Sa di dalam dom danak dak brei ka gah kraong ribaong binek ia biak praong di Bhum taneran kraong Cuu Long hu Mentri Ngak nong – patagok palei palei (urak ini lac Mentri Ngak nong – Alam langik) buh jien tame ngak di tinh Kien Giang lac he thong kraong ribaong Cái Lớn – Cái Bé haong taong abih jien buh tame labaih 3.300 ty dong. Danak dak hu khin caong pasang iek ia mbak, ia meteh mbak meteh taba, ia taba, brei kein lagaih ka bruk ngak mbang tani tanat, karo kajap ngan saong dom bruk ngak mbang tui he sinh thai ka bhum mbang tui kein lagaih di 5 tinh Kien Giang, Hau Giang, Ca Mau, Bac Lieu saong Soc Trang.

Kien Giang ieu lac sa tinh mbang tui kein lagaih rilo abih meng danak dak biak praong ini. Bhum palei patak pataom kalih hu yaok pluh ty dong yaok thun kayua oh lac padang yaok pluh baoh bineik piah pasang iek njom ia mbak, oh ngak kan kandah tal jalan mbak nao mai di angaok kraong, daong brei kein lagaih patagok kinh te – xa hoi di bhum palei. Ong Lê Hữu Toàn, Yam ndok So Ngak nong – alam tinh Kien Giang ndom mayai lac: “Kol dahlak hulin pasang iek hu siam ia mbak – ia taba piah khik kajap dom bruk ngak mbang. Dua tra lac hu tani tanat dom bruk siam lagaih, tapa nan hu 5 bruk siam lagaih hu peih praong, abih di nyu nan lac dom bruk mikva urang ngak nong taong yaom glaong yau bruk hadang – padai, pala 2 bilan padai, patagok phun mbang baoh jeng yau bruk pala manaih – paneing – li-u di Gò Quao saong Châu Thành”.

Langiu di dom danak dak kraong ribaong praong kayua pakat nagar buh jien tame, dom thun tapa, dom tinh, ban bhum taneran kraong Cuu Long jeng hu pataom prein tame bruk ngak brei salah blaoh kraong ribaong di bhum palei piah patagok bruk ngak mbang, abih du nyu nan lac dalam gah ngak nong. Tinh Bac Lieu hu buh jien tame padang salah kraong ribaong, bineik ar brei kandauk di rilo bhum piah padang ginup ia, pacang caga ia mbak njom tame, pataom khik kajap karo ia taba brei ka bruk ngak mbang siam lagaih bruk pala padai – raong hadang di angaok labaih 40.000ha taneh. Ong Huỳnh Thanh Toàn – Akaok jabat Ngak nong saong Alam ban sit Giá Rai, tinh Bac Lieu brei thau, dom thun jaik ini meng hu dom ar bineik kandauk nan urang ngak nong hu salih tapa bruk ngak padai – raong hadang di angaok labaih 7.000ha ba patagok glaong jien mek tame. Ong Huỳnh Thanh Toàn daok khan lac:  “UB Bhap bini tinh buh jien tame beik bineik kandauk ini lac 21 baoh braong ye abih tih jien buh tabiak ka Danak dak ini lac 114 ty dong. Taong abih dom baoh braong kareik peih tui saka pabak ginup ia di gah Pato tacei ban sit Giá Rai biak hu siam lagaih. Nan ye kuhria rah tapa 1ha ka 1 bilan padai saong 2 bilan hadang ye 1 thun hadei tuk kaoh abih jien buh tabiak ye jien laba mek hu labaih 100 trieu dong nan urang ngak nong biak biak”.

Di tinh tapen tasik Soc Trang, Cống âu Rạch Mọp haong abih tih jien buh tame ngak 900 ty dong. Meng akaok meti danak dak hu daong pacang njom ia mbak, pataom khik ia taba brei kein lagaih ka bruk ngak mbang tani tanat, karo kajap ka bhum taneh labaih 19.000 ha. Danak dak ini jeng daong patagok bruk salih peih jalan ia nduac; brei pasiam palagaih bruk rao masam, rao rakun saong taoh tathuak ia, pasiam alam bhum taneh ngak danak dak. Akaok Uy mban Bhap bini tinh Soc Trang ong Trần Văn Lâu brei thau: “Hatai caong di tinh daok biak praong piah buh jien tame padang braong khik kajap ka jalan ngak hu ia pandar suai atah. Hu buh jien tame danak dak yau nan ye Soc Trang brei khik kajap hu ia pandar, pataom khik ia taba piah duh ka rahra saong patagok bruk ngak mbang, daong patagok kinh te di tinh dalam tukvak mai meng anak”.

Bhum taneran kraong Cuu Long saong jalan kraong hu rilo gilai ngak katial saong anak bruk srau kadau rah tabiak, kan kandah kan si thau di langik tasik ye bruk buh tame pasiam jalan ia kraong ribaong kandauk hu ngak praong, mata maong atah saong daok daong rahra bhum taneran kraong Cuu Long hu pala drak, raong kaya ikan dalam ia, khang hatai buh jien tame patagok dom bruk bahrau, ngak meda ka baoh sang saong rahra./.