Dom rup pathau, rup pathau yang Siva. Gom ngak gheih, kalaok bingu, njam hang, bimong ia hu thaik thaot, bingula mekre meta. Ngan haong dua plak tangin gheih ngak, urang ngak lan di palei Cam Hamu Craok hu ngak dom taneh lan thu lagu jeng dom ndap nda lan biak gheih oh labik halei hu. Sa-ai kamei Mai Thị Kim Hương, palei Hamu Craok, ban sit Phước Dân, huyen Ninh Phước brei thau:

 “Thaik thaot drei ngak tui hatai caong di tuai damuai. Hu tuai damuai chreih thaik thait ngak tapak mbaok, hu tuai ye cheih ndap nda oh tapak mbaok”.

Sa-ai Trượng Văn Tâm ngak lan meng umo 13 thun. Ngan haong hatai caong ba lan Cam Hamu Craok hu nao tal rilo labik, sa-ai Tâm brei nao bac thiet ke do hoa, hadei nan peih labik ngak lan gheih mekre. Meng ilamo bac hu saong bruk hadah krah di drei, sa-ai Tâm hu ngak taneh lan jeng dom ndap nda lan am tui jalan nghe thuat glaong, hu rilo nha hang, khach san, resort kakei blei piah ngak gheih mekre, parang iek, daong ka sa-ai Tâm hu jien mek tame meng 20 - 40 trieu dong/bilan. Sa-ai Trượng Văn Tâm khan lac:  

“Yaok harak kakei blei hu ngak sa thaik thaot karei gauk. Yaok harak kakei blei hu takik abih brei ka hu 2 - 3 ndap nda, salih gam gam”.

Dalam tukvak cakrok patagok, lan am Hamu Craok hu tapa rilo tukvak tagok trun, abih di nyu nan lac tuk meraik gauk haong rilo pandap lan  kong nghiep. Piah sumu lagaih haong bruk yam tame dunya urak ini, urang ngak lan di palei hamu Craok hu hadah krah ngak jeng rilo thaik thaot lan am, gam hu thaik thaot di muk kei meng kal, gam tui thaik thaok bahrau yau urak ini, meng nan paglaong yaom kaom ka lan am Hamu Craok. Bruk khik hu tamo ilamo bangsa, karei di nyu hu daong ka lan am palei Hamu Craok hu yaom meng yaok rituh ribau tal yaok trieu dong, gaok mai yaok pluh trieu dong. Sa-ai Đàng Thị Hoa daok di palei Hamu Craok brei thau: “Urak ini, kiak lan daok hu darak pasar kakei blei rilo. Thaik thaot danak lac dom kalaok bingu, tuai damuai jeng kakei blei rilo”.

Parilo thaik thaot piah pabak hatai caong dak harei dak glaong di darak pasar, min bruk ngak saong jalan ngak lan di palei Hamu Craok jeng daok ngak meng tangin. Meng dua plak tangin gheih, dua plak takai nao kadun saong paying vil gluh lan, urang ngak lan di Hamu Craok hu ngak jeng thaik thaot, ngak tapak mbaok, raoh mbeik, cih bingu hala ka lan am. Ngan haong bruk karei di nyu, puac thun 2022, bruk ngak lan di urang bangsa Cam hu UNESCO tut angan tame Harak angan ilamo oh mboh di meta brei pacang khik samar chip. Ong Vạn Quan Phú Đoan - Yam ndok Hop tac xa Ngak lan am Pablei salih saong Meyit meyao lan am Cam Hamu Craok, huyen Ninh Phước ndom meyai lac: “Mikva hu pataom tame parilo thaik thaot, dalam nan hu sa thaik thaot biak hu takre rilo lac dom klaih kiak lan…”

Urak ini palei Hamu Craok hu 2 HTX, 1 kongti saong 30 labik ngak lan am, pablei lan am gam haong labaih 300 baoh sang rahra ngak lan am. Urak ini, bhum palei daok quy hoach 4 ha taneh piah peih praong bruk ngak lan am ka dom urang ngak lan saong pabak hatai caong blei lan am Hamu Craok.

Ngan haong bruk sangka di Ndang, Karja saong hatai anit ranam bruk ngak hu khik ramik, pato bruk ngak ka rai hadei, bruk ngak lan di urang bangsa Cam meda hu khik ramik saong daok veik miat miat tui thun bilan./.