Daok raong amaik taha umo labaih 100 thun, hu 5 urang anek, amuk Lưu Thị Đứng, sa urang baoh sang jaik kathaot daok di palei Baoh Bi ni, xa Phước Thái, huyen Ninh Phước biak bui sambai tuk sang daok hu karja daong padang salah blaoh. Langiu di hu karja daong 90 trieu saong UB Bhap bini daong 12 trieu, amuk Đứng daok hu mikva, but pajaih brei nyim labaih 100 trieu dong jeng sang daok hu praong laneing lanoi. Meng harei hu daok dalam sang bahrau, baoh sang amuk Đứng yau hu yam tapa sa raidiuk bahrau, oh daok duh hatai ka yaok mbang hajan praong, angin khang.

“Tuk daok dalam sang klak ye rambah lo, dahlak hulin jeng kham merat ngak mbang rilo lo. Urak ini ka meng hu yau ini, dahlak hulin uan lo. Dahlak hulin biak thau dhar phol tal Ndang saong Karja hu daong ka dahlak sang daok. Meng nan Karja brei 90 trieu, hu urang brei 12 trieu veik, anek bik dahlak hulin jeng rik jien tame, hu rilo urang daong nan dahlak hulin bui sambai lo. Dahlak hulin jeng kham merat ngak mbang piah hu patruh kathaot yau urang”.

Tui ong Đổng Văn Ly, Akaok Uy mban mat tran Negar xa Phước Thái, huyen Ninh Phước, piah ka bruk brei oh daok baoh sang taik tahak hu siam lagaih glaong, urang jakar hu nao tal yaok baoh sang rahra, jak ba mikva ba gauk klah rabha, daong karja piah ka dom baoh sang hu salah blaoh:

“Khol dahlak hulin jeng jak ba mikva piah ieu dom baoh sang, but pajaih rik buh tame nan dalam bruk padang, rilo baoh sang hu jak ba baoh sang, but pajaih rik buh tame veik, hu baoh sang buh tame veik 20-30 trieu, hu baoh sang buh tame 50-60 trieu nan rilo sang daok hu padang biak praong saong laneing lanoi. Meng akaok meti khol dahlak hulin kuhria padang sang 35 mét, urak ini rilo sang peih praong jang dut haong bruk kuhria peih ngak di karja palei”.

Atah di ini masa 1 bilan, baoh sang ong Trương Minh Tuyến daok di palei Baoh Dana, xa Phước Hậu, huyen Ninh Phước jeng hu daong padang sa baoh sang Anit ranam. Tui ong Tuyến lac hu tani tanat labik daok, sang danaok ieu lac sa bruk hu makna di abih piah ka baoh sang ong patui kham merat uak drei tagok bruk ngak mbang patruh kathaot.

“Karja brei 90 trieu nan jeng biak thau dhar phol Karja. Hu sang danaok nan oh daok suh sah duh hatai ka hajan angin veik tra. Dahlak hulin biak thau dhar phol karja”.

Dalam tinh Ninh Thuan urak ini daok labaih 1.900 baoh sang taik tahak njauk brei oh daok ngan haong jien buh tabiak ngak labaih 120 ty dong. Urak ini, dom bhum palei dalam tinh daok pasamar peih ngak haong hatai kham merat di anak meta njauk lac brei salah blaoh jalan ngak “piah oh daok baoh sang taik tahak” dalam tinh dahlau harei 30/6/2025, lac samar drah jang 4 bilan dut haong jalan ngak hu ba tabiak di Rajaei. Piah salah blaoh jalan ngak ini, meng harei 1/4 tal harei 30/6, Ninh Thuan brei peih bruk “90 harei brei oh daok baoh sang taik tahak” di dalam tinh. Amuk Phạm Thị Bích Hà, Phaok Akaok UBMT Negar Viet Nam tinh Ninh Thuan caong khin lac:

“Khol dahlak hulin caong khin dom jabat, labik, kapul urang menuac hu hatai dhar phol pahla rik daong, pambak praong bruk “Trieu hatai anit ranam, ribau baoh sang haniem phol”, piah daong ka urang daong katmang meng kal dahlau, baoh sang kathoat, jaik kathaot hu dom baoh sang yau hatai caong khin, hu labik daok piah sahnang hatai ngak mbang”.

Yaok baoh sang hu padang tagok oh lac bruk ba abih hatai tian ngak bruk di dom gah saong majam politik blaoh daok lac bruk klah rabha, jum pataom, anit ranam gauk meng hatai “Kadaoh ley thau anit baoh pluai hai”, “hala siam papaok hala taik tahak” di sa bol bhap rahra. Ini ieu lac bruk daong prein, brei hatai jia piah ka urang kathaot uak drei tagok patruh kathaot, padang raidiuk bahrau saong jeng lac asal kadha piah ka tinh Ninh Thuan ngak salah blaoh bruk brei oh daok baoh sang taik tahak dahlau harei 30/6/2025./.