Meng di tinh Phu Tho mai padang mbang ngui di palei Đoàn Kết, xa Ayun Hạ, huyen Phú Thiện jaik 30 thun, ong Nguyễn Văn Việt hu mboh cambaih laih di bruk salih bahrau blaoh ieu lac bineik raya Ayun Hạ ba mai ka bhum taneh pandiak thu lagu. Mbaok taneh di bhum taneh ini biak lapih, oh meda pala phun kong nghiep hu. Dalam dom thun bahrau mai daok, baoh sang ong ngak padai sa thun sa mbang di bilan hajan, daok bilan pandiak ye mblang hamu thu lagu, calah tanrac. Min meng thun 2002, tuk danak dak binek ia Ayun Hạ ba tame ngak bruk, phun padai lagaih dalam bhum taneh praong ini. Meng di nan, gam saong 2ha hamu, baoh sang di ong yuak hu yaok pluh tan padai yaok thun. Daok bilan dong xuan 2024 - 2025, ong yuak hu 35 tan, jien padai drap ar di baoh sang ong hu ginup. Ong Nguyễn Văn Việt khan lac: “Meng tuk hu ribaong bineik raya di Ayun Hạ, hu ia ye rahra patagok bruk ngak padai ia, tani tanat, ngak jeng sa ndap nda, rahra hu jien mek tame piah patagok kinh te mbang angui baoh sang, padang hu sang danaok, raidiuk ye anek bik hu nao bac megru ginup”

Bineik raya Ayun Hạ praong 37 km², hamu ia 253 trieu m³, pruh tuh ka 13.500 ha padai ia saong pabak ia pandar ka yaok pluh ribau baoh sang rahra. Jien mek tame rilo lac mai meng phun padai, rahra dom huyen gah Pur Meraong tinh Gia Lai dak harei dak pala rilo phun karei, padang hu bhum pala yau tabau, parilo phun mbang baoh, raong glang lamo… Ngak jamraik saong ilamo khoa hoc ky thuat hu ba tame pandar rilo, daong paglaong asar siam saong yaom kaom ndap nda kaya ka gah ngak nong. Ong Phạm Văn Lượng, Phaok Akaok UB Bhap bini huyen Phú Thiện, brei mboh Bineik praong Ayun Hạ lac sa bruk hu makna dalam dom bruk salih bahrau ini: “Kuhria meng tuk hu danak dak ribaong bineik raya Ayun Hạ mikva hu salih jalan pala drak saong dak harei dak salih tapa dom janih phun pala tui jalan chuyen canh, piah ngak tabiak dom bruk pala drak tani tanat ba mai siam lagaih ka gah ngak mbang kinh te. Danak dak ribaong bineik Ayun Hạ jeng daong mikva rahra pala drak hu halau ia piah pruh tuh, ngak bruk pala drak tui jalan karo kajap, tani tanat, pasiam hu jien mek tame, bruk ngak mbang hu cakrok patagok daong ka bruk patruh eik patrun kathaot karo kajap”.

Bineik riya Ayun Hạ oh lac sajanih pruh tuh ia ka bhum pala tabau, bhum ngak padai saong phun mbang baoh praong laneing lanoi di gah Pur Meraong tinh Gia Lai blaoh nyu daok daong ngak tamuh tagok dom angan je ndap nda. Yau angan “Brah Phú Thiện”, urak ini hu mbaok di grauk darak pasar dalam negar hu urang pandar taong yaom glaong. Angan Yen sao di labik ini daok hu padang. Ong Ral Lan Chung, Akaok UB Bhap bini tinh Gia Lai, brei thau, tinh daok ba tagok panuac likau pasiam pakajap danak dak, duh ka jalan ngak di tinh ka bruk peih praong dom mblang hamu praong pala padai, pandar dom jamraik: “Tinh taong yaom ini ieu lac danak dak ribaong bineik riya ba mai kein lagaih biak praong prang ka mikva rahra. Tinh jeng daok likau Mentri Ngak nong saong Alam paglaong tanut bineik tagok piah patui veik duh ka dom labik dahlau daih lac bhum glaong, thu lagu, ia ndik tagok oh tal, tuk paglaong tanut bineik tagok ye halau ia ini brei duh ka bruk pruh tuh ia ka taong abih taneh meng nan ini mai ia oh tagok tal”.

Binek praong Ayun Hạ oh lac sa janih ba ia pruh mai ka dom mblang hamu thu lagu, blaoh nyu daok ba mai sa raidiuk trei sir, haniem phol siam makre ka yaok ribau baoh sang rahra. Dom mblang hamu padai hijao that, dom var ro raong rilo athur saong dom bruk bui sambai di rahra brei mboh sa bruk salih bahrau siam gheih di bhum taneh ini. Dalam harei hadei, danak dak binek raya Ayun Hạ pagun sanya patui veik lac sa bruk hu makna piah patagok bruk ngak nong karo kajap, gam haong di nan ngak jeng sa bruk karo kajap ka bruk ginup meda di bhum Pur Meraong tinh Gia Lai./.