Sa-ai Y Quân Hdok, urang bangsa Randaiy daok di mbon Alê A, phuong Ea Tam, Ban Buôn Ma Thuột, tinh Dak Lak bahrau hu tame ndang meng akaok thun ini. Sa-ai Y Quân ndom meyai lac, mboh dom urang ndang dalam mbon palei lac dom urang naih gheih, hu angan jia hu mikva jia tame nan sa-ai kham merat piah jeng urang ndang. Gam haong bruk ngak siam di sa urang ngak bruk di Kapul adaoh tamia ragam ragu bangsa Dak Lak, sa-ai Y Quân daok chreih chrai hu mbaok tame dom danak dak kapul dalam bhum palei. Sa-ai Y Quân brei thau: “Rup dahlak hulin biak sambai hatai tuk hu tame Ndang Cong san Viet Nam. Dahlak hulin brei tuk halei jeng kham merat buh prein tabiak bac megru, kham merat piah siam njauk angan urang ndang”.

Ong Lê Văn Nhuần, Bi thu Chi bo mbon palei Alê A, phuong Ea Tam brei thau: Kayua dalam bhum hu labaih 90% rahra urang bangsa Randaiy, rilo mikva nao ngak mbang atah yau nan ye bruk piah patagok ralo urang Ndang gaok oh takik kan. Yaom lac yau nan, thun 2024 Chi bo jeng ba tame hu 2 urang bahrau tame ndang. Tal ini, dalam chi bo hu 76 urang ndang. Dom urang ndang patagok bruk ngak tangung javap di drei: “Dom urang ndang daok ngak bruk di ini, atau daok ngak di labik daok jeng ngak siam dom danak dak pakacah di bhum palei. Abih di nyu nan jeng lac dom urang ndang daok di labik daok hu rik daong biak rilo prein yava jien padai drap ar saong panuac ndom biai piah padang bhum palei. Kayua yau nan ye bhum palei khol dahlak hulin thun halei jeng hu urang ngak bruk pakat mangaok taong yaom siam, dalam nan siam abih ieu lac di dom danak dak ka rahra”.

Tui dom bhum palei hu rilo urang bangsa takik, bruk duah mboh saong pato pakai, patagok ralo urang ndang oh lac sa janih njauk pilih ruah menuac naih gheih, blaoh daok ieu lac sa jalan brei pato pakai, paglaong ilamo gah politik saong pamedeih dom kein lagaih di bol bhap rahra dalam jammaah.

Thau truh gah brei ka bruk hu makna di bruk patagok ralo urang ndang, Dak Lak hu ngak blaoh saong daok patui ngak rilo jalan langyah piah brei kein lagaih ka dom urang ndang, langiu di nan lac dom urang ndang bangsa takik hu ba drei tame ndang. Gam haong nan, hu dom sarak daong ka bruk pato pakai ka ilamo ndom puac, brei kein lagaih piah ngak bruk ndang di bhum atah bayah daong paglaong bruk siam lagaih di karja. Ong Lê Nam Cao, Phaok akaok Gah Padang ngak tổ chức Tinh uy Dak Lak brei thau : “Pakat uy dom pakat hu caik hatai ka bruk pilih ruah dom anek kamuan urang bangsa takik piah payua tame dom sang bac bangsa gam daok gam bac pakat huyen saong pakat tinh. Yang ka dua, ngak tui dom sarak pilih ruah, ngan haong anek kamuan bangsa takik brei pilih ruah ramik ba tame dom jabat karja. Meng bruk ramik ini lac bruk biak hu makna piah pataom kapul urang jakar dang akaok dom pakat karja”.

Brei tui ka gah kinh te xa hoi, rahra di tinh Dak Lak, bruk patagok urang ndang dalam bhum bangsa takik oh lac hu sa janih makna chinh tri blaoh daok daong jhul tagok bruk salih karei taong abih di bhum palei. Dom urang ndang bangsa takik daok yau ye dom “talei pambuak” lagaih piah ba jalan, sarak di Ndang mai tal rahra, pabak hatai jia tame di rahra saong Ndang; lac sa talei pambuak khang kajap gul pataom gauk taong abih bangsa adei sa-ai; padang bruk daok dang hu ilamo; daong mikva patagok bruk ngak mbang, daong palagaih ngak dom jalan ngak ka bruk patagok kinh te – xa hoi bhum palei./.