Yaok mbang hadah page ye lac Hop tac xa meyao meyit palei Katuh, di palei Cam Katuh, xa An Hải, huyen Ninh Phước mboh biak chreih chrai karon karang tuk hu radaih nduac tame tabiak, urang blei, urang pablei. Dom paok njam rabung hijao hu dom urang dalam kapul ba mai, daok dom urang daok dalam HTX ye peih bruk pataom, palih ruah blaoh ba tagok radaih. Sa-ai Châu Thị Trâm brei thau, sa-ai pataom blei meng harei akaok meti HTX palei Katuh bahrau padang tabiak, harei halei sa-ai jeng hu mbaok di HTX dahlau tuk 6 page.

“Adei daok di ini piah pataom blei rabung tei hijao ka HTX, hadah page halei jeng yau nan brei hu mbaok meng hadah page piah raok mikva dalam kapul ba rabung tei hijao mai. Patui langik, yaok harei hu meng 2 tal 5 rituh kilo rabung, langik pandiak lo ye rabung takik jang, daok bilan Dong Xuan ye hu rilo rabung tei lo. Meng hu HTX ini bo khik hu yaom tani tanat ka mikva dalam kapul.”

Xa An Hải ieu lac sa bhum palei ngak nong di huyen Ninh Phước saong jeng ieu lac bhum pala njam patam praong siam abih di dalam tinh Ninh Thuan praong labaih 300ha. Di thun 2010, mai meng jalan salih phun pala, phun njam rabung hijao hu pala saong hu rahra di ini ruah mek ngak jeng phun piah “patrun kathaot”.

Tabiak di palei Cam Katuh, xa An Hải, khol dahlak hulin duah mai tal palei Cam Caklaing, ban sit Phước Dân, huyen Ninh Phước.

Kreh di pandiak bilan 4, ong Dương Tài Tin daok di palei Cam Caklaing daok pasiam baoh tadai tuan, cakak ngak ka gheih phun hala, pabak veik dom phun ngak gheih ka labik jirah rivang sinh thai Sen Araphat. Ong Tin brei thau. Labaih di 10 thun dahlau, dom baoh sang rahra salih taneh hamu pala padai oh siam lagaih tapa pala caraih mek asar, mek kaduk caraih. Hadei nan, mboh rilo urang duah mai tal cuak thaot binguk, nan dom urang nan salih tapa ngak gah jirrah rivang:

“Akaok meti dahlak hulin jah peih taneh labaih 1 mẫu ngak padai, raong ada, min kayua lac bhum taneh dhaong nan hajan mai lac ia dauk abih, nan lac baoh sang dahlak hulin salih tapa ngak bruk karri. Tapa bac megru, mboh hu phun caraih lagaih haong taneh ini saong brei kein lagaih tagok dua mbang dut haong pala padai saong peih praong labaih 2ha. Hadei nan, urang jakargah jirah rivang hu trun mai ndom ka bruk pambuak bruk haong baoh sang piah ngak gah bruk jirah rivang sinh thai angaok mbang hamu caraih ini, tapa nan, baoh sang bac megu ka bruk ini saong mbaoh tangin peih bruk ngak jirah rivang.”

Tinh Ninh Thuan urak ini hu jaik 20.000 baoh sang mikva urang bangsa Cam, hu labaih 90.200 urang, meblah 12,3% rahra dalam tinh. Tukvak tapa, Ndang saong Karja biak sangka mikva urang bangsa takik, dalam nan hu urang bangsa Cam; tinh Ninh Thuan jeng biak sangka saong peih ngak rilo danak dak, sarak saong dom bruk tantu cambaih laih piah jhul patagok bhum urang bangsa Cam.

Ong Trần Quốc Nam, Akaok Uy mban Bhap bini tinh Ninh Thuan brei thau, kein lagaih ka co so ha tang, raidiuk di rahra bhum urang bangsa Cam dak harei dak siam saong tagok. Dom xa hu rilo mikva urang bangsa Cam daok rai urak ini rilo meng lac dom xa palei ngak nong bahrau. Ini lac sa dalam dom bruk jak jeng brei mboh hatai sangka biak praong di Ndang saong Karja:

“Di tukvak meng anak mai tal, khol dahlak hulin hu thau biak bruk patagok kinh te – xa hoi di bhum glaong, bhum urang bangsa Cam, urang bangsa takik diukrai lac sa dalam dom bruk blaoh tinh Ninh Thuan jeng sangka iek praong. Tinh jeng jao ka dom gah tantu cambaih laih, ba tabiak dom danak dak, jalan ngak biak cambaih laih piah peih ngak, ngak yau habar piah patui bruk brei kein lagaih, pambuak bruk pagam dom gah rik daong piah Karja pataom tame bruk buh jien ka bhum urang bangsa takik, dalam nan hu bhum urang bangsa Cam.”

Meng dom bhum palei kan kathaot, hadei 50 thun peih paha, meng hatai kham merat gam saong dom bangsa adei sa-ai karei di bhum taneh pandiak angin Ninh Thuan, bruk daong dil samu di Ndang bo, karja palei, mbaok meta dom palei urang bangsa Cam daok siam gheih salih bahrau, raidiuk mikva urang bangsa Cam dak harei dak trei sir, salamat haniem phol./.