Danak dak jalan raya Ban raya Ho Chi Minh – Thủ Dầu Một – Chơn Thành hu taong abih phun jien buh tame labaih 8.283 ty dong, atah labaih 45km tapa Ban Tân Uyên, huyen Bắc Tân Uyên, huyen Phú Giáo saong huyen Bàu Bàng.

Piah peih tabiak, hu jaik 1.400 baoh sang, urang menuac saong 17 kapul gam tame kan kandah. Yaom lac dom bhum palei hu kham merat ngak dom jalan peih taneh, min, bruk jao mbaok taneh di danak dak jalan peih samar ini bahrau tok hu 2,8%.  Ong Võ Ngọc Sang, Phaok Yam ndok Gah pasang iek danak dak jalan mbak tinh Binh Duong ndom lac, brei patagok bruk ngak harak gar mek taneh, abih di nyu nan lac yaom taneh kayua rilo karja palei oh ka ba tabiak.

"Ndom mayai brei ka bruk jao taneh, Gah ini jeng pandar dom karja palei samar drah pasang iek ngak harak gar jao taneh, hadei nan Gah ini hu jao ka gah padang ngak piah jhul samar bruk jao taneh. Ngan haong bruk hu bayar jien blaoh ye tukvak daok veik, pandar pambuak jak ba rahra jao taneh dahlau tuk tok daok karja dua pakat.”

Gam tui Danak dak jalan Vanh ndai 4 Ban raya Ho Chi Minh tapa Binh Duong, dalam nan hu 3 danak dak banah, dalam nan Danak dak banah 1 – peih paha mbaok taneh meng jalan meng tatua Thủ Biên – kraong Sai Gon hu UB Bhap bini tinh mbaoh tangin ngan haong taong abih tanut buh jien tame labaih 7.900 ty dong. Danak dak ini hu ngak biak praong, kuhria mek jaik 240 ha taneh, nao tapa Ban Thủ Dầu Một, Ban Tân Uyên, Ban Bến Cát saong huyen Bắc Tân Uyên, ngak kan kandah tal labaih 1.451 baoh sang, hu labaih 300 baoh sang daok dalam sarak hu ramik brei labik daok karei.

Dôm urang lambaok vakil dom karja palei tapak tacei tabiak dom kan tavak, kan kandah dalam bruk peih danak dak, ba tal bruk peih paha mbaok taneh daok suai, abih di nyu nan lac bruk kurang urang piah dut iek, pasang iek. Anak dom panuac ndom meyai di dom bhum palei, ong Từ Phương Thắng, Yam ndok Pasak Patagok kadung jien taneh riya tinh Binh Duong brei thau, brei parilo urang ngak, pabak veik urang jakar piah ngak dom bruk hu pandar:

" Di dom Pasak, khol dahlak hulin pambuak khang haong dom karja palei piah jak ba rahra jao taneh, caik dahlau bruk langyah samar drah dom bruk hu njauk hatai. Yaom lac kapul di Pasak urak ini daok tukik, khol dahlak hulin brei mboh ini lac bruk praong di pasak saong ba abih hatai kham merat prein piah ngak ka salah blaoh.”

Ong Bùi Minh Thạnh, Phaok Akaok UB Bhap bini tinh, pandar dom labik kham merat ralo jang piah jhul samar dom danak dak. Pasak Patagok kadung jien taneh hu pandar bruk pasang iek, jak ba veik urang menuac piah jhul samar bruk mbaoh tangin ka yaom taneh.

" Tapa bruk ngak di dom labik brei mboh, bruk ngak siam bruk peih mbaok taneh, khik kajap phun jien dalam kadung jien hu bayar abih ka rahra daok khin piah tani tanat raidiuk, biak hu makna. Kayua yau nan ye, bruk padang yaom saong peih ngak sa bruk siam lagaih, brei ngak dom bruk siam mekre, daong ka drei salah blaoh samar drah dalam bruk bayar jien taneh, peih mbaok taneh, mek hu tanut hu kuhria ba tabiak dahlau.”

Hu thau mbiah, UB Bhap bini brei ba tabiak tukvak tabung glaong bruk bayar jien dalam kadung jien karja ngan saong dom tukvak cambaic laic lac 30/6 saong 30/8, brei mboh hatai kham merat ba dua danak dak jalan mbak pasak ini hu ngak salah blaoh samu tukvak, daong prein khang ka bruk patagok kinh te – xa hoi di tinh Binh Duong saong di sa bhum kinh te pasak gah Meraong negar./.