Mai meng bruk dak daong di Kapul Urang kamei xa Mỹ Thuận, huyen Mỹ Tú, sa-ai Danh Thị Tú Em, urang dalam kapul urang kamei puk palei Tam Sóc B2 hu mesraiy jien mek raba lap meng Gilang pariak sarak rahra. Hadei 2 mbang mesriay paok jien 80 trieu dong, sa-ai dak harei dak ngak siam raidiuk saong bruk pablei salih jitvu mbang saong menyum. Urak ini, yaok harei sa-ai Tú Em duah jien mek tame yaok rituh ribau ndong meng bruk pablei ndap mbang, ia menyum, tapa di nan, hu tal ganap siampurna piah kuhria ka raidiuk sang danaok saong sangka siam ka dom anek bik mbang bac.

Sa-ai Tú Em lac sa urang bangsa Khmer brei thau lac hu mbaok tame kapul urang kamei dalam palei, dalam bruk ngak mbang mboh hu hatai sangka, tacei ba di urang kamei dalam xa, blaoh dahlak hulin mesraiy phun jien piah ngak mbang, dahlak hulin pablei leisei, tacuk, pablei ia menyum… meng dom di nan jien mek tame jeng hu, anek bik jeng hu si nao bac siam jang dut saong dahlau daih.

Dom thun jaik ini, ngak tui bruk “Urang kamei chreih chrai bac megru, ngak bruk hadah krah, padang baoh sang selamat haniem phol” kayua pakat nagar Kapul urang Kamei Viet Nam ba tabiak, dalam tinh Soc Trang hu rah tabiak rilo kapul, menuac urang haong bruk ngak patagok bruk ngak mbang ba mai siam lagaih.

Mboh rilo abih dalam nan hu bruk ngak di Kapul Pambuak pablei baoh kayau hacih sa-at ka urang kamei dalam kapul di palei An Trung, xa An Thạnh 1, huyen Cù Lao Dung hu rik daong biak praong dalam bruk pablei dom ndap nda baoh kayau, rilo meng lac baoh man merah bhong ST. Amuk Huỳnh Thị Hồng A, urang dalam Kapul pambuak pablei baoh kayau hacih sa-at ka urang kamei dalam kapul daok di palei An Trung pala 3 cong taneh man bhong ST, meng hu bac pasram. Klah rabha ilamo, jalan raong phun, raong baoh meng bruk hu bac tani tanat saong dom urang kamei dalam kapul hu mbaok tame nan phun man di dalam sang tuk halei jeng brei baoh siam rambung rilo. Langiu di nan, bruk pambuak jeng daong baoh sang pablei baoh man hu tani tanat sampurna, pablei tabiak glaong jang. Thun dahlau, baoh sang amuk Hồng A mek tame hu labaih 100 trieu dong meng bruk pablei ndap nda baoh karaoh hacih sa-at.

"Dahlau daih yaom kaom pablei jeng oh tani tanat, blaoh meng tuk tame kapul pambuak bruk, urang ikak kaiy thau baoh man di drei bangi, siam hacih hu rilo nan mai blei, yaom jeng glaong jang. Langiu di nan baoh sang daok brei pajaih siam ka mikva di drei."

Sa-ai Nguyễn Thị Hồng Diễm, Akaok Kapul urang Kamei xa An Thạnh 1 brei thau, Kapul pambuak bruk urak ini hu 10 urang kamei dalam kapul hu mbaok tame, adei sa-ai kamei rik phun jien piah daong gauk patagok bein baoh kayau hacih sa-at, klah rabha jalan pala drak, daong gauk ngak piah tal bilan paik baoh piah patakik jien buh tabiak saong pambuak gauk duah labik piah pablei baoh kayau. Bruk ini yaom lac barau hu padang jaik 2 thun, min ba mai siam lagaih biak praong, ndap nda man marah bhong ST kayua dom adei sa-ai kamei pala hu urang pandar takre, urang ikak kaiy blei salih mai tal bein phun duah brei hu yaom meng 70.000 – 100.000 dong/kg. Sa-ai kamei Hồng Diễm brei thau: “Meng tuk padang kapul pambuak bruk ye dom adei sa-ai kamei pambuak haong gauk. Meng bruk pablei salih sit, padang kapul pambuak bruk blaoh, pablei hu yaom, pablei ndap nda hu rilo, daong adei sa-ai kamei ginup mada kaya jang. Adei sa-ai kamei daok klah rabha ilamo haong gauk yau bruk taong ruak ka phun, bruk pandar jru, khak ka njauk, daong adei sa-ai kamei pablei biak hu.”

Dalam dom thun tapa, danak dak urang kamei patagok bruk ngak mbang tuk halei jeng hu dom pakat karja urang kamei dalam rinh Soc Trang chreih chrai ngak bruk. Kayua hu yau rilo urang kamei, dalam nan hu  rilo urang kamei dalam kapul baoh sang kathaot, kan kandah hu uak drei tagok meng bruk ngak mbang ka njauk, daong patrun bruk dom baoh sang kathaot di bhum palei meng jalan karo kajap./.