Panuac hu angan “Rivang ma-in Cồn Sơn Can Tho” dang di labik ka 4 dalam TOP 10 meng tukvak bo urang Viet hu roh duah khau tin rilo di abih dalam asal kadha “Rivang ma-in” kayua Google brei thau. Dalam nan, Cồn Sơn jeng ieu lac sa labik pachreih hu rilo tuai damuai dalam haraei raya rija tukvak Raya, Tết saong tuk bilan Pandiak mai.

Labaih 10 thun kuhria meng harei ba tame ngak pandar, yaom lac urang tuai damuai mai rivang ma-in dak harei dak rilo, Cồn Sơn hu jeng angan je min mikva di labik ini jeng daok khik hu “urang palei” di dalam ban saong jalan ngak nan lac khik iek sambo that hijao di bhum taneh kraong ribaong hujung Mekong. Tuai damuai mai ini, langiu di ba drei tame ieik langik tasik kraong ribaong manuac urang mong iek ikan, rivang jirah bein phun kayau tui bilan… daok mong iek hu bruk bhap bani rabha janih, pataom mek kanuh kalaok meng katak ngak gilai; khik kanduh baoh kayau piah ngak khak; jak gauk pala phun kayau... piah khik sambo that hijao brei ka palei pala bhummi.

Lac urang daneiy angan haong bruk raong ikan dalam ro var dalam ia pambuak pagam haong bruk taduan raok tuai damuai, ong Lý Văn Bon, po ghe ikan Bảy Bon angaok kraong Hậu khan brei thau:

“Dahlau diah ghe ikan mboh oh hagait ghe karei, min meng di harei pambuak pagam ghe ikan, bein phun kayau, har bhap bani, ikan dhok par, xiếc kiuk, homestay, camping, ndih veik angaok pulao… hu ginup abih dom yitvu yau nan ye tuai damuai mai ini meng mboh bui sambai saong caong khin gilac mai rilo mbang jang.”

Lac sa di dalam dom jabat jirah lữ hành peih ngak bruk pachreih bilan Pandiak awal , amuk Lê Đình Minh Thy, Akaok Công ty Vietravel dhal Cần Thơ brei thau, yam abih tame jaman bahrau di gah jirah rivang ma-in, Vietravel brei mboh ka jalan ngak cak rok patagok suai lavik ngan haong klau mbaik gang nan lac: Urang ngak mbang blei salih hijao - Urang ngak mbang blei salih lek taka - Urang ngak mbang blei salih pambuak bruk nao mai haong gauk. Yaok janih ndap rivang ma-in oh lac tok sa jalan, bo daok hu bruk pambuak gauk nao mai di gah ilamo, ilamu saong jalan diuk rai haong gauk:

“Khaol dahlak caong khin hu tour jirah di khaol dahlak meda hu ngak brei pambak praong jeng yau brei nao dom kadha ndom ka bruk rivang ma-in hijao, jirah njauk caik hatai brei ka langik tasik môi trường, abih di nyu lac rivang ma-in cak rok patagok khang kajap. Yau nan ye, dalam yaok mbang tour jirah khaol dahlak caong khin ba mai asal hijao, jaik taphia jang haong alam langik.”

Amuk Đào Thị Thanh Thúy, Phaok akaok So Ilamo – Padhih saong Rivang ma-in Ban Can Tho brei thau, bilan pandiak ieu lac tukvak nao rivang ma-in sinh thai di ban Can Tho jang yau di Bhum taneran kraong Cuu Long hu peih tabiak biak chreih chai bui sambai. Piah patagok baoh jeng siam mekre bruk pambuak gauk cak rok patagok bruk rivang ma-in di Ban raya Ho Chi Minh saong kapul tinh/ban bhum taneran kraong Cuu Long, bahrau ini, urang pal akaok dom puk palei njauk hatai haong gauk ka jalan ngak brei cak rok patagok bruk rivang ma-in hijao, khang kajap, ngan haong asal kadha “Rivang ma-in khang kajap saong jalan ngak pamong tal Net Zero” dalam 6 bilan puac thun 2025:

“Pachreih tui danak dak, rilo Urang ngak mbang blei salih hu dom danak dak biak hadah krah. Pagap yau khu, labik ye jeng hu padang ngak dom chuyên trang, danak dak pachreih tame bahmbang jang, dom danak dak nao rivang iek duah thau, dom van mbang hu rilo salih bahrau. Dom labik gah ndih daok hu rilo jabat jeng hu danak dak brei trun yao, takik abih lac 20-30%.”

Gam saong ralo janih pachreih hu mboh di anak meta gam haong dom bruk ngak trải nghiệm biak siam gheih gam haong asal kadha pacang khik alam môi trường, rivang ma-in bilan Pandiak thun ini di Ban Can Tho meda ba mai dom bruk ngak njauk kanar dar “Rivang ma-in hijao - Chạm Hè chất” brei ka tuai damuai dalam saong langiu negar./.