Sajarah bangsa Viet Nam hu peih meng jaman Patao Hung ngan haong dom prein ngak di dom Patao Hùng lac pacalah ceik, bleik patau, peih taneh, padang jeng taneh ia Văn Lang. Piah pahadar phol dhar nan, dom rai rah urang Viet hu pok meyaom dom Patao Hùng lac Mukkei di bangsa meng yaok ribau thun dahlau.

Katmang Bilan Dalipan hu jak jeng, taneh ia hu bebat, Ndang, Karja saong Rahra drei dak harei hu sangka iek praong tal bruk duh dom Patao Hùng - Mukkei di bangsa saong sangka iek praong tal bruk buh jien tame pasiam labik Inem mek sajarah kalan Patao Hùng dak harei dak praong laneing lanoi jang, njauk haong angan lac labik duh paling mukkei di bangsa. Hadei tuk padang Taneh ia Viet Nam Dan chu Cong hoa, harei 18/02/1946, Chu tich Hồ Chí Minh hu ba tabiak Sarak brei adat ka dom harei raya adat praong yaok thun, dalam nan hu Harei pahadar Patao Hùng hu brei padei ngak 1 harei. Harei 2/4/2007, Rajaei taneh ia nagar Cong hoa Xa hoi Chu nghia Viet Nam hu brei adat ka urang ngak bruk hu padeih padei, hu mbang jien bilan harei Ngak pahadar Patao Hùng (harei 10 bilan 3 saka ia bilan).

Hadah chreih di dalam hatai lac “anek kacua padang peih adat”, labik Mukkei Patao ruah taneh ngak bal, rilo thun ini tinh Phú Thọ tuk halei jeng kham merat pataom tame bruk jak ba rik daong jien tame pasiam, padang kalan Po Hùng njauk saong angan Labik Inem mek pakat Negar hu makna, peih Raya adat Kalan Po Hùng ieu lac sa harei raya pesta di dalam taneh ia, labik pataom dom siam gheih saong brei mboh dom bruk siam gheih di ilamo bangsa, lac sa bruk praong glaong ka yaom kaom ilamo, brei mboh ginup glo akaok, jalan ngak, hatai sahneng praong glaong di rahra Viet…

Tui Mentri Ilamo, Pahat padhih saong Jirah rivang, dalam taneh ia hu 1.417 inem mek duh Patao Hùng saong dom urang jaman Patao Hùng, dalam tinh Phu Tho hu 345 drap ar pagam haong dom palei duh paling Patao Hùng, dalam nan Labik Drap ar sajarah pakat Negar praong abih dalam negar. Dom inem mek duh paling Patao Hùng gam haong dom adat, raya lang atah di grauk 3 gah Barak negar, Kreh negar, Meraong negar. Gam haong taneh ia, piah thau dhar phol tal mukkei saong dom Patao Po Hùng, dalam harei 10 bilan 3 tui saka ia bilan yaok thun, rahra bhap bini drei daok di langiu negar hu peih ngak harei pahadar Patao Po Hùng, padang labik duh paling Mukkei di Negar Patao Po Hùng di jabat Dai su quan saong Lanh su quan dom negar piah pabak hatai caong pamaong tal mukkei, taneh ia bangsa. Ngan haong dom yaom kaom karei nan, harei 6/12/2012 UNESCO hu mbaoh tangin brei angan Adat cambat Duh paling Patao Po Hùng ieu lac drap ar ilamo oh mboh di meta di dunya.

Harei pahadar Patao Po Hùng ieu lac sa bruk brei mbaoh sajarah karei dut haong dom negar karei dalam dunya. Bruk salih, patagok jeng sa raya adat pakat Negar (Chiat pahadar Patao Hùng – Raya adat kalan Đền Hùng) hu pataom prein khang di hatai gul pataom gauk di taong abih bangsa adei sa-ai, brei mboh taneh riya di negar drei tapa dom jaman rai patao, hu yaom kaom karo kajap lac sa bruk brei mboh taneh riya nagar di bol bhap rahra dom bangsa adei sa-ai Viet Nam.

Pahadar phol dhar di mukkei ieu lac sa bruk oh hu hagait do njauk brei khik ramik, patagok drap ar di mukkei hu paglaong tagok salih bahrau. Yau nan ye ngak bruk pahadar patao Po Hùng jeng ieu lac sa harei piah rahra bangsa taneh ia nagar Viet Nam meng Barak tal Meraong, grauk labik dalam negar, urang Yuen atau urang bangsa takik, tui agama atau oh tui agama, daok dalam negar atau langiu negar thei thei jeng pamaong tal Taneh Patao Hùng, labik pataom dom gireih di kraong caik ba hatai iek praong cuh gai nyang pahadar dom phol dhar padang taneh ia di dom Patao Hùng, rik prein khik ramik, padang taneh ia ginup meda piah ngak njauk hatai caong di urang jaman dahlau.