Danak dak jalan Vanh dai 3 Ban raya Ho Chi Minh nao tapa Long An atah jaik 7km, dalam nan hu dua banah: padang jalan saong bayar jien, ramik labik daok. Tal tuk ini, dom banah halei mbuan ye brei ngak dahlau ka salah blaoh. Tal urak ini dom baoh sang rahra daok dalam danak dak peih mbaok taneh hu brei taneh saong padang sang bahrau, rilo meng lac hu tani tanat dalam raidiuk.

Labik ramik labik brei daok di xa Tân Bửu caik ka dom baoh sang njauk kan kandah di danak dak jalan Vanh dai 3 Ban raya Ho Chi Minh tapa Long An praong labaih 3,5ha. Dom banah yau jalan mbak, taoh ia, pabak ndien, ia saong balai langyah ia nerak hu salah blaoh labaih 92%.

Amuk Phạm Thị Trà My, Akaok UB Bhap bini xa Tân Bửu, huyen Bến Lức brei thau, banah peih meng danak dak hu neh tabiak karei daok bruk ngak hu khik kajap. Rahra hu jao abih mbaok taneh, daok karja jeng kham merat piah urang dalam sang hu ramik labik daok drah samar di abih:  “Labik taneh ramik piah daok Vanh dai 3 praong 3,5ha, hu ramik 150 labik mblang taneh, daok labik Tân Bửu lac 83 baoh sang, Mỹ Yên lac 11 baoh sang. Ngan haong dom baoh sang njauk hatai ciuk mek taneh, karja palei ngak harak gar likau sarak piah dom baoh sang ini samar drah padang sang, tani tanat raidiuk”.

Ong Trần Thiện Trúc, Phaok Akaok mbang Pasang iek buh jien tame padang tinh Long An brei thau: Long An daok peih ngak rilo danak dak jalan mbak hu makna di negar, kan kandah praong abih di urak ini lac bruk peih mbaok taneh saong ramik labik daok, kayua hu dom labik daok hu rahra daok mbuah kan ka yaom jien bayar saong tukvak padang labik ramik daok karei suai. Langiu di nan, bruk pagam jeng ngak kan kandah tal hatai sahaneng di urang jakar, min, meng hu pato tacei tani tanat di urang dang akaok tinh, tukvak ngak dom danak dak jeng daok hu khik kajap. Long An daok kham merat piah meda salah blaoh banah peih paha mbaok taneh, bayar jien, ramik labik daok ka danak dak. Ong Trần Thiện Trúc ndom meyai lac: "Gam saong bruk peih mbaok taneh, urak ini taong abih bruk ba tabiak kuhria pasang yaok ye dom bhum palei hu ngak salah blaoh, daok brei yaom bayar jien. Kuhria dalam bilan 6/2025 brei mbaoh tangin ka jalan ngak taong abih saong bayar jien ka rahra. Gam haong nan, huyen daok peih ngak dom padang labik ramik daok karei. Daok ka tukvak ngak, kuhria dalam bilan 6 hu buh jien tabiak padang anak meta labik ramik daok karei piah jao ka rahra."

Ong Võ Minh Thành, Yam ndoc So Ngak nong saong Alam langik tinh Long An brei thau, urak ini, pakat huyen dang ka bruk bayar jien, peih mbaok taneh. Tuk klak pakat huyen, bruk ini mbuan ngak suai tukvak salah blaoh, kan kandah tal bruk pathau khan, jak ba rahra. Piah khik kajap ngak bruk gam gam, So Ngak nong saong Alam langik tinh Long An saong Tay Ninh daok nyaom biai gauk piah padang Pasak patagok kadung jien taneh daok di tinh (bahrau), hu bruk pambuak xa dang ngak bruk ini meng pakat huyen.

"Daok brei ka suai atah, tuk Uy mbang bhap bini pakat xa hu padang saong ngak bruk tani tanat tui jalan ramik ye So jeng pambuak haong dom labik pambuak nyaom biai ka bruk bayar jien, peih paha mbaok taneh tui jalan padang dom labik ngak bruk daok dalam Uy mbang bhap bini pakat xa, ngak bruk bayar jien, peih paha mbaok taneh. Tapa bruk bayar jien, peih paha mbaok taneh ye pakat labik ngak tapak bruk ngak ye hu lagaih jang".

Dom jalan lang ramik labik daok karei saong bayar jien di Long An daong paglaong siam lagaih bruk pasang iek, khik kajap tukvak ngak di danak dak. Bruk padang labik ramik daok karei, bayar jien samu saong padang Pasak patagok kadung jien taneh brei daong pacang khik bruk lagaih di rahra, jhul patagok karo kajap ka bhum palei./.