Jaik si abih dom tuai damuai mai ma-in jirah, urang daok guk meng kal gilac mai Côn Đảo hadei rilo thun pagam, diuk rai, jirah rivang jeng hu sa meta mboh lac: Côn Đảo daok salih mbaok meta yaok harei, raidiuk rahra hu siam. Jalan di angaok ia saong jalan ahaok par hu peih praong, pambuak siam lagaih ngan haong pasak praong yau ye Ban raya Ho Chi Minh, Can Tho, Ha Noi, Soc Trang, Vung Tau…

Côn Đảo urak ini oh daok baoh sang kathaot, labaih 6.000 urang dalam umur ngak bruk hu bruk ngak, taong abih rahra hu pandar ia hacih sa-at, hu pandar yitvu y te, gru pato hu ilamo tui adat hukum. Bruk caga an ninh – quoc phong nagar hu khik karo, pambuak khang di bruk ngak mbang patagok kinh te haong bruk pacang khik negar, tasik kaoh pulao. Ong Nguyễn Tiến Chi, umo 75 thun, urang daok guk meng kal di Côn Đảo brei thau, meng akaok meti hadei harei Côn Đảo hu peih paha, ong meng hu gilac mai bhum taneh ini.

"Dahlak hulin kuhria lac ndik ahaok par tabiak kaoh pulao, min dahlak salih tapa ndik gilai piah hu maong iek, akaok meti nao tagok pulao hadei rilo thun mai dahlak hulin mboh lac di ini khik hu dom glai klo, biak hijao halui. Yaom lac rahra daok takik min jalan mbak, sang bac, gom truac, balai di Côn Đảo hu kuhria ramik srap gap biak tani tanat, meda khik gilac ka anek taco harei hadei. Oh sa janih khik bruk katmang blaoh daok lac Po sa bhum taneh ginreih, pacang khik taneh riya, tasik pulao di negar”.

Hadei 50 thun, kinh te di Côn Đảo daok hu jalan ngak njauk, hu ngak tui jalan kuhria “Jirah rivang – meyao meyit blei salih, ngak kong, nong – glai – ikan”, dalam nan labik ngak jirah rivang – meyit meyao – pablei salih hu ngak rilo, mek hu labaih 92%.

Ong Lê Anh Tú, Bi thu Huyen uy Côn Đảo brei thau, hadei ramik jabat karja pakat tinh, Côn Đảo jeng sa bhum pulao dac khu. Bhum palei brei patagok kinh te – xa hoi tui jalan hu angan jie makna, karo kajap saong taong abih pagam haong bruk khik kajap quoc phong – an ninh taneh ia saong khik karo kajap taneh riya tasik pulao.

Côn Đảo brei pataom prein tame bruk patagok jirah rivang siam glaong, jeng sa labik jirah pakat negar gam saong bruk hu angan makna di abih nyu hu lac jirah rivang sinh thai tasik kaoh pulao, sajarah – ilamo saong yang mebang agama. Tui ong Lê Anh Tú, urak ini tinh Ba Ria – Vung Tau hu harak gar paje, harak payua tagok Rajaei, patui di nan Rajaei brei ngak dom bruk ka harak gar ba tagok Mentri Chinh tri, Quoc hoi maong iek piah tapa dom bruk dalam sarak karei brei ka Côn Đảo.

"Sarak karja ini daong patagok yaom kaom drap ar, yau inem mek sang guk, Bein pakat negar, jeng yau dom sarak lagaih dui pachreih gah buh jien tame ngak, bruk lagaih karei dui pachreih urang ngak siam glaong saong bruk jien padai karei piah khik kajap bruk patagok. Daok ka taong abih, jalan kuhria patagok kinh te – xa hoi di pulau Côn Đảo brei caik bruk hu angan makna tame bruk patagok karo kajap, bahrau, hu bruk karei di drei, ngak jeng bruk patagok samar ka gah jirah rivang, khik ramik alam langik tasik, paglaong raidiuk rahra. Gam haong nan khik karo kajap jalan ngak ka quoc phong – an ninh di labik praong hu makna ini”.

Iek gilac jalan 50 thun blaoh tapa, meda ndom mayai lac, Côn Đảo hu uak drei patagok khang, jeng sa baoh bimong mbaok meta ka bruk patagok hu bruk khik ramik saong salih bahrau. Dom bruk mek hu harei ini ieu lac sa bruk mai meng hatai sangka, dui ba tani tanat di Ndang, Karja, bruk ngak sa hatai, kham merat di Ndang bo, karja saong rahra huyen kaoh pulao, gam haong di nan ieu lac bruk pahadar lagaih gam saong bruk klak rup drei di dom urang meng kal dahlau, jaleih trun ka bebat, tu do bhum taneh ginreih jak ini./.