“Di bhum Cam halval, angaok jalan mai rivang palei Wa, dom drut druai saong anit ranam, likau ndua abih dom panuac Wa pato...” inil ac panuac adaoh di ragam Làng Chăm ơn Bác – Palei Cham dhar phol Wa padang jeng angan Rapaneh Amư Nhân, tuk gait tame jalan harat ragam ragu.

Rapaneh Amư Nhân, daok hu angan Lộ Minh Nóc, urang bangsa Cam. Ong Amư Nhân manek di thun 1952, di ban Phan Rang - Tháp Chàm, tinh Ninh Thuan. Ong tamat bac paneh ragam ragu di Nhac vien Ban raya Ho Chi Minh, blaoh tui jalan gam adaoh gam me-in campi, hu urang da-a me-in ragu ragam ralo labik dalam nagar jeng ye langiu nagar.

Kada adaoh Làng Chăm ơn Bác – Palei Cam dhar phol Wa kayua Amư Nhân dah paneh piah tame me-in harei raya Sap adaoh Làng Sen pakat nagar mbang akaok meti thun 1985, peih di Nghe An. Di harei raya, kadha adaoh di gait mek hu huy chuong ameh. Hadei di nan, ragam adaoh di gait mblan bak dalam nagar, hu ralo radaoh pilih adaoh, ralo danak praong adaoh tal Wa plih. Sang Adaoh Tamia Ragam Viet Nam mboh kadha adaoh ini hu angan praong hu da-a Amư Nhân tabiak Ha Noi, mek sap mek binguk piah prai brei ralo urang iek urang pang dalam nagar.

Làng Chăm ơn Bác – Palei Cam dhar phol Wa hu urang juru ilamo taong yaom glaong. Asar ragam ragu kadha adaoh bak dom hatai ranam bangsa Cam, nyu jeng ndam gam hu ragam bahrau, taneng tame ragam pok glaong hatai, tal jaik abih kadha yau ye ariya dah krah ndik tagok ceik glaong riyak praong. Brei ka ragam ragu hu 2 kaneng cambaic laic, gam hu hatai anit ranam pok praong pok glaong urang pan akaok nagar taneh ia, gam hu darah bangsa khang yau ye tasik rayak praong. Bhian bagian panuac adaoh yau ye hatai ndom mayai oh brei cang rami ramik baoh ragam. Kayua mai meng nan daong brei kadha Palei Cam dhar phol Wa di Amư Nhân jeng ragam tame hu dalam hatai jai manuac urang suai lavik.

Langiu huy chuong ameh brei ka kadha adaoh Làng Chăm ơn Bác – Palei Cam dhar phol Wa, rapaneh Amư Nhân daok hu dom myaom karei, yau ye kadha Hò ra khơi – Adaoh tabiak kulidung, mek pok mayaom lek Sa di Kapul Rapaneh Viet Nam; Mùa xuân đất Tháp dan saong Điệu ru đất Tháp mek hu huy chuong ameh di Mbang adaoh tamia bhap bini di ban Nha Trang jeng ye mayaom di Lien hiep di kapul Van hoc – Nghe thuat Viet Nam...

Njauk ndom mayai lac, A Mư Nhân sa urang rapaneh ragam hu angan di Kapul Rapaneh Viet Nam, urang hu buh ralo prein yava tame ragam ragu bangsa Cam, daong tame ralo janih kadha ragam ragu taneh ia nagar di jaman bahrau, ngak njauk tui Sarak karja 5 pakat nagar brei ka gah dak padang ilamo Viet Nam glaong bahrau, ndam gam ilamo bangsa. Nao tapa jalan ragam ragu chreih sambai, urak ini Amư Nhân jang daok paneh ragam adaoh, brei ba ka manuac urang ragam ragu bak dom taneh ia bhummi.