Ngak dom bruk tacei ba, adat di pakat nagar, tinh hu pasang iek, Mbang Pato tacei tinh ba tabiak bruk Mbaoh tangin ka hatai caong daong ka sang daok dalam tinh hu 3.156 baoh sang, dalam nan hu 2.672 baoh sang padang bahrau, 484 baoh sang ngak pasiam. Dalam bruk ngak daok gilac 3.135 baoh sang, patrun takik 21 baoh sang dut tui dom baoh sang hu brei mbaoh tangin ngak.

Hadei hu jalan pato tacei di pakat nagar, di tinh An Giang, huyen Tri Tôn padang mbang pato tacei, jak ba bruk hu mbaok tame di sa majam politic brei oh daok baoh sang taik tahak hu 6 asal kadha cambaih laih: brei ngak “njauk urang, njauk bruk, njauk tukvak, njauk jak jeng, njauk bruk di drei saong njauk asar siam”.

 Gam tui kham merat glaong, puac bilan 5, huyen Tri Tôn hu ngak salah blaoh bruk daong padang bahrau saong pasiam 1.336 baoh sang, ngak hu labaih 42% taong abih dom baoh sang brei oh daok taik tahak, glaong abih di dalam 11 huyen, ban sit, ban. Jak jeng di danak dak brei oh daok baoh sang taik tahak dalam huyen lac meng hu bruk ba drei tame di sa majam politik saong bruk daong meng dom phun jien di nagar, tinh, huyen.

Ong Nguyễn Văn Bé Tám, Akaok UB Bhap bini huyen Tri Tôn brei thau: “Njauk ndom mayai lac di nyu hu lac bruk rik daong jien dalam rahra meng di dom kapul, menuac urang, gah ngak pahla dhar phol daong Danak dak brei oh daok baoh sang taik tahak dalam huyen Tri Tôn thun 2025 hu salah blaoh samar. Meng yaok baoh sang “caong takre” hu brei alin hadiah dalam bruk bui sambai, chreih chrai di dom baoh sang kathaot, urang hu ngak bruk katmang, mikva bangsa takik, baoh sang mbang tui sarak… di dalam huyen”.

Ong Chau Monl, xa Lễ Trì, huyen Tri Tôn brei thau, sa baoh sang daok dalam sang klak taik tahak, bilan hajan ye tanjaoh ia, angin khang ye oh khin ndih kayua huac jaleih. Hu ndih lapei baoh sang ong jeng oh khin sahaneng tal bruk hu Karja daong padang sang daok khang karo, praong laneing lanoi, caga plaih hajan, pandiak. Dahlak hulin thau dhar phol tal Karja, karja palei hu sangka ka rahra. Meng di ini baoh sang hu sa raidiuk trei sir, sahnang ngak mbang, diukrai. Danak dak brei oh daok sang taik tahak biak lagaih, hu rilo bruk hu yaom glaong, oh lac daong baoh sang dahlak hulin hu labik daok tani tanat blaoh  daok hu daong prein, daong hatai je piah uak drei tagok dalam raidiuk.

Kuhria tal harei 2/6, dalam tinh An Giang hu ngak blaoh, ba tame pandar 3.121 baoh sang; dalam nan hu 2.641 baoh sang bahrau padang saong 480 baoh sang ngak pasiam. Patui di nan, kapul dom urang hu ngak bruk katmang meng kal, An Giang hu ba tame pandar 464 baoh sang, ngak hu taong abih 100%. Yang ya ka 2 lac urang kathaot, jaik kathaot dom danak dak jalan ngak pakat negar, dalam tinh peih ngak saong salah blaoh ba tame pandar 601 baoh sang, jeng ngak hu taong abih 100% yau kuhria ba tabiak dahlau. Kapul yang ka 3 lac baoh sang kathaot, jaik kathaot daok dalam danak dak brei oh daok sang taik tahak di dalam tinh hu peih padang ngak 2.070 baoh sang, urak ini salah blaoh saong ba tame daok 2.056 baoh sang. daok bruk huyen An Phú daok 14 baoh sang hu peih padang saong daok brei ka samar drah salah blaoh taong abih danak dak brei oh daok baoh sang taik tahak.

Ong Trần Minh Nhựt, Yam ndok So Ngak nong saong Alam langik An Giang brei thau, tinh hu ngak tani tanat, ginup dom harak gar pato tacei di Thu tuong Rajaei dalam bruk ngak brei oh daok sang taik tahak yau ye: Padang, pasiam Mbang Pato tacei dom pakat; peih ngak thaik thaot sang danaok hu lagaih saong bhum palei dalam nan hu 8 thaik thaot saong bruk pato tacei di jabat, labik saong huyen, ban sit, ban thau abih, samar drah peih bruk brei oh daok baoh sang mblaing mblang taik tahak.

Tui ong Trần Minh Nhựt, dalam bruk brei oh daok sang taik tahak, dom bhum palei jak ba dom kapul padang sang ngak pahla ngak dhar phol piah daong hu mbaok tame padang sang daok piah patakik lahik jien ka dom baoh sang rahra saong padang sang kajap khang jang. Dom bhum palei jak ba kapul agama, urang dalam sang, but pajaih hu daong veik jien padai saong prein ngak, ndap nda padang sang…

Dalam bruk peih padang brei oh daok baoh sang taik tahak, tinh An Giang paglaong bruk pathau khan haong rilo jalan hu pambak praong, jak ba grauk urang ba tangin tame ngak; jhul khang bruk pathau khan, jak ba, langyah, daong rahra thau tani tanat tanut hu mbang tui. Dom baoh sang hadei tuk hu daong brei oh daok sang taik tahak patui veik kham merat uak drei tagok dalam raidiuk./.