivang di An Giang: “Ini ieu lac sa labik bhum taneh brei ka dahlak hulin hu biak rilo chreih dalam hatai! Kraong halau kraong Tiền, kraong hujung kraong Hậu nduac tame Viet Nam dahlau abih tapa taneh tinh An Giang, hu kein lagaih ka langik kraong ceik can glai klo, biak gheh ghang. Mai tal An Giang tal bhum taneh tapen negar, mai tal glai klo ceik can, mai tal taneran hamu padai, mai tal dom kraong ribaong; blaoh ragu ragam don ca tai tu; blaoh urang Cam, urang Lo, urang Khmer… ngak jeng sa ragu ragam dih tam tame gauk biak gheih bingi”.

Tukvak tapa, gah jirah rivang saong dom bhum palei, gah ngak mbang peih bruk jirah rivang di dalam bhum taneh tinh An Giang hu sangka buh jien tame ka jalan mbak sang danaok daok dang ha tang hu samu gauk, bahrau saong patagok dom ndap nda jitvu jirah rivang hu siam glaong, ndung bak ilamo bangsa; gam haong patagok bruk pato pakai dom urang ngak gah jirah rivang… Meng di nan, brei mboh labik dang di gah jirah rivang An Giang ieu lac sa labik mai me-in jirah hu karo salamat, siam mekre, dui pachreih tuai damuai.

Huyen Tri Tôn urak ini jeng sa labik mai me-in jirah biak njauk takre dalam jalan nao jirah rivang di tuai damuai tuk mai tal An Giang, oh lac danei angan ka thaik thaot gheih ghang, langiu di nan lac dom yaom kaom ilamo, bruk daok dang me-in di mikva bangsa Khmer… hu ngak jeng bruk njauk takre dalam bruk patagok jirah rivang di bhum palei. Ong Nguyễn Văn Bé Tám, Akaok UB Bhap bini huyen Tri Tôn brei thau: “Gam tame dom kein lagaih usaha yaom kaom di drei, bhum palei daok dak harei dak hu jalan ngak, pandar, ieu da-a buh jien tame saong ngak mbang pablei salih piah patagok dak yam pasampurna, salah blaoh majam he thong co so vat chat gah jirah rivang; piah Tri Tôn meda patagok grauk abih gah dalam nan hu makna abih lac brei gah jirah rivang di bhum palei”.

Tui So Ilamo, Pahat padhih saong Jirah rivang tinh An Giang, thun 2024, bhum palei An Giang hu taduan raok labaih 9 trieu mbang tuai damuai mai jirah rivang. Min, piah ka gah jirah rivang tinh An Giang jeng sa gah daong prein, hu labik dang hu makna dalam jalan patagok kinh te – xa hoi di bhum palei. Tukvak meng anak mai tal An Giang brei ngak bahrau saong paglaong dom ndap nda jirah rivang karei di bhum palei, kein lagaih njauk samu lagaih haong dom bruk gheih ghang hu dalau di bhum palei. Paglaong dom janih jirah rivang pagam haong dom harei raya, harei adat, ilamo, bangsa. Langiu di nan sangka iek praong bruk buh jien tame dom jalan mbak pambuak dom bhum taneh, labik jirah rivang saong pambuak haong dom tinh ban dalam bhum taneran kraong Cuu Long, Ban raya Ho Chi Minh, Ban ine Ha Noi saong dom tinh ban karei. Ong Nguyễn Khánh Hiệp, Yam ndok So Ilamo, Pahat padhih saong Jirah rivang tinh An Giang ndom mayai lac: “Tukvak anak mai tal An Giang patui buh jien tame padang jalan mbak, gom ndien, sang bac saong kadai; pataom tame dom jalan pambuak piah ngak jeng tapol jirah rivang; jeng yau ngak jeng bruk laneing lanoi ka dom labik jirah rivang. Padang hu dom ndap nda bahrau, dom ndap nda karei hu angan di bhum taneh An Giang. Patui patagok bruk ieu da-a buh jien tame piah hu dom ndap nda jirah rivang, dom labik me-in, dom yitvu jirah rivang yau ye: ndap nda mbang huak, labik daok, labik padeih padei… pabak ginup hatai caong di tuai damuai mai jirah”.

Ngan haong labik hu kein lagaih ka jirah rivang di bhum palei jeng yau dom hatai sahneng, jalan ngak saong dom jalan langyah cambaih laih gam haong hatai kham merat hu sa majam he thong chinh tri, bruk sa hatai daong prein di dom gah ngak mbang peih bruk jirah rivang, gah jirah rivang An Giang dak yam dak patagok saong jeng sa bruk daong prein patagok kinh te – xa hoi di tinh./.