Baoh sang ong K'Phân, urang ndang daok di palei 3, xa Đinh Trang Thượng, huyen Di Linh ieu lac sa dalam dom baoh sang ngak dahlau bruk pala kaphe asar siam. Ngan haong 3ha kaphe, mbang pala meng blaoh daong ka baoh sang ong paik hu 17 tan kaphe asar siam, ba mai jien mek tame yaok ty dong. Oh sa janih daong ngak meda kaya brei ka baoh sang di ong, K’Phân daok chreih chrai daong mikva mbon palei pasiam bein phun kaphe taha, tacei ba pagam pajaih bahrau piah tabiak rilo baoh saong asar siam. Ong khan lac: “Kaphe phun taha tabiak takik baoh, brei pagam piah pasiam veik bein phun kaphe. Drei tacei ba rahra raong phun kaphe pagam pajaih bahrau ye brei pabak ginup ia, khak drak ka phun cakrok patagok siam hu. Oh lac tacei ba, drei daok brei phun pagam piah rahra mai ngak, mikva brei hadar kham merat sangka, drak khak ye phun meng cakrok patagok, abih di nyu lac brei Túh pruh ia dalam bilan thu bilan bhang”.

Gam tui bruk ngak nong njauk lagaih, dalam nan hu dom janih phun yaom kaom glaong yau kaphe, durian, kruac bung, pala njou raong kain… yaom kaom pala phun di Đinh Trang Thượng oh padeih brei paglaong. Thun 2024, kuhria rah tapa yaok ha taneh pala drak di ini brei jien mek tame 125 trieu dong, kuhria tui yaok akaok urang hu 47 trieu dong.

Tui ong K'Đức, Bi thu Chi bo Palei 2, xa Đinh Trang Thượng, asal kadha hu makna piah daong ka bhum palei hu takai yam patagok khang kajap dalam tukvak tapa lac bruk naih gheih di dom urang ndang. Dalam palei hu labaih 200 baoh sang rahra, dalam nan hu 17 urang ndang tuk halei jeng ngak dahlau dalam bruk patagok bruk ngak mbang. Ong K'Đức daok brei thau lac:  “Chi bo jhul khang bruk peih ngak bruk pasiam bein kaphe, dom urang ndang dalam palei thei jeng naih gheih, patagok bruk ba drei ngak dahlau saong ba mai siam lagaih. Tuk oh ka tame ngak ye kuhria rah tapa 1ha tok hu meng 2 tal 3 tan asar kaphe, hadei di tuk pagam pasiam ye paik baoh hu tagok ralo dua mbang. Langiu bruk pagam pajaih kaphe janih bahrau, urak ini mikva dalam palei daok ngak bruk pala rilo janih phun, meng nan bruk siam lagaih di bruk pala drak dak harei dak hu patagok”.

Ong K’Đô, Phaok Bi thu Ndang uy, Akaok UB Bhap bini xa Đinh Trang Thượng brei thau, meng tukvak yaom kaphe trun biar, xa hu ba tabiak sarak ka bruk salih phun pala, pachreih patagok dom bruk pala drak bahrau yau pala njo raong kain, pala njam patam, pandar dom pajaih phun pala siam glaong. Dalam nan hu lac, bruk di dom urang ndang biak hu angan makna dalam bruk pathau khan, tacei ba mikva pandar jamraik tame bruk pala drak ngak kaphe.

Thun ini, gam saong bruk jhul khang dom danak dak patagok bruk ngak nong tui jalan karo kajap, xa pachreih patagok bruk pala kaphe huu co piah paglaong pandap kaya, pambuak haong dom gah ngak mbang pablei salih pataom blei pandap kaya nong piah khik kajap bruk pablei tabiak hu tani tanat ka urang ngak nong. Kham merat patrun dom baoh sang kathaot 2% saong parilo jien mek tame kuhria tui yaok urang hu 55 trieu dong. Ong K’Đô ndom meyai lac: “Tui tapa bruk jum tangin di sa majam politik ye rilo urang hu ngak dahlau, ngak siam lagaih dalam patagok bruk ngak mbang. Meng nan rahra ngak tui, daong jhul tagok KT-XH di bhum palei".

Urak ini xa Đinh Trang Thượng daok patui bruk patagok bruk di urang ndang, patagok bruk salih tapa ngak tui jalan ilamo khoa hoc ky thuat, jhul khang bruk pala drak tui jalan karo kajap, daong padang dom mbon palei dak harei dak siam makre gheih ghang, kham merat ngak jak jeng glaong abih piah salam uan Nyaom raya grauk dalam negar mbang ka XIV di Ndang./.