Dalam labaih 60 thun gam saong bruk di phuong 11, quan Tân Bình, ong Huỳnh Kha, Akaok Kapul Bol lin meng kal hu jeng sa dalam dom urang chreih chrai hu mbaok tame padang saong khik ramik dom yaom kaom ilamo, abih di nyu nan lac Labik ilamo Ho Chi Minh di sang bhap bini “Labik dhaong chinh tri – labik katmang Bảy Hiền” dalam thun 2023.

Sang ilamo bhap bini “Bhum dhaong chinh tri – labik katmang Bảy Hiền” ieu lac sa labik khik piah dom ndap nda hu yaom glaong, thaik thaot jaman sajarah di phuong saong ieu lac sa labik brei mboh hatai thau phol thau dhar tal dom rairah dahlau, dom urang klak rup drei brei ka bebat, tu do di taneh ia. Dalam labik sajarah nan, Labik mblang ilamo Ho Chi Minh hu ruah pilih ngak labik padang, jeng sa banah hu makna dalam bruk pathau khan saong pato megru bruk katmang ka rairah sit thun umo. Rilo sang bac, kapul chinh tri – xa hoi hu peih ngak dom var cuh nyang saong pang yaih khan ka raidiuk Wa Ho, ka bhum taneh hu ngak bruk katmang Bảy Hiền jeng yau dom asal kadha brei ka Wa Ho.

Daok di phuong 8, quan 10, Ban raya Ho Chi Minh, page harei adit, di “Harei raya palei dahlak” – mbang darak pasiam veik, yaok urang, yaok baoh sang chreih chrai pahacih taong abih jalan dalam ban, ba hareik pasiam mai piah salih ndap nda. Gam hu mbaok tame danak dak, rahra gam jirah Labik ilamo Ho Chi Minh hu padang di jalan sit 223 jalan Nguyễn Tiểu La. Hu mbaok tame ngak chreih chrai di rahra, lac hu meng hatai kham merat di sa majam politik phuong 8 dalam padang Labik ilamo Ho Chi Minh di dom jalan sit dalam bhum.

Amuk Nguyễn Ngọc Bảo Quyên, Bi thu ndang uy phuong 8, quan 10, brei thau, puac thun 2021, phuong peih padang Labik Mblang ilamo Ho Chi Minh di jabat piah parang dom thaik thaot, kadha ilamo seni nghe thuak, asal kadha brei ka Wa Ho Chi Minh.

Bruk ini gam saong ngak kong nghe lek taka so, bah QR piah pang khan kadha brei ka Wa Ho. Tal thun 2022, ngan saong hatai caong oh sa di dom jabat, labik karja – bruk ngak hu Labik mblang ilamo Ho Chi Minh daok hu pambak rilo jang tal rahra, phuong 8 tuel dom blah pano, kadha ka dom panuac ndom, panuac pato di Wa di dom jalan sit dalam bhum.

Meng tuk hu ruah pilih padang Labik mlang ilamo Ho Chi Minh dalam bilan 10 – 2024, labik sang brei pah Cô Mươi (lek taka 78/42 jalan Trần Thị Trọng, phuong 15) di amuk Trần Thị Mươi dak harei dak chreih sambai saong jeng sa labik pataom me-in bhap bini. Labik sang brei pah Cô Mươi hu jaik 50 bilik brei pah haong labaih 120 urang daok di ini, rilo meng lac urang ngak kong, ngak ta-eng.

Di quan Tân Phú, Labik mblang ilamo Ho Chi Minh di labik sang brei pah di amuk Nguyễn Thị Kim Liên (jalan Lũy Bán Bích, phuong Hòa Thạnh) jeng sa labik parang biak gheih ghang ngan haong dom thaik thaot saong yaok rituh tapuk, asal kadha, panuac ndom, kadha danei angan… ka raidiuk, bruk ngak di Wa Ho anit ranam tapa QR. Hadei tukvak ngak bruk glaih glar, urang ngak kong, ngak pah hu sa labik pataom me-in iamo hu yaom glaong, daong patakik dom kan kandah, kateik geik di raidiuk ngak mbang duah jien./.