Palei Caklaing, ban sit Phước Dân, huyen Ninh Phuoc urak ini hu sa kapul hop tac xa saong yaok pluh labik menyim jih dalah bhap bini. Piah pabak hatai caong khin di darak pasar dak harei dak glaong saong ngak tabiak dom ndap nda karei, kapul Hop tac xa jhik menyim jih dalah Cam palei Caklaing daok pambuak haong dom urang jhik menyim naih joi dalam palei piah pamedeih veik dom bingu hala meng kal piah ba tame bruk ngak, ngak tabiak dom ndap nda pagam haong ilamo, gam haong nan patagok gah jirah rivang. Amuk Phú Thị Phường, kapul Hop tac xa jhik menyim jih dalah Cam palei Caklaing, ban sit Phước Dân, huyen Ninh Phước, Ninh Thuan ndom meyai lac:

“Anai ngak 5 thun ini lac anai hu bac di dom wa praong thun, drei ngak mbang tui yaok ndap nda, min ngak hu sa blah ndap nda ye lihik tal 3 harei ka meng hu, sa blah pablei tabiak tok 2 rituh ribau dong, nan bruk di drei paje nan drei brei hu khik.”

Langiu bruk khik tani tanat saong patagok dom palei ngak bruk meng kal, urang Cam daok salih phun pala, pambuak pala dom janih phun ba mai yaom kaom kinh te glaong yau ye rabung tay hijao, danui nyo, baoh madan tui jalan ngak nong ilamo kong nghe glaong, pambuak haong raong glang athur. Hu mboh rilo abih lac bruk pala rabung tay hijao tui jalan pambuak gauk di xa An Hải hu daong rilo baoh sang patruh kathaot, uak drei tagok ngak kaya meda. Amuk Châu Thị Chúc ndom meyai lac:

“Meng harei bo baoh sang dahlak hulin ba drei tame ngak rabung tay ini mai ye harei halei jeng hu jien mek tame, bruk pablei tabiak ye hu HTX blei, yaok hadah page halei drei jeng hu jien.”

Tal ini hu 106 baoh sang urang Cam palei Katuh, xa An Hải, huyen Ninh Phuoc ba drei tame pala rabung tay hijao pandar ilamo ngak kong glaong saong taong abih jaik 40ha taneh. Ong Hùng Ky, Yam ndok HTX Dich vu Taong hop Palei Katuh brei thau: Hu padang di thun 2016, meng akaok meti tok hu 13 urang haong phun jien tok 100 trieu dong, min tal ini jien mek tame di HTX Dich vu Tong hop palei Katuh tagok tal labaih 4 ty dong/thun. Meng bruk pambuak ngak saong pablei tabiak ndap nda di HTX saong dom gah ngak mbang pablei salih hu daong rahra parilo jien mek tame.

“Meng harei padang HTX, mikva ngak rabung tay ini hu jien mek tame biak glaong, hu HTX blei mai nan mikva oh huac kanda ka yaom kaom.”

Tui ong Đàng Năng Tom, piah paglaong siam lagaih bruk ngak mbang, huyen Ninh Phuoc hu padang 30 kapul hop tac xa saong 78 kapul pambuak tui majam yaom kaom. Dom bhum palei jeng hu padang 15 jalan ngak hamu praong ngan haong 2.346 ha taneh pambuak haong gah ngak mbang pablei salih pablei tabiak ndap nda.

“Dalam bruk patagok bruk ngak haong pambuak ndap nda di urang ngak nong haong gah ngak mbang pablei salih haong HTX lac biak hu makna, kayua nyu daong ka urang ngak nong sahnang hatai piah ngak mbang.”

Lac huyen akaok meti di tinh Ninh Thuan mek hu tanut palei pala bahrau, Ninh Phước patui veik ba tabiak jalan paglaong raidiuk rahra. Langiu di bruk jhul khang pambuak ngak bruk, huyen daok sangka iek praong tal bruk buh jien tame dom gah ngak kong, meyao meyit, brei rilo bruk ngak. Tal ini, jien mek tame kuhria tui yaok urang di huyen Ninh Phước hu labaih 80 trieu dong/urang/thun, baoh sang kathaot trun daok 0.71%./.