Hu sa mbang mai palei Cam daok di xã Phan Hoà, huyện Bắc Bình, tỉnh Bình Thuận piah mbang menyum ndam lakhah di sa urang ayut, khaol dahlak mboh biak karei kayua lac lakhah dalam harei puac adit, bruk ini dahlau diah mboh biak takik di dalam bhap bani urang bangsa Cam.

Amuk Qua Thị Hồng Loan, daok di palei Lạc Trị palei plom, xã Phú Lạc, huyện Tuy Phong, tỉnh Bình Thuận, sa urang daok angui dat cambat tanarakun di urang bangsa Cam brei thau, lakhah caga meng kan dalau di urang bangsa Cam njauk ngak rilo adat yau: Adat duah thau, Adat juak mblang, adat klaoh panuec, adat raok metuw, adat taleih khan ao

Adat lakhah bhian hu peih ngak di dom bilan 3, 6, 10, 11 (tui saka bangsa Cam) saong njauk tame dom harei bingun, nan lac dom harei akaok adit hu aia bilan saong njauk tame harei angar, harei but, jip dalam adit. Harei but hu palih ruah ngak harei lakhah, kayua lac tui hatai saneng di urang bangsa Cam harei but nan lac harei baoh taneh calah tabiak jeng harei siam tuk canuah. Adat lakhah ngak dalam harei but hu makna lac caong khin brei caih anek caih taco rilo.

Amuk Loan daok brei thau, gam saong urang Cam, anek kumei dang tabiak ngak lakhah, nan ye tuk urang kamei bahrau prong ye gah sang kumei bhian dang tabiak palih ruah pasang likei ka anek kumei di drei tapa ong amuk binyuk. Dalam adat ngak lakhah di urang bangsa Cam jeng hu sa adat brei mnoh bruk oh brei ngak, gam saong hatai saneng lac yau Yuen lac: “Hu thờ hu thiêng, hu kiêng hu lành”.

“Meng kal mbang menyum Cam drei nyu hu rilo tukvak, ong danyuk, urang ba jalan nao dahlau tapa gah sang lakei iek yau habar blaoh ka mai puac panuac, blaoh tal klaoh panuac blaoh mbang menyum, blaoh tal harei mbang menyum ye gauk gah likei ba gauk mai. Ong danyuk nao dahlau, tal urang pasang blaoh gauk tian nao hadei.”

Adat lakhah di urang bangsa Cam oh lac brei mboh sa bruk prong di dalam baoh sang, but pajaih blaoh daok ieu lac vaktu masa piah ka mikva gauk gar jaik taphia dalam palei pataom mbaok, brei mboh bruk sangka, tadhau ayuh salam selamat ka likei dam kumei dara.

Ong Lâm Tấn Bình, sa urang main raagam ragu hu angan Nghệ nhân Ưu tú, daok di xã Phan Hiệp, huyện Bắc Bình, tỉnh Bình Thuận brei thau, ndam lakhah meng kan di urang Cam dahlau diah ieu lac yau nan, min urak ini, jaik abih dom baoh sang ranaih urang Cam pak ini njauk klaak meneng dom adat cambat meng kan bo tok ba gauk tabiak jabat karja tut tangin mek harak palakhah blaoh peih ngak di kadai mbang menyum …  

   “Daok di ray bahrau ini kayua dom dam dara ini nyu nao ngak bruk di karja ini luac harei meng di harei thom tal harei suk lac nyu jal val nao ngak bruk, tal harei sanecar harei adit ye nyu ba gauk nao pah kadai nha hang Yuen piah ngak lakhah.”

 Taphia di hatai saneng di yaok baoh sang, but pajaih urang Cam, gah ilamo jeng njauk roh duah ba adat lakhah di urang Cam (gam Awar gam Ahiar) tame peih ngak gilac di dom  khu resort, khu padeih padei, Pasak parang iek ilamo Cam..., 

Ong Thông Đinh Phụng, daok di palei Lâm Thuận, xã Hàm Phú, huyện Hàm Thuận Bắc, tỉnh Bình Thuận brei thau lac, tapa bruk padang ngak nan, piah brei ka dam dara uranaih urang bangsa Cam anit ranam jang ilamo adat cambat meng kan di bangsa drei, piah klah di maluh pablah ilamo di dom bangsa karei. Daong ka anek taco harei hadei thau khik ramik halau gha, yaom kaom ilamo yao klak meng kan di bangsa drei.

 Langiu di nan, tui ong Phụng bruk oh ka njauk sahatai saong gauk kayua sakawi di dua gah Cam Awar saong Cam Ahier mada ngak oh siam tal bruk njauk sahatai harei lakhah.

“Agama Bani saong agama Balamon yaom lac dua min nyu yau hasa, min urak ini gah kapul ngak bruk ka angan agama nyu oh ka sa hatai haong gauk, nan ye caong ka karja pakat angaok sangka yau habar ka nyu tani tanat jang. Urak ini karja daok hu jalan sarak pandar khik ramik saong patagok ilamo bangsa.”

Lambaok Ủy ban MTTQ Việt Nam tỉnh Bình Thuận brei thau, thun 2023, jabat hu peih ngak “Sakawi tui hatai jia di urang Cam” tỉnh Bình Thuận saong taduan mek hu biak rilo panuac rik daong di dom halau jeneng, urang ilamu saong bhap bani Cam Ahier saong Cam Awar.

Dalam tukvak mai meng anak tal, jabat meda patui veik jak ba halau janeng, tuan tuan gru urang hu angan je saong bol bhap urang bangsa Cam dalam bruk dak padang, ngak brei ka mikva njauk sahatai saong bruk padang tagok Hội đồng thẩm định piah awal jang bruk hu sahatai saong gauk, ba tame pandar “Sakawi tui hatai jia di urang bangsa Cam”.

Bruk peih ngak “Sakawi tui hatai jia di urang bangsa Cam” laik saong gauk nan lac bruk njauk ngak saong ngak tui hatai caong khin di bhap bani urang bangsa Cam, laghaih haong rai diuk bahrau harai ini, nyu hu asal ilamu piah palaghaih ka mikva urang Cam dalam bruk mong harei bilan piah ngak ndam metai, ngak ndam lakhah jang yau dom bruk ngak agama karei karei...

Adat lakhah caga di urang bangsa Cam brei mboh janih ilamo siam gheih dalam rai diuk di bangsa ini. Yau nan min, tukvak tapa, dom adat cambat dalam ndam mbang nyum lakah caga di urang bangsa Cam dak harei dak lahik nao kayua bruk tambuak talei ilamo. Kayua yau nan ye, meyah oh hu sangka padang ngak khik caga ilamu meda ngak lahik druh  yaom klak ilamo meng kan di urang Cam./.